కర్నూలు జిల్లా ఎమ్మిగనూరులో చోటుచేసుకున్న ఈ ఘటన ప్రస్తుతం అందరి దృష్టిని ఆకర్షిస్తోంది. మూడు రోజుల పాటు ఇంట్లో గణపతిని ప్రతిష్టించి భక్తిశ్రద్ధలతో పూజలు చేసిన మూడేళ్ల బాలుడు.. నిమజ్జనం తర్వాత తన గణపతి కనిపించకపోవడంతో కన్నీళ్లు పెట్టుకున్నాడు. వినాయక చవితి అంటే పూజలు, నైవేద్యాలు, భక్తి మాత్రమే కాదు.. చిన్నారులకు గణపతితో ఓ ప్రత్యేకమైన అనుబంధం కూడా ఉంటుంది. అలాంటి అనుబంధమే ఎమ్మిగనూరుకు చెందిన మూడేళ్ల బాలుడు ఆర్యన్ విషయంలో కనిపించింది.
మూడు రోజుల పాటు ఎంతో ముద్దుగా ఇంట్లోనే గణపతి విగ్రహాన్ని ప్రతిష్టించి పూజలు చేశాడు ఆర్యన్. ప్రతిరోజూ గణపతిని చూస్తూ.. పూజల్లో పాల్గొంటూ ఎంతో ఆనందంగా గడిపాడు. కుటుంబ సభ్యులతో కలిసి భక్తిశ్రద్ధలతో వినాయకుడిని ఆరాధించాడు. అయితే మూడు రోజుల తర్వాత గణపతి నిమజ్జనం సమయం వచ్చింది. కుటుంబ సభ్యులతో కలిసి ఆర్యన్ కూడా నిమజ్జన కార్యక్రమంలో పాల్గొన్నాడు. నిమజ్జనం పూర్తయ్యే వరకు అంతా సాధారణంగానే ఉంది. కానీ గణపతి విగ్రహాన్ని నిమజ్జనం చేసిన తర్వాత చిన్నారి ఒక్కసారిగా భావోద్వేగానికి గురయ్యాడు.
“మళ్లీ నా గణపతి కావాలి.. నా గణపతి కావాలి” అంటూ కన్నీళ్లు పెట్టుకున్నాడు. కుటుంబ సభ్యులు ఎంతగా ఓదార్చినా.. ఎంత చెప్పినా ఆర్యన్ మాత్రం తన గణపతి కావాలంటూ ఏడుస్తూనే ఉన్నాడు.
మూడు రోజులుగా తనతో ఉన్న గణపతి ఇక కనిపించడని అర్థం చేసుకున్న చిన్నారి మనసు తట్టుకోలేకపోయింది. గణపతితో ఏర్పడిన ఆ చిన్నారి అనుబంధాన్ని చూసి అక్కడున్న వారంతా భావోద్వేగానికి గురయ్యారు.
చిన్నారులకు దేవుడిపై ఉండే స్వచ్ఛమైన ప్రేమ, అనుబంధం ఎంత బలంగా ఉంటుందో ఆర్యన్ కన్నీళ్లు చూపించాయి. భక్తికి వయసుతో సంబంధం లేదని.. మనస్ఫూర్తిగా దేవుడిని ప్రేమిస్తే ఆ అనుబంధం ఎంత ప్రత్యేకంగా ఉంటుందో ఈ చిన్నారి ఘటన మరోసారి గుర్తుచేసింది.
మూడు రోజుల పాటు పూజలు అందుకున్న గణపతి నిమజ్జనమయ్యాడు. కానీ ఆ చిన్నారి మనసులో గణపతిపై ఏర్పడిన ప్రేమ, అనుబంధం మాత్రం అలాగే ఉండిపోయింది.