ఉప్మా అనేది భారతదేశంలో చాలా ఇష్టమైన, మార్నింగ్ బ్రేక్ఫాస్ట్గా విస్తృతంగా చేసుకునే వంటకం.. చాలా మంది ఇళ్లల్లో ఎక్కువగా దీన్నే వండుతారు.. ఇది కేవలం ఐదు నిమిషాల్లోనే సిద్ధం చేసుకోవచ్చు. కానీ చాలామందికి ఉప్మా ఎప్పుడూ ఒకే రుచితో, మంచి టెక్స్చర్తో రాదు. అయితే.. ఈ ప్రత్యేకమైన రెసిపీతో మీరు ప్రతిసారీ కమ్మని, మెత్తటి ఉప్మాను తయారుచేసుకోవచ్చు.. ఉప్మా అంటే ఇష్టపడని వారైనా లేదా సరిగా చేయడం రాకపోయినా, ఈ పద్ధతిని ఒకసారి ప్రయత్నించండి. మీరు దీన్ని మళ్లీ మళ్లీ చేయాలని కోరుకుంటారు.
తయారీకి కావాల్సిన పదార్థాలు:
- బొంబాయి రవ్వ: 1 కప్పు
- నూనె: 1 టీస్పూన్ (రవ్వ వేయించడానికి)
- నెయ్యి: 2 టేబుల్స్పూన్లు (లేదా నూనె)
- వేరుశనగలు: 2 టీస్పూన్లు
- శనగపప్పు: 1 టీస్పూన్
- మినప్పప్పు: 1 టీస్పూన్
- ఆవాలు: అర టీస్పూన్
- జీడిపప్పు: 8-10
- ఎండుమిర్చి: 1
- పచ్చిమిర్చి: 2 (కట్ చేసినవి)
- ఉల్లిపాయ: 1 (సన్నగా తరిగినది)
- అల్లం తరుగు: కొద్దిగా
- కరివేపాకు: కొద్దిగా
- నీరు: 2.5 నుండి 3 కప్పులు
- ఉప్పు: రుచికి సరిపడా
తయారీ విధానం:
రవ్వను వేయించడం: ముందుగా, ఒక పాన్లో ఒక టీస్పూన్ నూనె వేసి వేడి చేయండి. అందులో ఒక కప్పు బొంబాయి రవ్వను వేసి, మీడియం ఫ్లేమ్లో నాలుగు నుండి ఐదు నిమిషాల పాటు రంగు మారకుండా బాగా వేయించండి. రవ్వను బాగా వేయించడం వల్ల ఉప్మాకు అద్భుతమైన రుచి వస్తుంది. రవ్వ మంచి సువాసన వచ్చే వరకు వేయించిన తర్వాత, ఒక ప్లేట్లోకి తీసుకుని పక్కన పెట్టుకోండి.
పోపు సిద్ధం చేయడం: అదే పాన్లో రెండు టేబుల్స్పూన్ల నెయ్యిని వేడి చేయండి. నెయ్యి ఇష్టం లేని వారు నూనెను కూడా ఉపయోగించవచ్చు, అయితే నెయ్యి ఉప్మాకు మంచి రుచిని ఇస్తుంది. నెయ్యి వేడయ్యాక, రెండు టీస్పూన్ల వేరుశనగలు, ఒక టీస్పూన్ శనగపప్పు, ఒక టీస్పూన్ మినప్పప్పు, అర టీస్పూన్ ఆవాలు వేసి దోరగా వేయించండి.
కూరగాయలు చేర్చడం: పోపు పదార్థాలు కాస్త వేగాక, ఎనిమిది నుండి పది జీడిపప్పులను వేసి వేయించండి. ఇప్పుడు ఇందులోనే ఒక ఎండుమిరపకాయను ముక్కలుగా చేసి, కట్ చేసిన రెండు పచ్చిమిర్చి ముక్కలను, సన్నగా తరిగిన ఉల్లిపాయలను, కొద్దిగా అల్లం తరుగును వేసి ఫ్రై చేయండి. మీరు కావాలనుకుంటే క్యారెట్, క్యాప్సికం, టమాటా ముక్కలను కూడా ఈ దశలో చేర్చుకోవచ్చు. ఉల్లిపాయలు మరీ రంగు మారేంత వరకు వేయించాల్సిన అవసరం లేదు, కొద్దిగా మెత్తబడితే సరిపోతుంది.
నీరు – ఉప్పు చేర్చడం: అన్నీ బాగా వేగిన తర్వాత, కొద్దిగా కరివేపాకు వేసి ఫ్రై చేయండి. ఇప్పుడు, మనం తీసుకున్న ఒక కప్పు బొంబాయి రవ్వకు రెండున్నర కప్పుల నీటిని చేర్చండి. ఉప్మా మరింత సాఫ్ట్గా, మెత్తగా కావాలంటే మూడు కప్పుల వరకు నీటిని ఉపయోగించవచ్చు. చివరిగా, రుచికి సరిపడా ఉప్పును వేసి నీటిని మరిగించండి.
రవ్వను కలపడం – ఉడికించడం: నీరు మరిగించడం మొదలుపెట్టగానే, పక్కన వేయించి పెట్టుకున్న రవ్వను నెమ్మదిగా కొద్దికొద్దిగా వేస్తూ, మరో చేత్తో ఉండలు కట్టకుండా బాగా కలపండి. రవ్వను సమానంగా కలిపిన తర్వాత, పాన్పై మూతపెట్టి, ఒకటి లేదా రెండు నిమిషాల పాటు తక్కువ మంటపై ఉడికించండి.
రెండు నిమిషాల తర్వాత, మూత తీసి చూడండి. మీ ఉప్మా మెత్తగా, మంచి టెక్స్చర్తో సిద్ధంగా ఉంటుంది. ఈ వేడివేడి ఉప్మాను టమాటా పచ్చడి లేదా ఆవకాయ పచ్చడితో కలిపి తింటే రుచి అద్భుతంగా ఉంటుంది. ఈ సరళమైన రెసిపీని ప్రయత్నించి, రుచికరమైన ఉప్మాను ఆస్వాదించండి.