భారతీయ చలనచిత్ర పరిశ్రమలో దర్శకుల ప్రతిభకు బాక్సాఫీస్ వసూళ్లే గీతరాళ్లుగా మారుతుంటాయి. తాజాగా బాలీవుడ్ ప్రముఖ డైరెక్టర్ నితీశ్ తివారీ భారతీయ సినీ చరిత్రలో ఎవరూ సాధించని అరుదైన ఘనతను సొంతం చేసుకున్నారు. ఆయన దర్శకత్వంలో తెరకెక్కిన అత్యంత ప్రతిష్టాత్మక పౌరాణిక చిత్రం ‘రామాయణం’ బాక్సాఫీస్ వద్ద సంచలన వసూళ్లతో దూసుకుపోతోంది. ఈ సినిమా విడుదలైన కేవలం 13 రోజుల్లోనే బాక్సాఫీస్ వద్ద సంచలన రికార్డులను తిరగరాస్తూ, ప్రపంచవ్యాప్తంగా రూ. 1500 కోట్ల గ్రాస్ కలెక్షన్ల మైలురాయిని అధిగమించింది. నితీశ్ తివారీ గతంలో అమీర్ ఖాన్ ప్రధాన పాత్రలో తెరకెక్కించిన ‘దంగల్’ సినిమాతో ప్రపంచవ్యాప్తంగా బాక్సాఫీస్ వద్ద రూ. 2000 కోట్లకు పైగా వసూళ్లను సాధించి చరిత్ర సృష్టించిన విషయం తెలిసిందే. ఇప్పుడు తాజా చిత్రమైన ‘రామాయణం’తో మరోసారి బాక్సాఫీస్ వద్ద అద్భుతమైన విజయాన్ని నమోదు చేశారు. ఈ రెండు భారీ చిత్రాల ద్వారా రెండుసార్లు రూ. 1500 కోట్ల వసూళ్ల క్లబ్లో స్థానం సంపాదించిన తొలి భారతీయ దర్శకుడిగా నితీశ్ తివారీ చరిత్ర సృష్టించారు. దేశవ్యాప్తంగానే కాకుండా ఓవర్సీస్ మార్కెట్లోనూ ఈ సినిమాకు భారీ స్పందన లభిస్తుండటంతో కలెక్షన్ల సునామీ కొనసాగుతోంది.
భారతీయ ఇతిహాసమైన రామాయణాన్ని అత్యంత రిచ్ విజువల్స్, అద్భుతమైన సాంకేతిక హంగులతో తెరకెక్కించడంలో నితీశ్ తివారీ తన ప్రతిభను మరోసారి నిరూపించుకున్నారు. సినిమాలో వచ్చే ఎమోషనల్ సన్నివేశాలు, యుద్ధ ఘట్టాలు, నటీనటుల అభినయం ప్రేక్షకులను కట్టిపడేస్తున్నాయి. ముఖ్యంగా విజువల్ ఎఫెక్ట్స్ , బ్యాక్గ్రౌండ్ స్కోర్ సినిమాను మరో స్థాయికి తీసుకెళ్లాయని ప్రేక్షకులు, సినీ విశ్లేషకులు ప్రశంసిస్తున్నారు. బాక్సాఫీస్ వద్ద రోజురోజుకూ కలెక్షన్లు పెరుగుతుండటంతో టాలీవుడ్, బాలీవుడ్ వర్గాల్లో ఈ చిత్రం హాట్ టాపిక్గా మారింది. ఈ అరుదైన రికార్డు సాధించిన డైరెక్టర్ నితీశ్ తివారీకి ప్రస్తుతం సినీ ప్రముఖులు, అభిమానుల నుంచి అభినందనలు వెల్లువెత్తుతున్నాయి.
నితీశ్ తివారీ విషయానికి వస్తే.. మధ్యప్రదేశ్లోని ఇటార్సీలో జన్మించిన నితీశ్ తివారీ, ప్రతిష్టాత్మక ఐఐటీ బాంబే నుండి మెటలర్జికల్ ఇంజనీరింగ్లో పట్టా పొందారు. సినిమాల్లోకి రాకముందు ఆయన కార్పొరేట్ అడ్వర్టైజింగ్ రంగంలో (లియో బర్నెట్ ఇండియా సంస్థలో) క్రియేటివ్ డైరెక్టర్గా పనిచేశారు. 2011లో వికాస్ బహల్తో కలిసి దర్శకత్వం వహించిన ‘చిల్లర్ పార్టీ’ సినిమాతో దర్శకుడిగా పరిచయమయ్యారు. ఈ సినిమాకు ఉత్తమ బాలల చిత్రం , ఉత్తమ స్క్రీన్ ప్లే విభాగాల్లో జాతీయ అవార్డులు లభించాయి. ఆ తర్వాత అమితాబ్ బచ్చన్ ప్రధాన పాత్రలో ‘భూత్నాథ్ రిటర్న్స్’ (2014) తెరకెక్కించి విజయం సాధించారు. 2016లో అమీర్ ఖాన్ హీరోగా నితీశ్ తివారీ తెరకెక్కించిన ‘దంగల్’ భారతీయ సినీ చరిత్రలో ఆల్-టైమ్ బ్లాక్బస్టర్గా నిలిచింది. రెజ్లర్ మహావీర్ సింగ్ ఫోగట్ జీవిత కథ ఆధారంగా వచ్చిన ఈ చిత్రం ప్రపంచవ్యాప్తంగా రూ. 2,000 కోట్లకు పైగా వసూళ్లు రాబట్టి, అత్యధిక కలెక్షన్లు సాధించిన భారతీయ చిత్రంగా చరిత్ర సృష్టించింది. 2019లో సుశాంత్ సింగ్ రాజ్పుత్, శ్రద్ధా కపూర్ జంటగా ఆయన రూపొందించిన ‘ఛిఛోరే’ సినిమా కూడా సూపర్ హిట్ అయింది. ఈ చిత్రానికి ఉత్తమ హిందీ చిత్రంగా జాతీయ అవార్డు దక్కింది. ఆ తర్వాత వరుణ్ ధావన్, జాన్వీ కపూర్లతో ‘బవాల్’ (2023) చిత్రాన్ని తెరకెక్కించారు. ఇక ఇప్పుడు రామాయణం సినిమాతో మరో రికార్డ్ అందుకున్నారు.
ఎక్కువ మంది చదివినవి : Cinema OTT: ఏం ట్విస్టులు రా బాబూ.. ఓటీటీలో దుమ్మురేపుతున్న క్రైమ్ థ్రిల్లర్ వెబ్ సిరీస్.. ట్రెండింగ్లో నంబర్ వన్..
ఎక్కువ మంది చదివినవి : ఏముంటది భయ్యా ఈ సాంగ్.. చిరంజీవి, విజయశాంతి కాంబో.. థియేటర్లను ఓ ఊపు ఊపేసింది..