స్వార్థపరులు ఎప్పుడూ తమ ప్రయోజనాలకే ప్రాధాన్యత ఇస్తారు. వారిని మార్చడం మన వల్ల కాదు, కానీ మనల్ని మనం రక్షించుకోవడం మన చేతుల్లోనే ఉంది. గొడవ పడకుండా వారి నుండి దూరం కావడానికి ఇవి ఫాలో అవ్వండి.
పరిమితులు..
స్వార్థపరులైన స్నేహితులు తమ పని వెంటనే కావాలని ఆశిస్తారు. వారు మెసేజ్ చేయగానే లేదా ఫోన్ చేయగానే వెంటనే స్పందించడం మానేయండి. ఆ స్పందన సమయాన్ని క్రమంగా గంటలకు, ఆపై రోజులకు పెంచండి. దీనివల్ల మీరు వారికి అన్నివేళలా అందుబాటులో ఉండరనే సందేశం ఒక్క మాట కూడా చెప్పకుండానే వారికి చేరుతుంది. అలాగే, వారు మిమ్మల్ని ఇబ్బంది పెట్టే సహాయం కోరినప్పుడు మొహమాటం లేకుండా ‘వద్దు’ (No) అని చెప్పడం నేర్చుకోండి. సుదీర్ఘమైన వివరణలు ఇవ్వకండి, ఎందుకంటే వివరణ ఇవ్వడం అంటే మీరు వారితో వాదించడానికి అవకాశం ఇవ్వడమే.
వ్యక్తిగత రహస్యాల నియంత్రణ..
స్వార్థపరులు తరచు మీ బలహీనతలను తెలుసుకుని, వాటిని తమకు అనుకూలంగా వాడుకుంటారు. అందుకే మీ జీవితంలోని ముఖ్యమైన విషయాలను లేదా రహస్యాలను వారితో పంచుకోవడం పూర్తిగా ఆపేయండి. మీ వల్ల వారికి ఎటువంటి ప్రయోజనం లేదా సమాచారం అందనప్పుడు, వారు సహజంగానే మరొకరిని వెతుక్కుంటారు. ఒకవేళ వారిని పూర్తిగా విస్మరించడం సాధ్యం కాకపోతే, వారిని ఒంటరిగా కలవకుండా ఒక గుంపులో కలవండి. దీనివల్ల వారి వ్యక్తిగత ప్రభావం మీపై తక్కువగా ఉంటుంది.
పని ఒత్తిడిని ప్రదర్శించడం
వారు మిమ్మల్ని కలవాలని కోరినప్పుడు లేదా ఏదైనా ప్లాన్ చేసినప్పుడు, మీరు చాలా బిజీగా ఉన్నట్లు తెలియజేయండి. ఆఫీసు పని అని లేదా కుటుంబంతో గడుపుతున్నానని చెప్పడం ద్వారా వారిని సున్నితంగా దూరం పెట్టవచ్చు. మీరు పదేపదే బిజీగా ఉన్నామని చెబుతుంటే, వారు మీ నుండి ప్రయోజనం పొందడం కష్టమని గ్రహించి వెనక్కి తగ్గుతారు.
ఒక బంధం నుండి తప్పుకోవడం అనేది కొన్నిసార్లు మోసంలా అనిపించవచ్చు, కానీ మీ మనశ్శాంతి కంటే ఏదీ ముఖ్యం కాదు. స్వార్థపరులైన స్నేహితులు మీ శక్తిని, సమయాన్ని వృథా చేస్తారు. వారితో గొడవ పడకుండా మౌనంగా దూరం జరగడం అనేది మీ పట్ల మీకు ఉన్న ఆత్మప్రేమను సూచిస్తుంది. మీ చుట్టూ ఎప్పుడూ మిమ్మల్ని గౌరవించే, ప్రోత్సహించే వ్యక్తులు ఉండేలా చూసుకోండి. అప్పుడే మీ జీవితం ప్రశాంతంగా, ఆనందంగా ఉంటుంది. నకిలీ స్నేహాల బరువును మోయడం కంటే, ఒక్కరిగానైనా ప్రశాంతంగా ఉండటం మేలు. పైన పేర్కొన్న చిట్కాలు పాటిస్తూ మీ మానసిక ఆరోగ్యాన్ని కాపాడుకోండి.
