కావలసిన పదార్థాలు: పావు కిలో నుండి అర కిలో పొట్టు వలిచి, తడి లేకుండా పూర్తిగా ఆరబెట్టిన వెల్లుల్లి రెబ్బలు, 200 గ్రాముల పచ్చడి కారం, 150 నుండి 200 గ్రాముల కల్లుప్పు పొడి, 2 నుండి 3 టేబుల్ స్పూన్ల ఆవపిండి, 1 నుండి 2 టేబుల్ స్పూన్ల మెంతిపిండి, సుమారు 1 కప్పు వేరుశనగ నూనె, 250 ml తాజా నిమ్మరసం, 1 టీస్పూన్ పసుపు, తాలింపు కోసం: ఆవాలు 1 టీస్పూన్, 3-4 ఎండుమిర్చి , కరివేపాకు, 1 టీస్పూన్ ఇంగువ
తయారీ విధానం: వెల్లుల్లి రెబ్బలను పొట్టు తీసి, తడి ఏమాత్రం లేకుండా ఫ్యాన్ గాలి కింద పొడి గుడ్డపై ఆరబెట్టుకోవాలి. స్టవ్ వెలిగించి పాన్లో కొద్దిగా నూనె వేసి వేడిచేయాలి. నూనె కాగిన తర్వాత మంటను మీడియం టు లో ఫ్లేమ్లో ఉంచి వెల్లుల్లి రెబ్బలను వేసి దోరగా వేయించాలి. రెబ్బలు మరీ ఎర్రగా మాడకూడదు; లేత బంగారు రంగులోకి మారి పచ్చివాసన పోయే వరకు వేయించి వేరే బౌల్లోకి తీసుకుని పూర్తిగా చల్లారనివ్వాలి.
మిగిలిన నూనెను అదే బాండీలో పోసి వేడిచేయాలి. నూనె వేడయ్యాక ఒక టీస్పూన్ ఆవాలు, ఎండుమిరపకాయలు, తాజా కరివేపాకు మరియు ఒక టీస్పూన్ ఇంగువ వేసి దోరగా వేయించి స్టవ్ ఆఫ్ చేయాలి. ఈ తాలింపు నూనెను గది ఉష్ణోగ్రత వద్ద పూర్తిగా చల్లారనివ్వాలి. వేడి నూనెలో పచ్చడి కలిపితే కారం నల్లబడి పచ్చడి పాడవుతుంది.
ఒక వెడల్పాటి బౌల్లో పచ్చడి కారం, ఉప్పు, పసుపు, ఆవపిండి, మెంతిపిండి వేసి పొడిగా ఉన్నప్పుడే స్పూన్తో సమంగా కలపాలి. ఇప్పుడు చల్లారిన తాలింపు నూనెను మసాలా పొడుల్లో పోసి బాగా కలపాలి. ఆ తర్వాత వేయించి చల్లార్చిన వెల్లుల్లి రెబ్బలు మరియు 250 ml తాజా నిమ్మరసాన్ని పోసి గరిటెతో అన్నీ కలిసేలా బాగా మిక్స్ చేసుకోవాలి.
మొదట్లో పచ్చడి కొద్దిగా పల్చగా ఉన్నట్లు అనిపించినా.. మూడు రోజుల పాటు ఊరిన తర్వాత వెల్లుల్లి రెబ్బలు పులుపు, కారాన్ని పీల్చుకుని నూనె పైకి తేలుతుంది. ఈ పచ్చడిని శుభ్రమైన, తడి లేని గాజు సీసా లేదా జాడీలో భద్రపరచాలి. మూడు రోజుల తర్వాత ఒకసారి పొడి గరిటెతో కలిపి ఉప్పు సరిచూసుకుంటే సరిపోతుంది. వేడివేడి అన్నంలో నెయ్యితో కలుపుకుని తింటే వెల్లుల్లి కమ్మటి రుచితో పాటు ఆరోగ్యానికి ఎంతో మేలు చేకూరుతుంది