రాత్రి సరిగ్గా నిద్ర పట్టకపోవడానికి మానసిక ఒత్తిడి లేదా ఫోన్ వాడకం మాత్రమే కారణం అనుకుంటే పొరపాటే. మనం రోజూ నీరు తాగే ప్లాస్టిక్ బాటిల్స్ కూడా మన నిద్రను పాడు చేస్తున్నాయి. ఎన్విరాన్మెంట్ ఇంటర్నేషనల్ జర్నల్లో ప్రచురితమైన ఒక కొత్త అధ్యయనం ప్రకారం, ప్లాస్టిక్ రసాయనాలు మన శరీరంలో కెఫిన్ తరహా ప్రభావాన్ని చూపుతూ ఆరోగ్యాన్ని దెబ్బతీస్తున్నాయని పరిశోధకులు స్పష్టం చేశారు.
రసాయనాలతో పెరుగుతున్న ముప్పు
సాధారణంగా ప్రయాణాలు చేస్తున్నప్పుడు లేదా ఆఫీసులకు వెళ్లేటప్పుడు చాలామంది తమ వెంట ప్లాస్టిక్ వాటర్ బాటిళ్లను తీసుకెళ్తుంటారు. అయితే వీటి వినియోగం మన ఆరోగ్యంపై ఎలాంటి ప్రభావం చూపుతుందో తెలుసుకోవడానికి నార్వేజియన్ యూనివర్సిటీ ఆఫ్ సైన్స్ అండ్ టెక్నాలజీ శాస్త్రవేత్తలు ఒక అధ్యయనం చేపట్టారు. ప్లాస్టిక్ టాక్సికాలజీ నిపుణుడు మార్టిన్ వాగ్నర్ నేతృత్వంలోని పరిశోధకులు పీవీసీ (PVC), పాలీయురేథేన్ ఉత్పత్తుల నుండి వెలువడే రసాయనాలను లోతుగా విశ్లేషించారు. మనం నిత్యం వాడే ప్లాస్టిక్ బాటిల్స్, ఫీడింగ్ ట్యూబ్లు, ఆహార ప్యాకేజింగ్ కవర్లలో ఈ రసాయనాలు ఎక్కువగా ఉంటాయి. వీటి నుండి విడుదలయ్యే విషపూరిత పదార్థాలు మన శరీరంలోకి చేరి జీవక్రియలను తారుమారు చేస్తాయని పరిశోధనలో వెల్లడైంది.
జీవగడియారంపై తీవ్ర ప్రభావం
ల్యాబ్ పరీక్షల్లో ఈ ప్లాస్టిక్ రసాయనాలు మన కణాలలోని మాలిక్యులర్ క్లాక్ సిగ్నల్లను మార్చగలవని తేలింది. దీనివల్ల మన శరీర జీవగడియారం సుమారు 17 నిమిషాల వరకు ఆలస్యమవుతుంది. ఈ చిన్న మార్పు వల్ల మన నిద్రపోయే సమయాలు పూర్తిగా దెబ్బతింటాయి. ప్లాస్టిక్ బాటిళ్లలోని నీరు తాగడం వల్ల కలిగే ఈ ప్రభావం, రాత్రి పూట కాఫీ తాగినప్పుడు కలిగే కెఫిన్ ప్రభావంతో సమానంగా ఉంటుందని శాస్త్రవేత్తలు పేర్కొన్నారు. దీనివల్ల నిద్ర సరిగ్గా పట్టకపోవడమే కాకుండా, దీర్ఘకాలంలో ఊబకాయం, రోగనిరోధక వ్యవస్థ లోపాలు, డయాబెటిస్, క్యాన్సర్ వంటి తీవ్రమైన వ్యాధుల ముప్పు పెరుగుతుంది.
ప్రత్యామ్నాయాల వైపు
ఇటీవలి కాలంలో యువతలో నిద్రలేమి సమస్యలు పెరగడానికి ప్లాస్టిక్ బాటిళ్ల వాడకం కూడా ఒక ప్రధాన కారణమని పరిశోధకులు స్పష్టం చేస్తున్నారు. ప్లాస్టిక్ రసాయనాల ప్రభావం నుండి మన ఆరోగ్యాన్ని రక్షించుకోవాలంటే ప్లాస్టిక్ వాడకాన్ని వీలైనంత వరకు తగ్గించాలి. వీటికి ప్రత్యామ్నాయంగా గాజు సీసాలు, రాగి లేదా స్టెయిన్లెస్ స్టీల్ వాటర్ బాటిళ్లను ఉపయోగించడం ఎంతో మంచిది. దీనివల్ల నిద్రలేమి సమస్యల నుండి తప్పించుకోవడమే కాకుండా సంపూర్ణ ఆరోగ్యాన్ని కాపాడుకోవచ్చు.
