సైన్స్ ఫిక్షన్ సినిమాల్లో గడ్డకట్టిన మనుషులను వేల ఏళ్ల తర్వాత బతికించడం చూస్తుంటాం. కానీ ప్రకృతిలో ఇది అక్షరాలా సాధ్యమని రష్యన్ శాస్త్రవేత్తలు నిరూపించారు. సుమారు 24,000 సంవత్సరాల క్రితం, అంటే భూమిపై మంచు యుగం కొనసాగుతున్న కాలంలో నిద్రలోకి జారుకున్న ఒక చిన్న జీవి, నేడు శాస్త్రవేత్తల కృషితో మళ్లీ ప్రాణం పోసుకుంది. బ్డెల్లాయిడ్ రోటిఫర్ అనే ఈ సూక్ష్మజీవి పునరుజ్జీవనం ఇప్పుడు ప్రపంచవ్యాప్తంగా శాస్త్రవేత్తలను ఆశ్చర్యానికి గురిచేస్తోంది. ఈశాన్య సైబీరియాలోని అలజీయా నది సమీపంలో శాశ్వతంగా గడ్డకట్టిన మంచు పొరలను తవ్వినప్పుడు ఈ జీవి బయటపడింది. రేడియో కార్బన్ డేటింగ్ పద్ధతి ద్వారా పరిశీలించగా.. ఆ మంచు పొరలు 24,000 ఏళ్ల నాటివని తేలింది. ఇంత సుదీర్ఘ కాలం పాటు మంచులో కూరుకుపోయినప్పటికీ ఆ జీవి తన ఉనికిని కోల్పోకుండా ఉండటం విశేషం.
ఈ జీవి మనుగడ సాగించడానికి ముఖ్య కారణం క్రిప్టోబయోసిస్ అనే అరుదైన ప్రక్రియ. వాతావరణం కఠినంగా మారినప్పుడు ఈ జీవులు తమ శరీరంలోని జీవక్రియలను దాదాపుగా ఆపేస్తాయి. తద్వారా తీవ్రమైన చలిని, ఆహారం, ఆక్సిజన్ లేని స్థితిని కూడా తట్టుకోగలుగుతాయి. ప్రయోగశాలలో ఈ మంచును నెమ్మదిగా కరిగించగానే, ఆ రోటిఫర్ మళ్లీ సాధారణ స్థితికి చేరుకుని కదలడం ప్రారంభించింది. కేవలం ప్రాణం పోసుకోవడమే కాకుండా ఆ రోటిఫర్ తన సంతానాన్ని కూడా వృద్ధి చేయడం మొదలుపెట్టింది. పార్థెనోజెనిసిస్ అనే పద్ధతి ద్వారా మగ జీవుల అవసరం లేకుండానే ఇది పునరుత్పత్తిని కొనసాగించింది. ఇది ఆ జీవి యొక్క శారీరక దృఢత్వాన్ని, జన్యుపరమైన శక్తిని నిరూపిస్తోంది. బహుకణ జీవులు ఇంత సుదీర్ఘ కాలం నిద్రాణస్థితిలో ఉండగలవని నిరూపించిన అత్యంత బలమైన ఆధారంగా దీనిని పరిగణిస్తున్నారు.
ఈ ఆవిష్కరణ భవిష్యత్తులో క్రయోబయాలజీ రంగంలో విప్లవాత్మక మార్పులకు దారితీయవచ్చు. మనుషుల కణాలను లేదా అవయవాలను సుదీర్ఘకాలం పాటు గడ్డకట్టి భద్రపరిచే టెక్నాలజీని అభివృద్ధి చేయడానికి ఈ రోటిఫర్ల జన్యువులను శాస్త్రవేత్తలు ఇప్పుడు అధ్యయనం చేస్తున్నారు. అంతేకాకుండా అంతరిక్షంలో మంచు కింద జీవం ఉండే అవకాశం ఉందనే వాదనలకు కూడా ఈ పరిశోధన బలాన్నిస్తోంది.
