గోస్వామి తులసీదాస్ ఉత్తరప్రదేశ్లోని రాజాపూర్ గ్రామంలో ఆత్మారాం దూబే, హుల్సీ దంపతులకు జన్మించారు. జన్మించగానే “రామ” నామం ఉచ్చరించడంతో ఆయనకు “రాంబోలా” అనే పేరు వచ్చింది. అశుభ సమయంలో పుట్టాడని భావించి తల్లిదండ్రులు వదిలేయడంతో చిన్నతనంలోనే అనాథగా మారారు. నరహరిదాస్ అనే గురువు ఆ బాలుడిని చేరదీసి రామ మంత్రాన్ని ఉపదేశించి విద్యాబుద్ధులు నేర్పారు. కాలక్రమేణా ఆ రాంబోలానే తులసీదాసుగా మారి కాశీ క్షేత్రంలో గొప్ప విద్వాంసుడిగా పేరు తెచ్చుకున్నారు. తులసీదాస్ జీవితంలో అతి పెద్ద మలుపు, ఆయన భార్య రత్నావళి మాటలు. భార్యపై ఉన్న విపరీతమైన ప్రేమతో అర్ధరాత్రి నదిని దాటి పుట్టింటికి వెళ్ళిన ఆమెను కలవడానికి వెళ్లగా, రత్నావళి “ఈ రక్తమాంసాలతో కూడిన నా శరీరంపై మీకు ఉన్న ప్రేమే శ్రీరాముడిపై ఉంటే మోక్షం లభించేది” అని పలికింది. ఆ మాట తులసీదాస్ను మేల్కొలిపి, సంసార వ్యామోహాలను వదిలి రామభక్తిలో మునిగిపోయేలా చేసింది.
రామ దర్శనం, సాహిత్య కృషి: తులసీదాస్ నిత్యం హనుమంతుడిని ప్రార్థించేవారు. వారణాసిలో రామాయణ ప్రవచనం జరుగుతున్నప్పుడు హనుమంతుడిని గుర్తించి, ఆయన పాదాలు పట్టుకుని ప్రార్థించగా, చిత్రకూట పర్వతంపై రామ దర్శనం లభిస్తుందని వరం పొందారు. తులసీదాస్ చిత్రకూటంలో చందనం తీస్తున్నప్పుడు బాలరాముడు స్వయంగా వచ్చి ఆ చందనాన్ని నుదుటన తిలకంగా దిద్దుకున్నారని చెబుతారు. హనుమంతుడి అనుగ్రహం ఉంటేనే రామ దర్శనం సాధ్యమని దీని ద్వారా తెలుస్తుంది.
భగవంతుడి నామం పండితులకే కాక పామరులకు కూడా చేరాలనే సంకల్పంతో, సంస్కృతానికి బదులు అత్యంత మధురమైన అవధీ భాషలో “రామచరితమానస్”ను, “హనుమాన్ చాలీసా”ను రచించారు. ప్రజల భాషలో ఉండటంతో రామచరితమానస్ ఉత్తర భారతదేశంలో భగవద్గీత కంటే ఎక్కువ ప్రాచుర్యం పొందింది. ఇందులోని చౌపాయేలు (నాలుగు పాదాల పద్యాలు) ఇప్పటికీ వివాహాల్లో, శుభకార్యాల్లో వినిపిస్తాయి.
హనుమాన్ చాలీసా కేవలం ఆధ్యాత్మిక స్తోత్రం కాదు, ఆధునిక శాస్త్రం ఆశ్చర్యపోయే ఖగోళ సత్యాలను కలిగి ఉంది. “యుగ సహస్ర యోజన పర భాను, లీల్యో తాహి మధుర ఫల జాను” అనే పంక్తిలో, టెలిస్కోపులు లేని కాలంలోనే తులసీదాస్ సూర్యుడి దూరాన్ని అత్యంత కచ్చితంగా లెక్కించారు, ఇది నేటి నాసా శాస్త్రవేత్తలు లెక్కించిన దూరానికి సమానం. ఇది హనుమాన్ చాలీసాలోని ఆధ్యాత్మిక మేధస్సును ప్రతిబింబిస్తుంది.
హనుమాన్ చాలీసా భక్తుల చుట్టూ ఒక అజేయమైన పాజిటివ్ ఎనర్జీ వలయాన్ని ఏర్పరిచే రక్షా కవచంగా పనిచేస్తుంది. ఇది భయాన్ని దూరం చేసి, మానసిక ధైర్యాన్ని ప్రసాదిస్తుంది. “భూత పిశాచ నికట నహి ఆవై, మహావీర జబ నామ సునావై” అనే పంక్తి గుండెల్లో ధైర్యాన్ని నింపుతుంది. నెగిటివ్ ఆలోచనలు, ఫోబియాలు ఉన్నవారికి ఇది ఒక గొప్ప సైకలాజికల్ మెడిసిన్గా పనిచేస్తుంది. జ్యోతిషశాస్త్రం ప్రకారం శని దోషాలు, నవగ్రహ బాధలతో సతమతమయ్యేవారు హనుమంతుడిని కొలిస్తే ఆ పీడలు తొలగిపోతాయని ప్రగాఢమైన విశ్వాసం.
తులసీదాస్ జీవితంలో మరో అద్భుత ఘట్టం “హనుమాన్ బాహుక్”. వయసు పైబడినప్పుడు భుజానికి తీవ్రమైన గాయమై, భరించలేని నొప్పితో బాధపడుతున్నప్పుడు, ఆయన హనుమంతుడికి విన్నవిస్తూ ఆశువుగా 44 పద్యాలు చెప్పారు. ఈ పద్యాల పారాయణం పూర్తికాగానే ఆయన వ్యాధి నయమైందని చెబుతారు. ఈరోజుకూ శారీరక క్లేశాలు, కీళ్ళనొప్పులు, తీవ్రమైన అనారోగ్యంతో బాధపడేవారు ఈ స్తోత్రాన్ని మహా ఔషధంగా నమ్ముతున్నారు.
“అష్టసిద్ధి నవనిధి కే దాతా, అసబర దీనహి జానకీ మాతా” అనే పంక్తి సీతమ్మ తల్లి ఇచ్చిన వరం ప్రకారం హనుమంతుడు ఎనిమిది రకాల సిద్ధులను, తొమ్మిది రకాల నిధులను ప్రసాదించగలడని తెలుపుతుంది. యోగ శాస్త్రం ప్రకారం అష్టసిద్ధులు మనసును నియంత్రించుకోవడానికి సంకేతాలు. హనుమాన్ చాలీసా పారాయణం వల్ల ఏకాగ్రత పెరిగి, సుప్త చేతనావస్థలో ఉన్న శక్తులు మేల్కొంటాయని యోగులు చెబుతారు.
తులసీదాస్ స్వయంగా చెప్పినట్లు, హనుమాన్ చాలీసాను 100 సార్లు సంకల్పంతో పఠిస్తే, కష్టాల నుండి, మానసిక ఒత్తిళ్ల నుండి విముక్తి కలిగి పరమ సుఖం లభిస్తుంది. హనుమాన్ చాలీసా కేవలం ఒక స్తోత్రం కాదు, భక్త తులసీదాస్ మనకిచ్చిన ఒక డిజిటల్ పాస్వర్డ్ లాంటిది, ఇది విశ్వ శక్తితో అనుసంధానం చేసి కవచంలా కాపాడుతుంది.
