Hardik Pandya Captaincy News: ఐదుసార్లు ఛాంపియన్గా నిలిచిన ముంబై ఇండియన్స్ జట్టుకు 2024లో కెప్టెన్గా బాధ్యతలు చేపట్టినప్పుడు హార్దిక్ పాండ్యాకు ముందున్న సవాళ్లు ఏంటో అతనికి బాగా తెలుసు. అంతకుముందు గుజరాత్ టైటాన్స్ను 2022లో విజేతగా, 2023లో రన్నరప్గా నిలిపి తన నాయకత్వ పటిమను నిరూపించుకున్నాడు. కానీ, ముంబైకి తిరిగి వచ్చాక పరిస్థితి పూర్తిగా మారిపోయింది. 2024 సీజన్లో ముంబై పట్టికలో అట్టడుగు స్థానంలో నిలవగా, 2025లో నాలుగో స్థానానికి చేరుకుని కాస్త మెరుగుపడింది. అయితే, ప్రస్తుత 2026 సీజన్ ముంబైని మరింత సంక్షోభంలోకి నెట్టింది. ఇప్పటివరకు ఆడిన 10 మ్యాచ్ల్లో కేవలం 3 విజయాలు మాత్రమే సాధించి, ప్లేఆఫ్స్ రేసు నుంచి దాదాపు నిష్క్రమించే స్థితికి చేరుకుంది.
యాజమాన్యం స్పందన: పాండ్యాకు మద్దతు..?
‘ది ఇండియన్ ఎక్స్ప్రెస్’ నివేదిక ప్రకారం, ముంబై ఇండియన్స్ యాజమాన్యం ఇప్పటికీ హార్దిక్ పాండ్యాకే మద్దతుగా నిలుస్తోంది. జట్టు వైఫల్యానికి అతని నాయకత్వమే కారణమని వారు భావించడం లేదు. దానికి బదులుగా, ఐపీఎల్లో మారుతున్న ఆట తీరుకు (Evolving style of play) జట్టు త్వరగా అలవాటు పడలేకపోవడమే ప్రధాన కారణమని వారు విశ్లేషిస్తున్నారు. ముఖ్యంగా పవర్ ప్లేలో ఓపెనర్ల నుంచి లభించాల్సిన మెరుపు ఆరంభాలు, డెత్ ఓవర్లలో బౌలర్ల ప్రభావం తగ్గడం వంటి అంశాలే జట్టును దెబ్బతీశాయని మేనేజ్మెంట్ భావిస్తోంది.
సైమన్ డౌల్ సంచలన వ్యాఖ్యలు..
మరోవైపు, మాజీ క్రికెటర్ సైమన్ డౌల్ రాబోయే మెగా వేలం గురించి ఆసక్తికరమైన వ్యాఖ్యలు చేశారు. “వచ్చే ఏడాది మీ కెప్టెన్ ఎవరు? అనేది ముంబై ఆలోచించుకోవాలి. ఒకవేళ హార్దిక్ పాండ్యా కెప్టెన్గా కొనసాగకపోతే, అతన్ని వేలంలోకి వదిలేయడమే మంచిది. ఎందుకంటే, గత మూడు ఏళ్లుగా తను, తన జట్టు ఆశించిన స్థాయిలో రాణించలేకపోయాడు. అటువంటి వాతావరణంలో, కెప్టెన్సీ పోయిన తర్వాత అతను ఎలా ఆడతాడో చెప్పడం కష్టం” అని డౌల్ పేర్కొన్నాడు.
కెప్టెన్సీ భారం తగ్గితే పాండ్యా ఫామ్ పుంజుకుంటాడా?
కెప్టెన్సీ భారం తగ్గితే హార్దిక్ తన పాత ఫామ్ను తిరిగి సాధించగలరా? అన్న ప్రశ్నకు డౌల్ స్పందిస్తూ.. “అది అతనికి స్వేచ్ఛను ఇవ్వవచ్చు లేదా నేను విఫలమయ్యాను అనే భావనను కలిగించవచ్చు. హార్దిక్ ఫిట్గా ఉంటే ప్రపంచంలోనే అత్యుత్తమ ఆల్ రౌండర్లలో ఒకడు. అతను కెప్టెన్ కాకపోయినా, తన ఆటపై పూర్తి దృష్టి పెట్టి మళ్ళీ ‘గ్రేట్ హార్దిక్’గా నిరూపించుకోవడానికి సిద్ధంగా ఉన్నాడా లేదా అన్నదే ఇక్కడ అసలు ప్రశ్న” అని విశ్లేషించారు.
ప్రస్తుతానికి ముంబై మేనేజ్మెంట్ హార్దిక్కు అండగా ఉన్నప్పటికీ, సీజన్ ముగిశాక మెగా వేలం నేపథ్యంలో ఎలాంటి కఠిన నిర్ణయాలు తీసుకుంటారో వేచి చూడాలి.
మరిన్ని క్రీడా వార్తల కోసం ఇక్కడ క్లిక్ చేయండి..
