నిత్యం బస్సుల రాకపోకలు.. ప్రయాణికుల హడావుడి.. వాహనాల రణగొణ ధ్వనులు.. ఇదీ సాధారణంగా బస్టాండ్లో కనిపించే దృశ్యం. కానీ మహబూబ్నగర్ బస్టాండ్లో మాత్రం సాయంత్రం అయ్యిందంటే చాలు వీటన్నింటికీ భిన్నంగా ఓ అందమైన ప్రకృతి దృశ్యం కనిపిస్తుంది. వందలాది రామచిలుకలు ఒకేచోట చేరి చేసే సందడి చూపరులను కట్టిపడేస్తోంది. పచ్చని చెట్లపై ఆకు పచ్చని చిలుకల కొలువు. వాటి కిలకిలరావాలతో బస్టాండ్ ఆవరణే ఓ పక్షుల విడిదిగా మారిపోయింది.