హైదరాబాద్: నేచురల్ స్టార్ నాని హీరోగా, శ్రీకాంత్ ఓదెల దర్శకత్వంలో తెరకెక్కిన ‘ది ప్యారడైజ్’ సినిమా విడుదలకు సిద్ధమైంది. సెప్టెంబర్ 24న ప్రపంచవ్యాప్తంగా ఈ సినిమా ప్రేక్షకుల ముందుకు రానుండగా.. అంతకంటే ఒక రోజు ముందే అంటే సెప్టెంబర్ 23న తెలంగాణలో పెయిడ్ ప్రీమియర్ షోలకు ప్రభుత్వం అనుమతి ఇచ్చింది. ఈ నేపథ్యంలో హీరో నాని చేసిన ఓ విజ్ఞప్తి ఇప్పుడు ఆసక్తికరంగా మారింది. హైదరాబాద్లోని ఆర్టీసీ క్రాస్రోడ్స్లో ప్రేక్షకుల మధ్య కూర్చొని ‘ది ప్యారడైజ్’ ప్రీమియర్ షోను వీక్షించేందుకు తనకు అనుమతి ఇవ్వాలని సీఎం రేవంత్రెడ్డిని నాని కోరారు.
ఈ మేరకు సోషల్ మీడియా వేదిక Xలో సీఎం రేవంత్రెడ్డిని ట్యాగ్ చేస్తూ నాని తన కోరికను వెల్లడించారు. సెప్టెంబర్ 23న జరిగే ప్రీమియర్ షోను అభిమానులు, సాధారణ ప్రేక్షకులతో కలిసి ఆర్టీసీ క్రాస్రోడ్స్లో కూర్చొని చూడాలని ఉందని తెలిపారు.
సినిమా విడుదల సమయంలో ప్రేక్షకులతో కలిసి థియేటర్లో సినిమా చూడటం తనకు ఎప్పుడూ ప్రత్యేకమైన అనుభూతిని ఇస్తుందని నాని పేర్కొన్నారు. ముఖ్యంగా తాము ఎంతో కష్టపడి రూపొందించిన సినిమాకు ప్రేక్షకుల నుంచి వచ్చే స్పందనను వారి మధ్యే కూర్చొని ప్రత్యక్షంగా అనుభవించడం ఎంతో సంతృప్తినిచ్చే విషయమని ఆయన అభిప్రాయపడ్డారు.
అయితే ఆర్టీసీ క్రాస్రోడ్స్లో నాని హాజరైతే అభిమానులు భారీగా తరలివచ్చే అవకాశం ఉండటంతో భద్రతా పరంగా పలు అంశాలను అధికారులు పరిగణనలోకి తీసుకోవాల్సి ఉంటుంది. ఈ విషయాన్ని దృష్టిలో ఉంచుకున్న నాని.. అవసరమైన అన్ని భద్రతా నిబంధనలు, ప్రభుత్వ ప్రోటోకాల్స్ను పూర్తిగా పాటిస్తామని స్పష్టం చేశారు. తన విజ్ఞప్తిని పరిశీలించాలని సీఎం రేవంత్రెడ్డితో పాటు తెలంగాణ సినిమాటోగ్రఫీ మంత్రి కోమటిరెడ్డి వెంకట్రెడ్డి, తెలంగాణ పోలీసులను నాని కోరారు.
ఇదిలా ఉంటే ‘ది ప్యారడైజ్’పై ఇప్పటికే భారీ అంచనాలు నెలకొన్నాయి. సెప్టెంబర్ 24న విడుదల కానున్న ఈ చిత్రానికి ముందస్తు బుకింగ్స్లోనూ మంచి స్పందన కనిపిస్తోంది. ఇండియా టుడే కథనం ప్రకారం, సెప్టెంబర్ 22 నాటికి ఈ సినిమా అడ్వాన్స్ సేల్స్ రూ.7 కోట్లకు పైగా నమోదయ్యాయి.
శ్రీకాంత్ ఓదెల దర్శకత్వం వహించిన ఈ చిత్రానికి అనిరుధ్ రవిచందర్ సంగీతం అందించారు. నాని, కాయదు లోహర్ ప్రధాన పాత్రల్లో నటించగా.. పలువురు ప్రముఖ నటులు కీలక పాత్రల్లో కనిపించనున్నారు. ఇప్పుడు నాని కోరినట్లుగా ఆర్టీసీ క్రాస్రోడ్స్లో ప్రేక్షకుల మధ్య ఆయన సినిమా చూస్తారా? అనే అంశంపై అభిమానుల్లో ఆసక్తి నెలకొంది.
Hon’ble Chief Minister Shri @revanth_anumula Garu, Hon’ble Minister of Cinematography Shri @KomatireddyKVR Garu & the respected officials of @TelanganaCOPs.
This is a request from a fan of cinema and, more importantly, someone who has enjoyed cinema at its very best from a very…
— Nani (@NameisNani) September 22, 2026