ఇంటి మూలల్లో సాలీడు గూళ్లు ఉంటే చూడటానికి అసహ్యంగా ఉండటమే కాకుండా ఆరోగ్యానికి కూడా మంచిది కాదు. ఇంటిని ఎంత శుభ్రం చేసినా వారం తిరగకముందే గోడల మూలల్లో మళ్లీ సాలీడు గూళ్లు కనిపిస్తుంటాయి. వీటిని కేవలం చీపురుతో దులపడమే కాకుండా, అవి మళ్లీ రాకుండా చేసేందుకు కొన్ని సులభమైన ఇంటి చిట్కాలు పాటించడం అవసరం. వీటిని తొలగించడానికి ఇంట్లోనే సులభంగా నేచురల్ రిపెల్లెంట్ స్ప్రే తయారు చేసుకోవచ్చు. అదేలాగో ఇక్కడ చూద్దాం..
వెనిగర్, నీటి మిశ్రమం: సాలీళ్లకు వెనిగర్ వాసన అంటే అస్సలు పడదు. సమాన పరిమాణంలో నీరు, వైట్ వెనిగర్ను కలిపి ఒక స్ప్రే బాటిల్లో నింపండి. సాలీడు గూళ్లు ఎక్కువగా ఉండే మూలల్లో, కిటికీల సందుల్లో ఈ మిశ్రమాన్ని స్ప్రే చేయండి. దీనివల్ల సాలీళ్లు ఆ ప్రదేశం నుండి దూరంగా వెళ్లిపోతాయి.
పుదీనా నూనె (Peppermint Oil): సాలీళ్లను తరిమికొట్టడానికి పుదీనా నూనె అత్యంత ప్రభావవంతమైన మార్గం. ఒక కప్పు నీటిలో 10-15 చుక్కల పెప్పర్మెంట్ ఆయిల్ కలిపి స్ప్రే చేయండి. ఇది సాలీళ్లను దూరం చేయడమే కాకుండా ఇల్లంతా మంచి సువాసన వచ్చేలా చేస్తుంది.
ఇవి కూడా చదవండి
నిమ్మరసం లేదా నారింజ తొక్కలు: సాలీళ్లకు సిట్రస్ (పులుపు) వాసన అంటే గిట్టదు. నిమ్మరసం కలిపిన నీటిని స్ప్రే చేయడం లేదా కిటికీల దగ్గర నారింజ తొక్కలను ఉంచడం వల్ల అవి లోపలికి రావు.
ఇంటి శుభ్రత, నిర్వహణ: ఇంట్లో అనవసరమైన పేపర్లు, డబ్బాలు, పాత బట్టలు ఉంటే సాలీళ్లు అక్కడే స్థావరం ఏర్పరుచుకుంటాయి. సాలీళ్లు చీకటి ప్రదేశాల్లో ఉండటానికి ఇష్టపడతాయి. కాబట్టి గదుల్లో తగినంత వెలుతురు ఉండేలా చూసుకోండి. కిటికీలు, తలుపుల దగ్గర ఉన్న చిన్న చిన్న రంధ్రాలను సీల్ చేయడం వల్ల అవి బయట నుండి లోపలికి రాకుండా అడ్డుకోవచ్చు.
మార్కెట్లో దొరికే విషపూరితమైన కెమికల్స్ వాడటం కంటే ఇలాంటి సహజ పద్ధతులు పాటించడం పిల్లలకు, పెంపుడు జంతువులకు కూడా సురక్షితం. ఈ చిట్కాలను వారానికి ఒకసారి పాటిస్తే మీ ఇల్లు సాలీడు గూళ్లు లేకుండా ఎప్పుడూ శుభ్రంగా ఉంటుంది.
మరిన్ని లైఫ్ స్టైల్ న్యూస్ కోసం క్లిక్ చేయండి..
