ఆధునిక కాలంలో స్మార్ట్ఫోన్లు, సోషల్ మీడియా పుణ్యమా అని నిత్యం అనేక ఆసక్తికరమైన సంఘటనలకు సంబంధించిన వీడియోలు ఇంటర్నెట్లో హల్చల్ చేస్తుంటాయి. అయితే కొన్ని వీడియోలు మాత్రం కేవలం వినోదాన్ని మాత్రమే కాకుండా గుండెలను పిండేసేంత భావోద్వేగాన్ని, సమాజానికి మంచి సందేశాన్ని అందిస్తాయి. సరిగ్గా అలాంటి ఒక అరుదైన, ఆనందకరమైన ఘటనకు సంబంధించిన వీడియో ప్రస్తుతం నెట్టింట వైరల్గా మారింది. సమాజంలో ఇప్పటికీ కొందరు ఆడపిల్ల పుడితే భారంగా భావించే పరిస్థితులు ఉన్నప్పటికీ.. మరోవైపు ఆడపిల్ల రాకను పండగలా జరుపుకునే కుటుంబాలు కూడా ఉన్నాయి. సరిగ్గా 52 ఏళ్ల సుదీర్ఘ నిరీక్షణ తర్వాత తమ కుటుంబంలోకి ఒక ఆడబిడ్డ జన్మించడంతో ఆ కుటుంబ సభ్యులు చేసుకున్న సంబరాలు అందరి హృదయాలను గెలుచుకుంటున్నాయి.
ఉత్కంఠ.. ఆపై కన్నీళ్లతో ఆనందం..
ఇంటర్నెట్లో వైరల్ అవుతున్న ఆ వీడియోలో.. ఒక ఆసుపత్రిలోని ఆపరేషన్ థియేటర్ బయట కుటుంబ సభ్యులంతా ఎంతో ఆత్రుతగా, ఉత్కంఠగా ఎదురుచూస్తున్నారు. డాక్టర్ బిడ్డను చేతుల్లోకి తీసుకుని బయటకు వచ్చి ‘‘మీకు ఆడపిల్ల పుట్టింది’’ అని చెప్పగానే అక్కడున్న వారి ఆనందానికి హద్దులు లేకుండాపోయాయి. ఒక్కసారిగా కుటుంబ సభ్యులంతా సంతోషంతో ఉప్పొంగిపోయారు. కొందరు ఆనంద భాష్పాలు రాల్చగా, మరికొందరు ఒకరినొకరు కౌగిలించుకుని సంబరాలు చేసుకున్నారు.
52 ఏళ్ల సుదీర్ఘ నిరీక్షణ..
ఆ కుటుంబంలో గత 52 సంవత్సరాలుగా కేవలం మగపిల్లలే జన్మించారట. అర శతాబ్దానికి పైగా ఆ ఇంట్లో ఒక ఆడపిల్ల అడుగుపెట్టలేదు. దాంతో తమ వంశంలోకి లక్ష్మీదేవి లాంటి ఆడబిడ్డ ఎప్పుడు వస్తుందా అని ఆ కుటుంబం దశాబ్దాలుగా ఎదురుచూస్తోంది. చివరకు 52 ఏళ్ల తర్వాత ఒక బుజ్జి పాపాయి జన్మించడంతో వారి ఆనందం రెట్టింపైంది. ఈ భావోద్వేగ సన్నివేశమంతా కెమెరాలో రికార్డ్ అవ్వగా.. సోషల్ మీడియాలో పోస్ట్ చేసిన కొద్ది సమయానికే లక్షలాది వ్యూస్, వేలాది లైక్లతో ట్రెండింగ్లోకి వచ్చింది. ఆడపిల్ల అంటే భారం కాదు, సాక్షాత్తూ మహాలక్ష్మి అని నిరూపించిన ఈ కుటుంబాన్ని నెటిజన్లు ప్రశంసలతో ముంచెత్తుతున్నారు.
