మన దేశంలో ఏడాది పొడవునా అతి తక్కువ ధరకు, సమృద్ధిగా లభించే అద్భుతమైన పండు అరటిపండు. కొందరు దీనిని ఉదయం అల్పాహారంలో తీసుకుంటే, మరికొందరు జిమ్ లేదా వ్యాయామానికి ముందు లేదా తర్వాత తక్షణ శక్తి కోసం తింటుంటారు. అయితే సోషల్ మీడియాలో అరటిపండ్ల వినియోగానికి సంబంధించి రకరకాల అపోహలు చక్కర్లు కొడుతున్నాయి. ముఖ్యంగా ఫలానా సమయానికే తినాలని, రాత్రి పూట తింటే విషంతో సమానమని వచ్చే వార్తల్లో శాస్త్రీయ ఆధారాలు ఎంతవరకు ఉన్నాయనేది పరిశీలిస్తే ఆసక్తికర వాస్తవాలు వెలుగుచూశాయి.
న్యూట్రిషన్ సైన్స్ పరిశోధనల ప్రకారం.. అరటిపండు తినడానికి ప్రత్యేకంగా నిర్ధారిత సమయమంటూ ఏదీ లేదు. ఒక వ్యక్తి జీవనశైలి, శారీరక శ్రమ, శరీర తత్వాన్ని బట్టి ఎప్పుడైనా దీనిని తీసుకోవచ్చు. యూఎస్ నేషనల్ ఇన్స్టిట్యూట్స్ ఆఫ్ హెల్త్ గణాంకాల ప్రకారం.. ఒక సాధారణ పరిమాణంలో ఉండే అరటిపండు నుంచి సుమారు 422 మిల్లీగ్రాముల పొటాషియంతో పాటు 0.4 మిల్లీగ్రాముల విటమిన్ బి6 లభిస్తుంది. శరీరంలో ద్రవాల సమతుల్యతను కాపాడటానికి, కండరాలు, నరాల పనితీరు సజావుగా సాగడానికి పొటాషియం తోడ్పడితే; ప్రొటీన్ మెటబాలిజంను వేగవంతం చేయడంలో విటమిన్ బి6 కీలక పాత్ర పోషిస్తుంది. ఇందులోని సులభతర కార్బోహైడ్రేట్లు శరీరానికి తక్షణ శక్తిని అందిస్తాయి కాబట్టే అథ్లెట్లు, వ్యాయామశాలకు వెళ్లేవారు దీనిని ఉత్తమ ప్రీ, పోస్ట్ వర్కవుట్ స్నాక్గా భావిస్తారు.
ఉదయం వేళ ఖాళీ కడుపుతో అరటిపండు తినడం అందరి శరీర తత్వాలకు సరిపడకపోవచ్చు. కొంతమందిలో ఇది పొట్ట ఉబ్బరం లేదా బరువుగా అనిపించే అసౌకర్యాన్ని కలిగిస్తుంది. అలాంటి సమస్య ఉన్నవారు అరటిపండును నేరుగా కాకుండా ఓట్స్, బ్రెడ్, లేదా పెరుగుతో కలిపి తీసుకోవడం ఉత్తమం. ఇక అరటిపండు, పాలు కలిపి తీసుకునే బనానా షేక్ల వల్ల సమస్యలు వస్తాయన్న వాదనలోనూ నిజం లేదు, లాక్టోస్ సమస్య ఉన్నవారికి పాల వల్ల గ్యాస్ వస్తుందే తప్ప, దానికి అరటిపండు కారణం కాదు. అదేవిధంగా రాత్రి వేళల్లో అరటిపండు తింటే ప్రమాదకరమన్న ప్రచారంలోనూ ఎలాంటి వాస్తవం లేదు. జీర్ణక్రియ సాధారణంగా ఉండి, ఎలాంటి అసౌకర్యం కలగనంత వరకు రాత్రిపూట కూడా దీనిని నిస్సందేహంగా తీసుకోవచ్చని పోషకాహార నిపుణులు స్పష్టం చేస్తున్నారు.
అయితే అరటిపండు ఎంతటి పోషక విలువలు కలిగి ఉన్నప్పటికీ, ఇద్దరు బాధితులు మాత్రం దీని విషయంలో అప్రమత్తంగా ఉండాలి. అందులో మొదటగా మధుమేహ వ్యాధిగ్రస్తులు.. ఎందుకంటే ఇందులోని సహజ చక్కెరలు, కార్బోహైడ్రేట్లు రక్తంలో గ్లూకోజ్ స్థాయిలను వేగంగా పెంచే అవకాశం ఉంది. ఇక రెండవదిగా కిడ్నీ సమస్యలతో బాధపడేవారు.. కిడ్నీ పనితీరు మందగించినప్పుడు రక్తంలోని అదనపు పొటాషియంను శరీరం బయటకు పంపలేకపోతుంది. ఇది గుండెపై ప్రభావం చూపే ప్రమాదం ఉంది. కాబట్టి కిడ్నీ, షుగర్ సమస్యలు ఉన్నవారు వైద్యులు నిర్ధారించిన మోతాదులోనే అరటిపండును తీసుకోవాలి. ఒకే పండు సంపూర్ణ ఆహారం కాలేదు కాబట్టి సమతుల్య పోషకాహారంలో భాగంగా అరటిపండును తీసుకున్నప్పుడే సరైన ఫలితం ఉంటుందని నిపుణులు సూచిస్తున్నారు.
(గమనిక: ఈ కథనంలో అందించిన సమాచారం కేవలం సాధారణ అవగాహన కోసం మాత్రమే. ఆరోగ్య సమస్యలు, దీర్ఘకాలిక వ్యాధులు ఉన్నవారు ఆహారపు అలవాట్లలో ఎలాంటి మార్పులు చేయాలన్నా లేదా ఏవైనా పదార్థాలు నిలిపివేయాలన్నా తప్పనిసరిగా సంబంధిత వైద్య నిపుణులను సంప్రదించడం మంచిది.)