కావలసిన పదార్థాలు: 2 కప్పులు రాగి పిండి, అర కప్పు ఉల్లిపాయ తరుగు, అర కప్పు క్యారెట్ తురుము, 2 నుండి 3 సన్నగా తరిగిన పచ్చిమిర్చి తరుగు, సన్నగా కట్ చేసిన రెండు రెమ్మల కరివేపాకు, 1 టీస్పూన్ జీలకర్ర, కొద్దిగా తాజా కొత్తిమీర తరుగు, రుచికి సరిపడా ఉప్పు, పిండి కలపడానికి తగినన్ని నీళ్లు, కాల్చడానికి సరిపడా నూనె లేదా నెయ్యి
తయారీ విధానం: ఒక వెడల్పాటి మిక్సింగ్ బౌల్లో రెండు కప్పుల రాగి పిండిని తీసుకోవాలి. అందులో సన్నగా తరిగిన ఉల్లిపాయ ముక్కలు, క్యారెట్ తురుము, పచ్చిమిర్చి ముక్కలు, కరివేపాకు, జీలకర్ర, కొత్తిమీర మరియు రుచికి సరిపడా ఉప్పు వేయాలి. ముందుగా నీళ్లు పోయకుండా చేత్తో వీటన్నింటినీ రాగి పిండిలో బాగా కలిసేలా మిక్స్ చేసుకోవాలి.
ఇప్పుడు కొద్దికొద్దిగా నీళ్లు చిలకరిస్తూ చపాతీ పిండి కంటే కాస్త మృదువుగా ముద్దలా కలుపుకోవాలి. పిండి ఎంత స్మూత్గా ఉంటే రొట్టెలు అంత సాఫ్ట్గా వస్తాయి. ఇలా కలిపిన పిండిపై మూతపెట్టి కనీసం 10 నుండి 15 నిమిషాల పాటు నాననివ్వాలి. పిండి నానిన తర్వాత రొట్టెలు చేయడానికి మరింత వీలుగా తయారవుతుంది.
చపాతీ పీటపై ఒక ప్లాస్టిక్ కవర్ లేదా బటర్ పేపర్ పరిచి, దానికి కొద్దిగా నూనె రాయాలి. ఇలా చేయడం వల్ల పిండి అంటుకోకుండా సులభంగా లేచి వస్తుంది. ఇప్పుడు కావాల్సిన సైజులో పిండి ముద్దను తీసుకుని, చేతి వేళ్లతో నూనె అద్దుకుంటూ గుండ్రంగా రొట్టెలా తట్టాలి. మరీ మందంగా కాకుండా, అలాగని మరీ పల్చగా కాకుండా మీడియం సైజులో సమానంగా ఒత్తుకోవాలి.
స్టవ్ వెలిగించి పెనం పెట్టి కొద్దిగా నూనె లేదా నెయ్యి రాయాలి. పెనం వేడయ్యాక తట్టిన రాగి రొట్టెను వేయాలి. రొట్టె లోపలి వరకు సమానంగా ఉడకడం కోసం ఫోర్క్ లేదా గరిటెతో రొట్టెపై అక్కడక్కడా చిన్న రంధ్రాలు చేయాలి. ఆ రంధ్రాల్లో మరియు రొట్టె అంచుల వెంట కాస్త నూనె వేయడం వల్ల వేడి లోపలికి వెళ్లి రొట్టె అద్భుతంగా కాలుతుంది. మూతపెట్టి మీడియం మంటపై రెండు నిమిషాలు కాలనిచ్చి, రంగు మారాక రెండో వైపుకు తిప్పి మరో నిమిషం కాల్చి ప్లేట్లోకి తీసుకోవాలి. అంతే, నోరూరించే హెల్దీ వెజిటబుల్ రాగి రొట్టెలు సిద్ధం! వీటికి ఎలాంటి కూరలు లేదా చట్నీలు లేకపోయినా.. క్యారెట్, ఉల్లిపాయ, జీలకర్ర రుచులతో నేరుగానే ఎంతో కమ్మగా ఉంటాయి