అమెరికా, ఇరాన్ల మధ్య దౌత్యపరమైన, సైనికపరమైన ఉద్రిక్తతలు మరోసారి తీవ్ర స్థాయికి చేరుకున్నాయి. హోర్ముజ్ జలసంధి వేదికగా జరుగుతున్న నౌకాదళ కార్యకలాపాలు, ఆర్థిక దిగ్బంధనం, అణు కార్యక్రమంపై ఇరు దేశాలు పరస్పరం తీవ్ర ఆరోపణలు చేసుకుంటున్నాయి. వైట్ హౌస్ ప్రెస్ సెక్రటరీ కరోలిన్ లెవిట్ ఇరాన్ నౌకాదళాన్ని “సముద్రపు దొంగల ముఠా”తో పోల్చారు. మధ్యప్రాచ్యంలో ఇరాన్ కార్యకలాపాలు అత్యంత ప్రమాదకరంగా మారాయని, హోర్ముజ్ జలసంధిపై వారికి ఎలాంటి నియంత్రణ అధికారం లేదని ఆమె స్పష్టం చేశారు. అమెరికా విధించిన నావికా దిగ్బంధనం సమర్థవంతంగా అమలవుతోందని, ఇరాన్ తన పద్ధతి మార్చుకోవాలని ఆమె హెచ్చరించారు. ముఖ్యంగా, అమెరికా, దాని మిత్రదేశాలను బెదిరించేలా ఇరాన్ అణుబాంబును తయారు చేయకూడదని అధ్యక్షుడు డొనాల్డ్ ట్రంప్ స్పష్టమైన పరిమితులు విధించారని, ఇరాన్ తన వద్ద ఉన్న సుసంపన్నం చేసిన యురేనియంను వెంటనే అప్పగించాలని డిమాండ్ చేశారు.
మరోవైపు, ఇరాన్ రివల్యూషనరీ గార్డ్స్ దళాలు సముద్రంలో దూకుడును పెంచాయి. MSC ఫ్రాన్సెస్కా, ఎపామినోండాస్ అనే రెండు నౌకలను అడ్డగించి, తమ ప్రాదేశిక జలాల్లోకి తరలించాయి. వాటిలోని సరుకు, రికార్డులపై దర్యాప్తు చేస్తున్నట్లు తస్నిమ్ వార్తా సంస్థ తెలిపింది. వీటితో పాటు యూఫోరియా అనే మరో నౌకపై కాల్పులు జరిపి నిలిపివేసినట్లు నివేదికలు అందుతున్నాయి.
ఈ ఉద్రిక్తతల మధ్యే ఒక ఆసక్తికర పరిణామం చోటుచేసుకుంది. ఉరిశిక్షకు సిద్ధమైన ఎనిమిది మంది ఇరాన్ మహిళల ప్రాణాలను అధ్యక్షుడు ట్రంప్ జోక్యంతో కాపాడగలిగారు. ఆయన విజ్ఞప్తి మేరకు ఇరాన్ ఆ ఉరిశిక్షలను వాయిదా వేసింది. అలాగే, పాకిస్తాన్ ప్రధాని షాబాజ్ షరీఫ్, ఫీల్డ్ మార్షల్ అసిమ్ మునీర్ విజ్ఞప్తి మేరకు, ఇరాన్ ఒక ఐక్య ప్రతిపాదనతో ముందుకు వచ్చేందుకు వీలుగా అమెరికా తన దాడులను తాత్కాలికంగా నిలిపివేసింది.
అమెరికా చర్యలను ఇరాన్ విదేశాంగ మంత్రి అబ్బాస్ అరాఘ్చి తీవ్రంగా తప్పుబట్టారు. అమెరికా విధిస్తున్న ఓడరేవుల దిగ్బంధనం ముమ్మాటికీ యుద్ధ చర్య అని ఆయన అభివర్ణించారు. ఇది కాల్పుల విరమణ ఒప్పందాన్ని ఉల్లంఘించడమేనని ఆగ్రహం వ్యక్తం చేశారు. ఫిబ్రవరి 28న అమెరికా, ఇజ్రాయెల్ జరిపిన దాడుల తర్వాత మొదలైన ఈ పోరు, ప్రస్తుతం పశ్చిమ ఆసియాలో యుద్ధ మేఘాలను కమ్ముకునేలా చేస్తోంది. ఇరాన్ నాయకత్వం ఐక్యంగా చర్చలకు వస్తేనే దాడుల విరమణ కొనసాగుతుందని ట్రంప్ స్పష్టం చేయడంతో, ఇప్పుడు బంతి ఇరాన్ కోర్టులోనే ఉంది.
మరిన్ని అంతర్జాతీయ వార్తల కోసం ఇక్కడ క్లిక్ చేయండి..
