సాధారణంగా మనుషుల కాళ్లకు ఐదు వేళ్లు ఉంటాయి. కొంతమందికి ఆరు కూడా ఉంటాయి. కానీ, ఓ స్టార్ క్రికెటర్ కాలికి పాపం రెండంటే రెండు వేళ్లు మాత్రమే ఉన్నాయి. అయినా కూడా అతను ఆగలేదు. ప్రపంచ క్రికెట్ అభిమానులను తన రెండు వేళ్ల కాలితోనే అలరించాడు. పైగా మనకు వరల్డ్ కప్ కలను కూడా ఒకసారి దూరం చేశాడు. అతను మరెవరో కాదు న్యూజిలాండ్ మాజీ స్టార్ ఓపెనర్ మార్టిన్ గప్టిల్. ఈ పేరు వినగానే విధ్వంసక బ్యాటింగ్, వేగవంతమైన ఫీల్డింగ్ గుర్తుకు వస్తాయి. అయితే చాలా మందికి తెలియని విషయం ఏమిటంటే.. గప్టిల్ ఎడమ కాలికి మూడు వేళ్లు లేవు. 13 ఏళ్ల వయసులో జరిగిన ఓ ప్రమాదంలో ఆయన ఎడమ కాలి బొటనవేలు పక్కనున్న మూడు వేళ్లను కోల్పోయాడు. ఫోర్క్లిఫ్ట్ ప్రమాదంలో కాలు తీవ్రంగా గాయపడటంతో వైద్యులు ఆ వేళ్లను తొలగించాల్సి వచ్చింది. ఆ ప్రమాదం తర్వాత ఆయన జీవితమే మారిపోయింది.
‘టూ టోస్’ అనే ముద్దుపేరు ఎలా వచ్చింది?
ప్రమాదం తర్వాత గప్టిల్ ఎడమ కాలిలో కేవలం బొటనవేలు, చిటికెన వేలు మాత్రమే మిగిలాయి. అందుకే ఆయనను సహచర ఆటగాళ్లు సరదాగా టూ టోస్ అని పిలుస్తుంటారు. గప్టిల్ కూడా ఈ విషయాన్ని ఎప్పుడూ దాచిపెట్టలేదు. తన లోపాన్ని బలహీనతగా కాకుండా ప్రత్యేక గుర్తింపుగా మార్చుకున్నాడు. కాలికి మూడు వేళ్లు లేకపోవడం వల్ల సాధారణంగా బ్యాలెన్స్, పరుగెత్తడం, దిశ మార్చుకోవడం కష్టమవుతుంది. కానీ గప్టిల్ ప్రత్యేక శిక్షణ, ఫిజియోథెరపీ, కఠినమైన ఫిట్నెస్తో ఆ లోపాన్ని అధిగమించాడు. శరీర బరువును సమంగా పంపిణీ చేసుకునే విధంగా తన పరుగెత్తే శైలిని మార్చుకున్నాడు. ప్రత్యేకంగా రూపొందించిన షూలు, నిరంతర వ్యాయామంతో మళ్లీ పూర్తి స్థాయి ఫిట్నెస్ను సాధించాడు. అందుకే బ్యాటింగ్తో పాటు ఫీల్డింగ్లోనూ అత్యుత్తమ ప్రదర్శనలు చేయగలిగాడు.
ఇది కూడా చదవొచ్చు కదా: రూ.300 కోట్లను ఎడమకాలితో తన్నాడు.. ఇప్పుడు కోహ్లీ ఆర్థిక పరిస్థితి ఏంటో తెలుసా?
ప్రపంచ క్రికెట్లో గప్టిల్ రికార్డులు
మార్టిన్ గప్టిల్ న్యూజిలాండ్ తరఫున మూడు ఫార్మాట్లలోనూ అత్యంత విజయవంతమైన ఓపెనర్లలో ఒకరిగా నిలిచాడు. 2015 వన్డే ప్రపంచకప్లో వెస్టిండీస్పై అజేయంగా 237 పరుగులు చేసి ప్రపంచకప్ చరిత్రలో అత్యధిక వ్యక్తిగత స్కోరు నమోదు చేశాడు. ఈ ఇన్నింగ్స్ ఇప్పటికీ ప్రపంచకప్లో రికార్డుగానే కొనసాగుతోంది. అంతేకాదు, టీ20 అంతర్జాతీయ క్రికెట్లో కూడా వేలాది పరుగులు చేసి న్యూజిలాండ్ విజయాల్లో కీలక పాత్ర పోషించాడు.
అంగవైకల్యం కాదు.. ఆత్మవిశ్వాసమే విజయం
మార్టిన్ గప్టిల్ కథ క్రీడాకారులకే కాదు, ప్రతి ఒక్కరికీ స్ఫూర్తినిస్తుంది. శారీరక లోపం ఉన్నా పట్టుదల, క్రమశిక్షణ, ఆత్మవిశ్వాసం ఉంటే ఏ లక్ష్యాన్నైనా చేరుకోవచ్చని ఆయన నిరూపించాడు. చిన్న వయసులోనే ఎదురైన పెద్ద సవాలును అధిగమించి ప్రపంచ స్థాయి క్రికెటర్గా ఎదగడం ఆయన సంకల్పానికి నిదర్శనం. ప్రస్తుతం గప్టిల్ కథను ప్రపంచవ్యాప్తంగా కోచ్లు, క్రీడా నిపుణులు యువ ఆటగాళ్లకు ఉదాహరణగా చెబుతున్నారు. ప్రతికూల పరిస్థితులను అవకాశాలుగా మార్చుకుంటే విజయం తప్పదని ఆయన జీవితం చెబుతోంది. కాలికి మూడు వేళ్లు లేకపోయినా, ప్రపంచ క్రికెట్లో తన పేరిట ఎన్నో రికార్డులు సృష్టించిన మార్టిన్ గప్టిల్ నిజమైన ఫైటర్గా గుర్తింపు పొందాడు.
మరిన్ని క్రికెట్ వార్తల కోసం ఇక్కడ క్లిక్ చేయండి
