ప్రతి ఏడాది జూలై 22న దేశంలో నేషనల్ ఫ్లాగ్ డేను జరుపుకుంటాం. భారత జాతీయ పతాకాన్ని అధికారికంగా ఆమోదించిన చారిత్రక రోజును గుర్తు చేసుకునేందుకు ఈ రోజు చరిత్రలో నిలిచిపోయింది. దేశ స్వాతంత్ర్య పోరాటానికి ప్రతీకగా నిలిచిన త్రివర్ణ పతాకం వెనుక ఉన్న చరిత్ర, త్యాగాలు, దేశభక్తి భావాన్ని ప్రతి భారతీయుడికి గుర్తు చేయడం ఈ రోజు ప్రధాన ఉద్దేశ్యం. 1947 జూలై 22న రాజ్యాంగ సభ (Constituent Assembly) భారత జాతీయ పతాకాన్ని అధికారికంగా ఆమోదించింది. స్వాతంత్ర్యం ప్రకటించబడటానికి కొన్ని వారాల ముందు తీసుకున్న ఈ కీలక నిర్ణయం భారత చరిత్రలో ఒక మైలురాయిగా నిలిచింది. ఆ తర్వాత 1947 ఆగస్టు 15న దేశానికి స్వాతంత్ర్యం లభించిన సందర్భంగా ఇదే త్రివర్ణ పతాకం తొలిసారి స్వతంత్ర భారతదేశ జాతీయ జెండాగా ఎగురవేయబడింది.
భారత జాతీయ పతాక రూపకల్పనను స్వాతంత్ర్య సమరయోధుడు పింగళి వెంకయ్య రూపొందించారు. ఒక తెలుగు వ్యక్తి దేశానికి జాతీయ జెండా అందించడం నిజంగా తెలుగువాళ్లందరికీ గర్వకారణం. భారతీయులుగా మనమంతా ఎప్పుడూ గర్వపడుతూనే ఉంటాం.. దాంతో పాటు ఇది కూడా మన కీర్తిలో ప్రముఖ భాగంగా చెప్పుకోవచ్చు. అయితే పింగళి వెంకయ్య రూపొందించిన నమూనాలో పలు మార్పులు చేసిన అనంతరం ప్రస్తుత త్రివర్ణ పతాకాన్ని రాజ్యాంగ సభ ఆమోదించింది. పై భాగంలో కాషాయం, మధ్యలో తెలుపు, కింద భాగంలో ఆకుపచ్చ రంగులతో కూడిన ఈ పతాకం మధ్యలో నీలిరంగు అశోక చక్రం ఉంటుంది. ఈ చక్రంలో 24 ఆకులు (స్పోక్స్) ఉంటాయి.
మూడు రంగులకు అర్థం..
జాతీయ పతాకంలోని ప్రతి రంగుకు ప్రత్యేకమైన అర్థం ఉంది. కాషాయం రంగు ధైర్యం, త్యాగం, నాయకత్వాన్ని సూచిస్తుంది. తెలుపు రంగు శాంతి, సత్యం, పారదర్శకతకు ప్రతీక. ఆకుపచ్చ రంగు అభివృద్ధి, సస్యశ్యామలత్వం, ప్రకృతితో అనుబంధాన్ని తెలియజేస్తుంది. మధ్యలోని అశోక చక్రం ధర్మం, న్యాయం, నిరంతర ప్రగతికి ప్రతీకగా భావిస్తారు. ఈ విలువలను ప్రతి పౌరుడు గౌరవించాలని జాతీయ పతాకం సందేశం ఇస్తుంది.
జాతీయ పతాకం వినియోగానికి సంబంధించి భారత ప్రభుత్వం ఫ్లాగ్ కోడ్ ఆఫ్ ఇండియా పేరుతో ప్రత్యేక నిబంధనలను అమలు చేస్తోంది. ఈ నిబంధనల ప్రకారం జాతీయ పతాకాన్ని గౌరవప్రదంగా ఉపయోగించాలి. దానిని నేలపై పడేయడం, దెబ్బతిన్న స్థితిలో ప్రదర్శించడం లేదా అవమానకరంగా వినియోగించడం చట్టరీత్యా నేరంగా పరిగణించబడుతుంది. ఇటీవల హర్ ఘర్ తిరంగా వంటి కార్యక్రమాల ద్వారా ప్రతి ఇంటిపై జాతీయ పతాకాన్ని ఎగురవేయాలని కేంద్ర ప్రభుత్వం ప్రజలను ప్రోత్సహిస్తోంది.
జూలై 22 కేవలం ఒక తేదీ మాత్రమే కాదు. భారతదేశ ఐక్యత, సమైక్యత, స్వాతంత్ర్య పోరాట స్ఫూర్తిని గుర్తు చేసే చారిత్రక రోజు. దేశం కోసం ప్రాణత్యాగం చేసిన స్వాతంత్ర్య సమరయోధుల త్యాగాలను స్మరించుకుంటూ, జాతీయ పతాక గౌరవాన్ని కాపాడటం ప్రతి భారతీయుడి బాధ్యత అనే సందేశాన్ని ఈ రోజు మరోసారి గుర్తు చేస్తుంది.
