Gold Jewellery: ప్రపంచ వ్యాప్తంగా బంగారానికి ఎప్పుడు కూడా డిమాండే ఉంటుంది. బంగారం నగల విషయంలో చాలా జాగ్రత్తలు తీసుకోవాల్సి ఉంటుంది. లేకుంటే భారీగా నష్టపోవాల్సి ఉంటుంది. ముఖ్యంగా రాళ్లు పొదిగిన నగలు (Stone Jewellery) కొనేటప్పుడు మనం చేసే చిన్న పొరపాటు భారీ నష్టానికి దారితీయవచ్చు.
రాళ్ల నగలు ఎందుకు ఆకర్షిస్తాయి?
సాధారణంగా 22 క్యారెట్ల స్వచ్ఛమైన బంగారు నగలు కొనాలంటే ధర భారంగా మారుతోంది. ఒక చిన్న ముక్కు పుడక కనీసం 15 వేలు, చెవి దుద్దులు 30 వేల దాకా అవుతున్నాయి. ఈ క్రమంలో తక్కువ బడ్జెట్లో నగలు కావాలనుకునే వారికి నగల వ్యాపారులు ‘రాళ్లు పొదిగిన నగలను’ చూపిస్తుంటారు. ఇవి చూడటానికి చాలా అందంగా, కలర్ఫుల్గా ఉండటమే కాకుండా.. బంగారం తక్కువగా వాడటం వల్ల ధర కూడా అందుబాటులో ఉన్నట్టు అనిపిస్తుంది. కానీ, ఇక్కడే అసలు చిక్కు ఉంది.
కొనేటప్పుడు జరిగే లెక్కలు ఇవే:
మీరు రాళ్లు ఉన్న నగలు కొనేటప్పుడు బిల్లులో ఈ క్రింది అంశాలను గమనించాలి:
ఇవి కూడా చదవండి
- బంగారం బరువు: నగలోని నికర బంగారం బరువు (Net Weight) ఎంతో విడిగా చూడాలి.
- రాళ్ల ధర: రాళ్ల బరువును కూడా బంగారం ధరకే లెక్కగడుతున్నారా? లేదా విడిగా లెక్కిస్తున్నారా? అనేది స్పష్టం చేసుకోవాలి.
- మేకింగ్ ఛార్జీలు, జీఎస్టీ: బంగారం బరువుతో పాటు రాళ్ల బరువుపై కూడా మేకింగ్ ఛార్జీలు, 3% జీఎస్టీ వర్తిస్తాయి. దీనివల్ల మీరు రాళ్లకు కూడా అనవసరంగా పన్నులు చెల్లించాల్సి వస్తుంది.
ఇది కూడా చదవండి: Ceiling Fan: సీలింగ్ ఫ్యాన్ గంటకు ఎంత కరెంట్ వాడుతుందో తెలుసా? కళ్లు చెదిరే విద్యుత్ లెక్కలు!
అమ్మేటప్పుడు వచ్చే అసలు తిప్పలు:
రాళ్లు లేని 22 క్యారెట్ల నగలను తిరిగి అమ్మడం చాలా సులభం. కానీ రాళ్లు ఉన్న నగలను అమ్మేటప్పుడు మీరు భారీగా నష్టపోయే అవకాశం ఉంది.
- రాళ్ల తొలగింపు: చాలా షాపుల్లో నగను తిరిగి తీసుకునేటప్పుడు రాళ్లను తీసేసి, కేవలం బంగారం బరువుకే డబ్బులు ఇస్తారు. అంటే మీరు కొనేటప్పుడు రాళ్లకు పెట్టిన వేల రూపాయలు బూడిదలో పోసిన పన్నీరే అవుతాయి.
- తక్కువ విలువ: ఒకవేళ రాళ్లను పరిగణనలోకి తీసుకున్నా, ముత్యాలు లేదా రత్నాలకు కేవలం 70 శాతం విలువ మాత్రమే ఇస్తారు. వజ్రాలు (Diamonds) అయితే తప్ప మిగిలిన రాళ్లకు రీ-సేల్ వాల్యూ చాలా తక్కువ.
బంగారు నగలు కొనేముందు ఇవి తప్పక అడగండి:
- విడివిడి బరువు: నగలో బంగారం బరువు ఎంత? రాళ్ల బరువు ఎంత? అనేది బిల్లులో విడిగా రాయించుకోండి.
- బై-బ్యాక్ పాలసీ: భవిష్యత్తులో ఈ నగను తిరిగి మీకే అమ్మితే రాళ్లకు ఎంత విలువ ఇస్తారు? అనే విషయాన్ని ముందే అడిగి తెలుసుకోండి.
- హాల్మార్కింగ్: నగపై తప్పనిసరిగా 916 హాల్మార్క్ గుర్తు ఉందో లేదో చూసుకోండి.
- మీరు కేవలం అందం, ఆకర్షణ కోసం లేదా ఎవరికైనా గిఫ్ట్ ఇవ్వడం కోసమే నగలు కొంటుంటే రాళ్లు ఉన్నవి ఎంచుకోవచ్చు. కానీ, భవిష్యత్తులో పెట్టుబడిగా లేదా అవసరానికి అమ్ముకోవాలి అనుకుంటే మాత్రం ప్లెయిన్ గోల్డ్ (రాళ్లు లేని నగలు) కొనడమే అత్యుత్తమ నిర్ణయం.
Disclaimer: ఈ సమాచారం కేవలం మీ అవగాహన కోసం మాత్రమే. బంగారు నగలు కొనే ముందు విశ్వసనీయమైన జ్యువెలరీ షాపులను సంప్రదించి, ప్రస్తుత మార్కెట్ నిబంధనలను తనిఖీ చేసుకోగలరు.
ఇది కూడా చదవండి: Gold Jewellery: హైదరాబాద్లో బంగారం కొనాలా? తక్కువ ధరకే లభించే టాప్-3 ఏరియాలు ఇవే.. ఇక్కడ కొంటే భారీగా ఆదా!
మరిన్ని బిజినెస్ వార్తల కోసం ఇక్కడ క్లిక్ చేయండి
