ఇండియన్ ప్రిమియర్ లీగ్ 19వ సీజన్లో భాగంగా జరిగిన 56వ లీగ్ మ్యాచ్లో సన్రైజర్స్ హైదరాబాద్ ఘోర పరాజయం పాలైంది. గుజరాత్ టైటాన్స్ నిర్దేశించిన లక్ష్యాన్ని ఛేదించడంలో హైదరాబాద్ బ్యాటర్లు పూర్తిగా విఫలమయ్యారు. ఈ క్రమంలో కేవలం 15 ఓవర్లలోనే ప్యాకప్ చెప్పేశారు. అహ్మదాబాద్లోని నరేంద్ర మోదీ స్టేడియం వేదికగా జరిగిన ఈ పోరులో గుజరాత్ బౌలర్లు నిప్పులు చెరిగే బంతులతో హైదరాబాద్ బ్యాటింగ్ వెన్నెముకను విరిచారు.
గుజరాత్ టైటాన్స్ గౌరవప్రదమైన స్కోరు..
తొలుత బ్యాటింగ్ చేసిన గుజరాత్ టైటాన్స్ నిర్ణీత 20 ఓవర్లలో 5 వికెట్ల నష్టానికి 168 పరుగులు చేసింది. సాయి సుదర్శన్ (61), వాషింగ్టన్ సుందర్ (50) మెరుపు ఇన్నింగ్స్లతో జట్టుకు పోరాడే స్కోరును అందించారు. హైదరాబాద్ బౌలర్లలో ప్రఫుల్ హింజ్ , పాట్ కమిన్స్ వికెట్లు తీసి కట్టడి చేసినప్పటికీ, చివరి ఓవర్లలో గుజరాత్ బ్యాటర్లు వేగంగా పరుగులు రాబట్టారు.
పేకమేడలా కుప్పకూలిన హైదరాబాద్ బ్యాటింగ్..
169 పరుగుల లక్ష్యంతో బరిలోకి దిగిన సన్రైజర్స్ హైదరాబాద్కు ఆరంభం నుండే చుక్కెదురైంది. ఓపెనర్లు ట్రావిస్ హెడ్, అభిషేక్ శర్మ స్వల్ప పరుగులకే అవుట్ అవ్వడంతో ఒత్తిడి మొదలైంది. గుజరాత్ పేసర్ కగిసో రబడ, రషీద్ ఖాన్ తమ పదునైన బంతులతో హైదరాబాద్ మిడిల్ ఆర్డర్ను దెబ్బతీశారు. ఒక్కొక్కరుగా బ్యాటర్లు పెవిలియన్కు క్యూ కట్టడంతో హైదరాబాద్ పరిస్థితి దారుణంగా తయారైంది.
సన్రైజర్స్ హైదరాబాద్ 11 ఓవర్లలోపే 7 వికెట్ల నష్టానికి కేవలం 60 పరుగులు మాత్రమే చేసింది. ఆ తర్వాత కూడా ఏమాత్రం ప్రభావం చూపించలేకపోయింది.
ప్లేఆఫ్స్ అవకాశాలపై ప్రభావం..
ఈ మ్యాచ్లో ఓటమితో సన్రైజర్స్ హైదరాబాద్ ప్లేఆఫ్స్ అవకాశాలు సంక్లిష్టంగా మారే ప్రమాదం ఉంది. ఇప్పటికే 14 పాయింట్లతో ఉన్న హైదరాబాద్, ఈ మ్యాచ్లో గెలిచి అగ్రస్థానానికి చేరుకోవాలని భావించింది. కానీ గుజరాత్ బౌలర్లు తమ అద్భుత ప్రదర్శనతో హైదరాబాద్ ఆశలపై నీళ్లు చల్లారు. గుజరాత్ టైటాన్స్ ఈ విజయంతో పాయింట్ల పట్టికలో తమ స్థానాన్ని మరింత మెరుగుపరుచుకుని అగ్రస్థానం చేరుకుంది.
