రోజంతటికీ ఒకేసారి వ్యాయామం చేసే బదులు, రోజంతటా చిన్న చిన్న విరామాలలో శారీరక శ్రమ చేయడమే ఈ పద్ధతి ఉద్దేశ్యం. ఒక 45 నిమిషాల జిమ్ సెషన్ కోసం వేచి చూసే బదులు, రోజూ చేసే పనుల మధ్యలోనే ఒకటి లేదా రెండు నిమిషాల పాటు వేగంగా నడవడం, మెట్లు ఎక్కడం లేదా స్ట్రెచింగ్ చేయడం వంటివి చేయాలి. ఫిట్నెస్ అనేది మన దైనందిన జీవితంలో ఒక భాగంగా ఉండాలి తప్ప అది ఒక భారంగా అనిపించకూడదు. పక్కా ప్రణాళిక లేకపోయినా పర్వాలేదు, రోజంతా మీరు ఎంత ఎక్కువగా శారీరక కదలికలు కలిగి ఉంటే మీ ఆరోగ్యానికి అంత మేలు జరుగుతుంది. మీ దినచర్యలో ఒక్క చిన్న అడుగుతోనే మీ ఫిట్నెస్ ప్రయాణాన్ని ప్రారంభించండి.
జీవనశైలిలో చిన్న మార్పులు
వ్యాయామం కోసం ప్రత్యేకంగా సమయం కేటాయించలేని వారికి ‘విల్పా’ (Vigorous Intermittent Lifestyle Physical Activity) అనే కాన్సెప్ట్ బాగా ఉపయోగపడుతుంది. అంటే మనం రోజువారీ చేసే పనులనే కాస్త వేగంగా చేయడం ద్వారా వ్యాయామంగా మార్చుకోవచ్చు. ఉదాహరణకు, లిఫ్ట్ బదులు మెట్లు ఎక్కడం, బస్సు లేదా మెట్రో దిగేటప్పుడు ఒక స్టాప్ ముందే దిగి వేగంగా నడవడం, ఇంటి పనులను చురుగ్గా చేయడం వంటివి ఇందులో భాగం. ఈ చిన్నపాటి ప్రయత్నాలు గుండె ఆరోగ్యాన్ని మెరుగుపరచడమే కాకుండా, రక్తంలో చక్కెర స్థాయిలను నియంత్రించడంలో మరియు స్టామినాను పెంచడంలో సహాయపడతాయి.
గంటల తరబడి కూర్చోవడం..
రోజూ 30 నిమిషాలు జిమ్ చేసినప్పటికీ, మిగిలిన రోజంతా ఒకే చోట కూర్చుని ఉండటం వల్ల ఆ వ్యాయామం తాలూకు పూర్తి ప్రయోజనం లభించదు. ఎక్కువసేపు కదలకుండా కూర్చోవడం వల్ల మెటబాలిజం నెమ్మదిస్తుంది. అందుకే ఆఫీసులో పనిచేసేవారు ప్రతి గంటకు ఒకసారి లేచి నిలబడటం, లంచ్ బ్రేక్లో చిన్న నడక సాగించడం, ఫోన్ మాట్లాడేటప్పుడు నడుస్తూ మాట్లాడటం వంటి అలవాట్లు చేసుకోవాలి. ఈ చిన్న మార్పులు దీర్ఘకాలంలో మనల్ని ఎంతో ఆరోగ్యంగా ఉంచుతాయి. ముఖ్యంగా జిమ్కి వెళ్లడానికి భయపడే వారికి, వృద్ధులకు ఈ ‘ఎక్సర్సైజ్ స్నాకింగ్’ ఒక గొప్ప వరం. దీనికి ఎటువంటి ఖర్చు, పరికరాలు అవసరం లేదు.
