కావాల్సిన పదార్థాలు
అరటి తొక్కలు – 1 కప్పు
జీలకర్ర – 1 టీస్పూన్
ఎండు మిరపకాయలు లేదా పచ్చిమిర్చి – 3 నుండి 4
వెల్లుల్లి రెబ్బలు – 4
అల్లం ముక్క – చిన్నది
పసుపు – 1 టీస్పూన్
నిమ్మరసం – 1 టీస్పూన్
ఉప్పు – రుచికి తగినంత
నూనె – అర టీస్పూన్
తయారీ విధానం
ముందుగా అరటి తొక్కలను శుభ్రంగా కడిగి చిన్న ముక్కలుగా కోసుకోవాలి. వీటిని ఒక కప్పు నీటిలో వేసి ప్రెషర్ కుక్కర్లో ఒకటి లేదా రెండు విజిల్స్ వచ్చే వరకు మెత్తగా ఉడికించాలి. ఆ తర్వాత ఒక పాన్ తీసుకుని అందులో కొద్దిగా నూనె వేసి జీలకర్ర, పచ్చిమిర్చి, అల్లం వెల్లుల్లి వేసి పచ్చి వాసన పోయే వరకు వేయించాలి. ఇప్పుడు మిక్సీ జార్లో ఉడికించిన అరటి తొక్కలు, వేయించిన మసాలాలు, పసుపు, ఉప్పు కొద్దిగా నిమ్మరసం వేసి మెత్తగా గ్రైండ్ చేసుకోవాలి. అవసరమైతే కొద్దిగా నీరు కలుపుకుని చిక్కటి మిశ్రమంగా చేసుకోవాలి.
పోషక విలువలు
ఈ చట్నీ కారం, ఉప్పు పులుపుల కలయికతో చాలా అద్భుతమైన రుచిని ఇస్తుంది. దీనిని అన్నంతోనే కాకుండా దోసె, ఇడ్లీ చపాతీలతో కూడా ఆస్వాదించవచ్చు. అరటి తొక్కలలో ఉండే యాంటీఆక్సిడెంట్లు జీర్ణక్రియకు సహాయపడటమే కాకుండా శరీరానికి మంచి శక్తిని అందిస్తాయి. ఇంట్లో వృథాగా పారేసే తొక్కలను ఇలా పోషకాలు ఉన్న ఆహారంగా మార్చుకోవడం ఆరోగ్యానికి పర్యావరణానికి కూడా మేలు చేస్తుంది.
వచ్చేసారి అరటిపండు తిన్నప్పుడు తొక్కలను పారేయకుండా ఈ రుచికరమైన చట్నీని ప్రయత్నించండి. ఇది మీ డైట్లో ఒక కొత్త రుచిని చేర్చడమే కాకుండా శరీరానికి అవసరమైన పొటాషియం, మెగ్నీషియంను అందిస్తుంది.
గమనిక: ఈ రెసిపీ సాధారణంగా ప్రాచుర్యంలో ఉన్న పద్ధతులు నిపుణుల సూచనల ఆధారంగా రూపొందించబడింది. చట్నీ కోసం తాజాగా ఉన్న అరటి తొక్కలను మాత్రమే ఎంచుకోండి. నల్లగా మారిన లేదా పాడైపోయిన తొక్కలను వాడకండి. రసాయనాల ప్రభావం ఉండకూడదంటే తొక్కలను ఉడికించే ముందు ఉప్పు నీటితో బాగా కడగడం మంచిది. మీ రుచికి అనుగుణంగా కారం లేదా పులుపును మార్చుకోవచ్చు.
