గ్లామర్ ప్రపంచంలో హీరోయిన్ల శరీర ఆకృతిపై ఉండే ఒత్తిడిని అధిగమించి, తనకంటూ ఒక కొత్త గుర్తింపు తెచ్చుకుంది ఒకప్పటి స్టార్ హీరోయిన్. తెల్ల జుట్టు, ప్రసవం తర్వాత పెరిగిన బరువును దాచుకోకుండా ప్రజల ముందుకు రావడం ద్వారా ఆమె ఎందరికో ఆదర్శంగా నిలిచింది. తన పాత గ్లామర్ రోజులను అస్సలు మిస్ కావడం లేదని ఆమె చాలా బోల్డ్గా వెల్లడించింది.
‘సెక్సీ’ ట్యాగ్ తెచ్చిన ఒత్తిడి
వెండితెరపై ఒక వెలుగు వెలిగిన ఈ నటి, మహిళల శరీరంలో వచ్చే మార్పులపై ఎప్పుడూ బహిరంగంగా మాట్లాడుతుంటుంది. “నాటి గ్లామరస్ రోజుల్లోకి నేను తిరిగి వెళ్లాలని అనుకోవడం లేదు. ఆ ట్యాగ్లతో వచ్చే ఒత్తిడిని తట్టుకోవడం చాలా కష్టం. ఆ గ్లామర్ ఇమేజ్ నన్ను మానసికంగా కృంగదీసింది” అని ఆమె నిజాయితీగా అంగీకరించింది. గత పది పదిహేనేళ్లతో పోలిస్తే ప్రస్తుతం చిత్ర పరిశ్రమలో చాలా మార్పులు వచ్చాయని పేర్కొంది.
ఇప్పుడు కేవలం శరీర ఆకృతికి మాత్రమే ప్రాధాన్యం ఇవ్వడం లేదని, నటన మరియు ప్రతిభకు గుర్తింపు లభిస్తోందని తెలిపింది. ప్రస్తుతం 46 ఏళ్ల వయసులో వెయిట్ ట్రైనింగ్, యోగా చేస్తూ తన జీవనశైలిని మార్చుకుంది. జనాలు తనను ఒక సాధారణ, నిజాయితీ గల మహిళగా చూస్తున్నప్పుడు చాలా గర్వంగా అనిపిస్తోందని సంతోషం వ్యక్తం చేసింది. తన సరికొత్త చిత్రం ‘ఆఖరి సవాల్’లో ఒక ప్రొఫెసర్ పాత్రను పోషిస్తున్నట్లు వెల్లడించింది.
అత్తగారితో సరదా రీల్స్
ఈ నటి తన అత్తగారు మంజ్రి వర్డేతో కలిసి చేసే ఇన్స్టాగ్రామ్ రీల్స్ సోషల్ మీడియాలో చాలా ఫేమస్. వీరిద్దరి మధ్య ఉండే కెమిస్ట్రీ చూస్తే ఎవరికైనా ముచ్చటేస్తుంది. అత్తాకోడళ్ల మధ్య ఉండే గొడవలు, డ్రామాలకు భిన్నంగా వీరి రీల్స్ చాలా సరదాగా సాగుతాయి. “మొదట్లో రీల్స్ చేయడానికి అత్తగారిని ఒప్పించాల్సి వచ్చింది. కానీ జనాలు ఆమెను ఆదరించడం చూసి ఆమె కూడా చాలా సంతోషంగా షూటింగ్లో పాల్గొంటోంది” అని తెలిపింది. భార్యగా, కోడలిగా తన పాత్రను నిజాయితీగా, సరదాగా నిర్వహిస్తానని పేర్కొంది. అయితే తన కుటుంబంలో తన పనులపై అత్యంత కఠినమైన విమర్శకుడు తన భర్త అక్షయ్ వర్డే అని నవ్వుతూ చెప్పింది.
2014లో వివాహ బంధంలోకి అడుగుపెట్టిన ఈ బ్యూటీ, 2015లో కొడుకు హన్స్, 2019లో కూతురు నైరాకు జన్మనిచ్చింది. ఎలాంటి ముసుగులు లేకుండా, సహజత్వాన్ని నమ్ముకుంటూ తన ఇన్స్టాగ్రామ్ బయోలో “మెస్సీ మామా, మామ్ ఇన్ ప్రోగ్రెస్” అని రాసుకుని నిజమైన మహిళకు నిదర్శనంగా నిలుస్తోంది.
