IPL 2026 Flop Players: క్రికెట్లో ఎంతటి దిగ్గజ ఆటగాడైనా ఫామ్ లేకపోతే మైదానంలో నిలదొక్కుకోవడం కష్టమని ఐపీఎల్ 2026 మరోసారి నిరూపిస్తోంది. ఈ సీజన్లో ఇప్పటివరకు జరిగిన మ్యాచ్లను విశ్లేషిస్తే నికోలస్ పూరన్, కెమెరాన్ గ్రీన్, ట్రావిస్ హెడ్ వంటి విధ్వంసకర ఆటగాళ్లు పరుగుల కోసం చెమటోడుస్తున్నారు. తమను నమ్మి భారీ వేలం ధర చెల్లించిన యాజమాన్యాలకు వీరు చుక్కలు చూపిస్తున్నారు. ముఖ్యంగా కోల్కతా నైట్ రైడర్స్ పరిస్థితి అత్యంత దారుణంగా తయారైంది.
1. కెమెరాన్ గ్రీన్ (కోల్కతా నైట్ రైడర్స్ – రూ. 25.20 కోట్లు): ఈ సీజన్లో అత్యంత ఖరీదైన ఆటగాళ్లలో ఒకరైన ఆస్ట్రేలియా ఆల్ రౌండర్ కెమెరాన్ గ్రీన్, కోల్కతా జట్టును నిలువునా ముంచేస్తున్నాడు. రూ. 25.20 కోట్లు వెచ్చించి కొనుగోలు చేసిన గ్రీన్, ఇప్పటివరకు ఆడిన 5 మ్యాచ్ల్లో కేవలం 14 సగటుతో 56 పరుగులు మాత్రమే చేశాడు. అటు బౌలింగ్లోనూ ఏమాత్రం ప్రభావం చూపలేకపోతున్నాడు. గ్రీన్ వైఫల్యంతో కోల్కతా జట్టు పాయింట్ల పట్టికలో ఆఖరి స్థానంలో నిలిచింది. తుది జట్టు నుంచి తీసేయలేక, అలాగని ఆడించలేక కేకేఆర్ సతమతమవుతోంది. కాగా, నిన్న గుజరాత్ జట్టుతో జరిగిన మ్యాచ్లో79 పరుగులతో కీలక ఇన్నింగ్స్ ఆడి ఫాంలోకి వచ్చాడు. కానీ మిగతా కేకేఆర్ బ్యాటర్లు విఫలం కావడంతో ఓటమి తప్పలేదు.
2. నికోలస్ పూరన్ (లక్నో సూపర్ జెయింట్స్ – రూ. 21 కోట్లు): కరీబియన్ పవర్ హిట్టర్ నికోలస్ పూరన్ కోసం లక్నో జట్టు ఏకంగా 21 కోట్ల రూపాయలు వెచ్చించింది. మైదానంలో సిక్సర్ల వర్షం కురిపిస్తాడని ఆశించిన అభిమానులకు నిరాశే మిగిలింది. బ్యాటింగ్ క్రమంలో జరుగుతున్న మార్పుల వల్ల తన లయను కోల్పోయిన పూరన్, 5 మ్యాచ్ల్లో కేవలం 42 పరుగులు మాత్రమే చేశాడు. సగటు కేవలం 8.40గా ఉండటం లక్నో విజయావకాశాలను దెబ్బతీస్తోంది. ఈ పేలవ ఫామ్ కారణంగా లక్నో ఇప్పటికే మూడు మ్యాచ్ల్లో పరాజయం పాలైంది.
3. ట్రావిస్ హెడ్ (సన్రైజర్స్ హైదరాబాద్ – రూ. 14 కోట్లు): సన్రైజర్స్ హైదరాబాద్ విధ్వంసకర ఓపెనర్ ట్రావిస్ హెడ్ కూడా ఆశించిన స్థాయిలో రాణించడం లేదు. రూ. 14 కోట్లు వెచ్చించి రిటైన్ చేసుకున్న ఈ స్టార్ బ్యాటర్, 5 మ్యాచ్ల్లో 120 పరుగులు చేశాడు. స్ట్రైక్ రేట్ పరవాలేదనిపించినా, జట్టుకు కావాల్సిన మెరుపు ఆరంభాలను అందించడంలో హెడ్ విఫలమవుతున్నాడు. దీని ప్రభావం హైదరాబాద్ ఫలితాలపై స్పష్టంగా కనిపిస్తోంది.
ఈ ముగ్గురు ఆటగాళ్ల వైఫల్యం ఐపీఎల్ చరిత్రలో వేలం వ్యూహాలపై మరోసారి చర్చకు దారితీసింది. భారీ ధర చెల్లించినంత మాత్రాన విజయాలు వరించవని, మైదానంలో ప్రదర్శన మాత్రమే ముఖ్యమని ఈ సీజన్ నిరూపిస్తోంది. రానున్న మ్యాచ్ల్లోనైనా వీరు పుంజుకుంటారో లేదో వేచి చూడాలి.
మరిన్ని క్రీడా వార్తల కోసం ఇక్కడ క్లిక్ చేయండి..
