నేటి కాలంలో ఏ చిన్న సమస్య వచ్చినా మనం ముందుగా ఆశ్రయించేది సోషల్ మీడియాను. ముఖ్యంగా ప్రేమ, పెళ్లి, బంధాల విషయంలో ఇన్స్టాగ్రామ్ లేదా టిక్టాక్ వంటి ప్లాట్ఫారమ్లలో వచ్చే సలహాలు యువతను విపరీతంగా ఆకర్షిస్తున్నాయి. “నెవర్ సెటిల్,” “ఇఫ్ దే వాంటెడ్.. దే వుడ్” వంటి సాధికారికంగా అనిపించే నినాదాలు వినడానికి బాగున్నప్పటికీ, అవి వాస్తవ జీవితానికి ఎంతవరకు సరిపోతాయనేది ఇప్పుడు చర్చనీయాంశంగా మారింది. ఇటీవల ప్రముఖ లైసెన్స్డ్ థెరపిస్ట్ నాడియా అద్దేసి చేసిన ఒక పోస్ట్ ఇప్పుడు వైరల్ అవుతోంది. వైరల్ అయ్యే ప్రతి సలహా నిజం కాదని, అవి మన అందమైన బంధాలలో అనవసరమైన గందరగోళాన్ని, అభద్రతను సృష్టిస్తున్నాయని ఆమె హెచ్చరిస్తున్నారు.
అపోహలు – వాస్తవాలు
సోషల్ మీడియాలో వినబడే కొన్ని ప్రముఖ అపోహల గురించి నిపుణులు క్లారిటీ ఇస్తున్నారు:
- “అవసరమైతే వారే చేస్తారు” - భాగస్వామి మన మనసును చదివేయాలని అనుకోవడం పొరపాటు. ప్రేమించినంత మాత్రాన మన అవసరాలు వారికి అప్రమేయంగా తెలియవు. మనం ఏమనుకుంటున్నామో స్పష్టంగా కమ్యూనికేట్ చేయాలి. చెప్పిన తర్వాత వారు ఎంతవరకు స్పందిస్తున్నారు అనేది ముఖ్యం.
- “ఎవరి కోసం మారకూడదు”- బంధం అనేది ఇద్దరు వ్యక్తుల ఎదుగుదల మీద ఆధారపడి ఉంటుంది. మనలో ఉండే చెడు అలవాట్లను మార్చుకోకుండా, భాగస్వామి మాత్రం మారాలని కోరుకోవడం సరైంది కాదు. ఆరోగ్యకరమైన మార్పు బంధాన్ని బలోపేతం చేస్తుంది.
- “ఆరోగ్యకరమైన బంధం ఎప్పుడూ కష్టంగా ఉండదు”- ఇది ఒక పెద్ద అబద్ధం. ఇద్దరు వేర్వేరు వ్యక్తులు కలిసి జీవితాన్ని నిర్మించుకునేటప్పుడు ఒడిదుడుకులు రావడం సహజం. కష్టాలు వచ్చాయంటే బంధం బాలేదని అర్థం కాదు, అది కేవలం జీవితంలోని ఒక దశ మాత్రమే.
పరిపూర్ణత కోసం వెతకడం..
“నెవర్ సెటిల్” అనే మాటను చాలామంది తప్పుగా అర్థం చేసుకుంటున్నారు. ప్రపంచంలో ఏ మనిషీ సంపూర్ణుడు కాదు. ఇంటర్నెట్ నేర్పిన ‘పర్ఫెక్ట్ లవ్’ కోసం వెతుకుతూ, ఎదురుగా ఉన్న స్వచ్ఛమైన ప్రేమను వదులుకోవడం విజ్ఞత అనిపించుకోదు. ఇద్దరు అసంపూర్ణ వ్యక్తులు ఒకరినొకరు అర్థం చేసుకుంటూ కలిసి ప్రయాణించడమే అసలైన ప్రేమ. అలాగే భాగస్వామి మనకు సర్వస్వమై ఉండాలని కోరుకోవడం వల్ల మనకంటూ ఉన్న వ్యక్తిత్వాన్ని కోల్పోయే ప్రమాదం ఉంది. స్నేహాలు, సమాజం ఇంకా వ్యక్తిగత గుర్తింపు ఉన్నప్పుడే బంధం ఆరోగ్యంగా ఉంటుంది.
“విధి ఉంటే కలిసి ఉంటారు” అనే మాటపై ఆధారపడి బంధాన్ని వదిలేయడం సరికాదు. కేవలం ప్రేమ మాత్రమే ఒక బంధాన్ని కాపాడలేదు. దానికి కమ్యూనికేషన్, మానసిక పరిపక్వత ఇంకా ఒకరినొకరు క్షమించుకునే గుణం తోడవ్వాలి. సోషల్ మీడియా సలహాలను గుడ్డిగా నమ్మకుండా, మీ బంధంలోని ప్రత్యేకతను గుర్తించి మెలగడం ఉత్తమం. వైరల్ స్లోగన్స్ కంటే మీ మధ్య ఉండే అవగాహనే మీ బంధానికి శ్రీరామరక్ష.
