అన్నం పూర్తిగా మానేస్తే ఏమవుతుంది?: మన శరీరానికి అవసరమైన తక్షణ శక్తిని అందించడంలో బియ్యం ప్రధాన పాత్ర పోషిస్తుంది. అన్నాన్ని ఉన్నపలంగా ఆహారం నుంచి తప్పించడం వల్ల శరీరంలో పలు మార్పులు, సమస్యలు ఎదురవుతాయి. బియ్యంలో ఉండే కార్బోహైడ్రేట్లు శరీరానికి శక్తినిస్తాయి. వీటిని పూర్తిగా నిలిపివేస్తే తలనొప్పి, కళ్లు తిరగడం, నిరంతరం అలసటగా అనిపించడం వంటి సంకేతాలు కనిపిస్తాయి.
బియ్యంలో కేవలం కార్బోహైడ్రేట్లే కాకుండా బి-విటమిన్లు, మెగ్నీషియం, ఐరన్ వంటి ముఖ్యమైన సూక్ష్మ పోషకాలు కూడా ఉంటాయి. అన్నం మానేయడం వల్ల ఈ పోషకాల లోపం ఏర్పడుతుంది. సంప్రదాయంగా తినే ఆహారాన్ని హఠాత్తుగా ఆపేయడం వల్ల మలబద్ధకం లేదా జీర్ణక్రియలో అసమతుల్యత ఏర్పడే అవకాశం ఉంది.
తెల్ల బియ్యానికి బదులుగా పాలిష్ పట్టని బ్రౌన్ రైస్ లేదా సింగిల్ పాలిష్ బియ్యాన్ని ఎంచుకోవడం మంచిది. వీటిలో పీచు పదార్థం ఎక్కువగా ఉండి జీర్ణక్రియను నెమ్మదింపజేస్తుంది. జొన్నలు, రాగులు, సజ్జలు, కొర్రలు వంటి చిరుధాన్యాలను ఆహారంలో భాగం చేసుకోవడం ద్వారా రక్తంలో చక్కెర స్థాయిలు అదుపులో ఉండటమే కాకుండా బరువు కూడా సులభంగా తగ్గుతారు.
నిపుణులు సూచించే సరైన విధానం ఏమిటి?: బరువు తగ్గడానికి ఆహారం తినడం మానడం కాకుండా, సరైన పద్ధతిలో తినడం నేర్చుకోవాలని నిపుణులు చెబుతున్నారు. అన్నాన్ని పూర్తిగా మానాల్సిన పనిలేదు. ప్లేట్లో అన్నం పరిమాణాన్ని తగ్గించి, దానికి రెట్టింపు స్థాయిలో ఆకుకూరలు, కూరగాయలు, పప్పు ధాన్యాలు, ప్రొటీన్ కోసం గ్రుడ్లు, పన్నీర్, చికెన్ మొదలైనవి ఉండేలా చూసుకోవాలి.
బరువు తగ్గడం అనేది ఒక రోజులో జరిగే ప్రక్రియ కాదు. ఆహారాన్ని మానేయడం తాత్కాలికంగా బరువు తగ్గించినా, తిరిగి సాధారణ ఆహారం తిన్నప్పుడు బరువు రెట్టింపు అయ్యే ప్రమాదం ఉంది. కాబట్టి సమతుల్యాహారం, రోజూ క్రమం తప్పకుండా వ్యాయామం చేయడమే బరువు తగ్గడానికి శాశ్వత, ఆరోగ్యకరమైన మార్గం.