నెలల తరబడి మూలలో పడి ఉన్న ఎయిర్ కూలర్ను నేరుగా ఆన్ చేయడం వల్ల అలర్జీలు, శ్వాసకోశ సమస్యలు వచ్చే ప్రమాదం ఉంది. ముందుగా కూలర్ ప్లగ్ను తొలగించి, దానిని ఆరుబయట ప్రదేశానికి మార్చడం ద్వారా క్లీనింగ్ ప్రక్రియను సులభం చేసుకోవచ్చు. ఇది కాస్త ఛాలెంజింగ్గా అనిపించినా కొన్ని టిప్స్తో కూలర్లను శుభ్రం చేసుకోవచ్చు.
ఫిల్టర్లు, ప్యాడ్ల శుభ్రత…
ముందుగా కూలర్ మూడు వైపులా ఉన్న కిటికీలను తెరిచి, లోపల ఉన్న దుమ్మును చీపురుతో ఊడ్చాలి. ఆ తర్వాత తేనెపట్టు ఆకారంలో ఉండే కూలింగ్ ప్యాడ్లను జాగ్రత్తగా బయటకు తీయాలి. వీటిని సబ్బు నీటితో రెండు వైపులా శుభ్రంగా రుద్ది, దుమ్ము, బూజు తొలగేలా కడిగి నీడలో ఆరబెట్టాలి. ఫిల్టర్లను మరింత తాజాగా చేయడానికి ఒక గిన్నెలో నీటిని తీసుకుని, అందులో రెండు కప్పుల వెనిగర్ కలిపి, ఫిల్టర్లను 10 నిమిషాల పాటు నానబెట్టాలి. దీనివల్ల బ్యాక్టీరియా తొలగిపోయి, గాలి తాజాగా ఉంటుంది.
ట్యాంక్, మోటార్ నిర్వహణ..
కూలింగ్ ట్యాంక్ను సబ్బు నీటితో స్పాంజ్ లేదా స్క్రబ్బర్ ఉపయోగించి సున్నితంగా రుద్ది శుభ్రం చేయాలి. ట్యాంక్ను కడిగిన తర్వాత నీరు పూర్తిగా పోయేలా తలక్రిందులుగా తిప్పాలి. ఇక ఫ్యాన్, మోటారు భాగాలపై ఉన్న దుమ్మును పొడి గుడ్డతో క్షుణ్ణంగా తుడవాలి. యంత్రంలోని కీళ్ళు, స్క్రూలు, తిరిగే భాగాలకు లూబ్రికేటింగ్ ఆయిల్ లేదా కొబ్బరి నూనెను రాయాలి. దీనివల్ల ఫ్యాన్ తుప్పు పట్టకుండా నిశ్శబ్దంగా, వేగంగా పనిచేస్తుంది.
మెరుగైన కూలింగ్ కోసం..
ఈ విధంగా కూలర్ను పూర్తిగా శుభ్రం చేయడం వల్ల దాని సామర్థ్యం గణనీయంగా పెరుగుతుంది. ఫిల్టర్లు శుభ్రంగా ఉంటే గాలి బాగా చల్లబడుతుంది, ఫ్యాన్ వేగం పెరుగుతుంది. ఇలా క్లీన్ చేసిన కూలర్ వేసవిలో మంచి ఉపశమనాన్ని ఇవ్వడమే కాకుండా, మీ కుటుంబ ఆరోగ్యానికి కూడా సురక్షితంగా ఉంటుంది.
గమనిక
ఈ సమాచారం కేవలం అవగాహన కోసం మాత్రమే. ఎయిర్ కూలర్ క్లీనింగ్ చేసేటప్పుడు విద్యుత్ ప్రమాదాలు జరగకుండా ప్లగ్ తీసివేసి ఉండాలని, ఎలక్ట్రికల్ భాగాలలో నీరు చేరకుండా జాగ్రత్త వహించాలని గమనించగలరు. ఏదైనా సాంకేతిక సమస్య ఉంటే నిపుణులైన మెకానిక్ సలహా తీసుకోవడం ఉత్తమం.
