ఉత్తరప్రదేశ్ పర్యటనలో ఉన్న ప్రధానమంత్రి నరేంద్ర మోదీ రెండో రోజు అత్యంత బిజీ షెడ్యూల్తో గడుపుతున్నారు. ఆధ్యాత్మిక రాజధాని వారణాసిలో దైవ దర్శనంతో ప్రారంభమైన ఆయన పర్యటన, రాష్ట్ర ఆర్థిక ముఖచిత్రాన్ని మార్చే గంగా ఎక్స్ప్రెస్వే ప్రారంభోత్సవం వరకు సాగనుంది.
బుధవారం (ఏప్రిల్ 29) ఉదయం 8 గంటలకే బరేకా గెస్ట్ హౌస్ నుంచి ప్రధాని మోదీ రోడ్డు మార్గంలో బయలుదేరారు. గెస్ట్ హౌస్ నుండి ఆలయం వరకు ఉన్న 12 కిలోమీటర్ల మార్గం పొడవునా పండుగ వాతావరణం నెలకొంది. బీజేపీ కార్యకర్తలు, స్థానిక ప్రజలు భారీగా తరలివచ్చి పూల వర్షం కురిపిస్తూ తమ ‘ఎంపీ’కి ఘనస్వాగతం పలికారు. ప్రధాని కచారి, చౌకాఘాట్, లహురాబీర్ మీదుగా ప్రయాణించి శ్రీ కాశీ విశ్వనాథ ఆలయానికి చేరుకున్నారు. అక్కడ ఆయన స్వామివారికి ప్రత్యేక పూజలు నిర్వహించి, మహిళల, ప్రజల ఆశీస్సులు తీసుకున్నారు. అనంతరం బాబత్పూర్ విమానాశ్రయం నుండి హర్దోయ్కు బయలుదేరారు.
హర్దోయ్ జిల్లా మల్లావన్లోని గంగా ఎక్స్ప్రెస్వేపై ఏర్పాటు చేసిన ప్రత్యేక హెలిప్యాడ్లో ప్రధాని దిగనున్నారు. సుమారు 36,230 కోట్ల రూపాయల భారీ వ్యయంతో నిర్మించిన 594 కిలోమీటర్ల పొడవైన ఈ ‘గ్రీన్ఫీల్డ్ ఎక్స్ప్రెస్వే’ను ఆయన జాతికి అంకితం చేయనున్నారు.
గంగా ఎక్స్ప్రెస్వే ముఖ్య విశేషాలు:
కనెక్టివిటీ: ఈ రహదారి మీరట్ను ప్రయాగ్రాజ్తో అనుసంధానిస్తుంది. దీనివల్ల ప్రయాణ సమయం గణనీయంగా తగ్గి, దాదాపు 6 గంటల్లోనే గమ్యస్థానానికి చేరుకోవచ్చు.
ప్రాంతీయ అభివృద్ధి: మీరట్, బులంద్షహర్, హాపూర్, అమ్రోహా, సంభాల్, బదౌన్, షాజహాన్పూర్, హర్దోయ్, ఉన్నావ్, రాయ్బరేలి, ప్రతాప్గఢ్, ప్రయాగ్రాజ్ వంటి 12 జిల్లాల గుండా ఈ రహదారి వెళ్తుంది.
ఎయిర్ స్ట్రిప్: అత్యవసర సమయాల్లో యుద్ధ విమానాలు దిగేందుకు వీలుగా షాజహాన్పూర్ జిల్లాలో 3.5 కిలోమీటర్ల పొడవైన ఎయిర్ స్ట్రిప్ను నిర్మించారు.
ఉపాధి అవకాశాలు: ఈ కారిడార్ వెంబడి సుమారు 2,635 హెక్టార్లలో పారిశ్రామిక, లాజిస్టిక్ పార్కులను అభివృద్ధి చేయనున్నారు. ఇది స్థానిక యువతకు ఉపాధి అవకాశాలను కల్పిస్తుంది.
అనంతరం హర్దోయ్లోని బండిపూర్ కట్ సమీపంలో జరిగే భారీ బహిరంగ సభలో ప్రధాని మోదీ ప్రసంగిస్తారు. ఈ కార్యక్రమంలో ముఖ్యమంత్రి యోగి ఆదిత్యనాథ్తో పాటు ఇద్దరు ఉప ముఖ్యమంత్రులు పాల్గొననున్నారు. ప్రధాని పర్యటన దృష్ట్యా వారణాసి నుంచి హర్దోయ్ వరకు కట్టుదిట్టమైన భద్రతా ఏర్పాట్లు చేశారు. ఎన్ఎస్జి (NSG) కమాండోలు, స్థానిక పోలీసులు నిరంతరం నిఘా ఉంచారు.
నేటి నుంచి ఈ ఎక్స్ప్రెస్వే సాధారణ ప్రజలకు అందుబాటులోకి రానుంది. బైక్లకు కిలోమీటరుకు టోల్ ధరలను కూడా ప్రభుత్వం ఇప్పటికే ప్రకటించింది. తూర్పు, పశ్చిమ యూపీలను కలిపే ఈ రహదారి రాష్ట్ర అభివృద్ధిలో మైలురాయిగా నిలవనుంది.
మరిన్ని జాతీయ వార్తల కోసం ఇక్కడ క్లిక్ చేయండి…
