చర్మాన్ని ఆరోగ్యంగా, కాంతివంతంగా ఉంచుకోవడానికి ఇంట్లో లభించే సహజ సిద్ధమైన దినుసులు ఎంతో దోహదపడతాయి. అందులోనూ కాల్చిన లవంగం ముఖ చర్మానికి అద్భుతమైన నూనెగా, ఫేస్ ప్యాక్గా పనిచేస్తుందని నిపుణులు చెబుతున్నారు. లవంగంలో ఉండే శక్తివంతమైన యాంటీబాక్టీరియల్, యాంటీ ఆక్సిడెంట్ గుణాలు మొటిమలను, నల్లటి మచ్చలను త్వరగా తగ్గించడంలో సహాయపడతాయి. చర్మంపై ముడతలను నివారించి సహజమైన కాంతిని అందించడంలో ఇది ఎంతో ఉపయోగపడుతుంది. దీనిని ఎలా ఉపయోగించాలి..? అనే విషయాలు ఇప్పుడు చూద్దాం..
కాల్చిన లవంగం చర్మానికి ఎందుకు మంచిది?:
లవంగాలను తేలికగా వేయించడం లేదా కాల్చడం వల్ల అందులో ఉండే యుజెనాల్ అనే ముఖ్యమైన సమ్మేళనం మరింత చురుగ్గా మారుతుంది. ఇది శక్తివంతమైన యాంటీబాక్టీరియల్, యాంటీ ఇన్ఫ్లమేటరీ, యాంటీ ఆక్సిడెంట్ గుణాలను కలిగి ఉంటుంది.
ప్రధాన ప్రయోజనాలు:
మొటిమల నివారణ :
ఇవి కూడా చదవండి
కాల్చిన లవంగం పొడిలో ఉన్న యాంటీబాక్టీరియల్ గుణాలు ముఖంపై మొటిమలకు కారణమయ్యే బాక్టీరియాను సమర్థవంతంగా నశింపజేస్తాయి. ఇది వాపు, ఎరుపుదనాన్ని కూడా తగ్గిస్తుంది.
నల్లటి మచ్చలు, పిగ్మంటేషన్ నివారణ:
మొటిమలు తగ్గినా వాటి వల్ల ముఖంపై నల్లటి మచ్చలు మిగిలిపోతాయి. కాల్చిన లవంగం ఫేస్ ప్యాక్ క్రమం తప్పకుండా వాడటం వల్ల ఈ మచ్చలు క్రమంగా తేలికపడి చర్మ ఛాయ సమంగా మారుతుంది.
వృద్ధాప్య ఛాయలకు చెక్:
లవంగంలో ఉండే యాంటీ ఆక్సిడెంట్లు చర్మానికి ఫ్రీ రాడికల్స్ వల్ల కలిగే నష్టాన్ని నివారిస్తాయి. ముఖంపై ముడతలు, చర్మం సాగిపోవడం వంటి వృద్ధాప్య ఛాయలను ఆలస్యం చేస్తాయి.
ఈ ఫేస్ ప్యాక్ ఎలా తయారు చేసుకోవాలి?:
మొదట 3-4 లవంగాలను పెనంపై తక్కువ మంట మీద నల్లగా అయ్యేంతవరకు లైట్గా కాల్చాలి. చల్లారిన తర్వాత వాటిని మెత్తటి పొడిగా చేసుకోవాలి. ఈ పొడికి ఒక స్పూన్ తేనె లేదా కలబంద జెల్, కొద్దిగా రోజ్ వాటర్ కలిపి పేస్ట్లా తయారు చేయాలి. ఈ మిశ్రమాన్ని ముఖానికి ముఖ్యంగా మొటిమలు ఉన్న చోట రాసి 10-15 నిమిషాల తర్వాత గోరువెచ్చని నీటితో కడిగేయాలి.
పాటించాల్సిన జాగ్రత్త:
లవంగంలో ఘాటు ఎక్కువగా ఉంటుంది. కాబట్టి, దీనిని నేరుగా ముఖంపై వాడే ముందు ప్యాచ్ టెస్ట్ చేసుకోవడం తప్పనిసరి. సున్నితమైన చర్మం ఉన్నవారు నిపుణుల సలహాతో మాత్రమే దీనిని వాడాలి.
