“చెట్లు లేకపోతే జీవం ఉండదు.. మనం శ్వాస తీసుకోలేము”.. ఇది చిన్నప్పటి నుండి మనం వింటున్న మాట. కానీ మీకు తెలుసా..? ప్రపంచంలోని కొన్ని దేశాల్లో కిలోమీటర్ల మేర వెతికినా ఒక్క చెట్టు కూడా కనిపించదు. పచ్చదనం మాట అటుంచితే, కనీసం నీడ నిచ్చే మొక్క కూడా అరుదే.. మరి అటువంటి చోట్ల మనుషులు ఎలా నివసిస్తున్నారు? వారికి ఆక్సిజన్ ఎక్కడి నుండి వస్తోంది? ఈ వింత పర్యావరణం వెనుక ఉన్న రహస్యాలేంటో ఇప్పుడు తెలుసుకుందాం..
చెట్లు లేని దేశాలు.. కారణం ఏంటి..?
కొన్ని దేశాల్లో చెట్లు లేకపోవడానికి కారణం మనుషులు కాదు, ప్రకృతి సృష్టించిన భౌగోళిక పరిస్థితులు. గ్రీన్ ల్యాండ్లో చెట్లు ఉండవు. పేరులో గ్రీన్ ఉన్నా, ఇక్కడ అంతా మంచు సామ్రాజ్యమే. గడ్డకట్టే చలి వల్ల చెట్లు పెరగడానికి అవసరమైన నేల ఇక్కడ ఉండదు. ఇక ఎడారి దేశాలైన ఖతార్, ఒమన్లో తీవ్రమైన ఎండలు, నీటి కొరత వల్ల ఇక్కడ సహజ సిద్ధమైన అడవులు పెరగడం అసాధ్యం. కొన్ని ద్వీప దేశాల్లో భూమి లోపల రాతి పొరలు ఉండటం వల్ల చెట్ల వేర్లు లోతుకు వెళ్లలేవు, ఫలితంగా పెద్ద వృక్షాలు పెరగవు.
ఆక్సిజన్ రహస్యం: చెట్లు లేకున్నా శ్వాస ఎలా..?
మనకు అందే ఆక్సిజన్లో అధిక భాగం అడవుల నుండి వస్తుందని మనం అనుకుంటాం. కానీ అసలు నిజం వేరే ఉంది. భూమిపై ఉన్న ఆక్సిజన్లో దాదాపు 50శాతం నుండి 80శాతం వరకు సముద్రాల నుండే ఉత్పత్తి అవుతుంది. సముద్రంలో ఉండే చిన్నపాటి శైవలాలు, ప్లాంక్టన్లు కిరణజన్య సంయోగ క్రియ ద్వారా భారీస్థాయిలో ఆక్సిజన్ను విడుదల చేస్తాయి. సముద్రాల మీద పుట్టే ఈ ఆక్సిజన్ గాలి ప్రవాహాల ద్వారా ప్రపంచమంతటా వ్యాపిస్తుంది. అందుకే చెట్లు లేని దేశాల్లో కూడా ప్రజలు హాయిగా శ్వాస తీసుకోగలుగుతున్నారు.
సవాళ్లు – కొత్త ప్రయత్నాలు
చెట్లు లేకపోవడం వల్ల ఆక్సిజన్ సమస్య రాకపోయినా, ఇతర సవాళ్లు ఎదురవుతాయి. గాలిలో తేమ తగ్గడం, విపరీతమైన వేడి, పర్యావరణ సమతుల్యత దెబ్బతినడం వంటివి జరుగుతాయి. అందుకే ఇప్పుడు ఖతార్, ఒమన్ వంటి దేశాలు టెక్నాలజీని వాడుతూ కృత్రిమ అడవులను సృష్టిస్తున్నాయి. సముద్రపు నీటిని శుద్ధి చేసి మొక్కలకు పోస్తూ పచ్చదనాన్ని పెంచే ప్రయత్నం చేస్తున్నాయి.
ప్రకృతి తనను తాను కాపాడుకోవడానికి అనేక మార్గాలను వెతుక్కుంటుంది. ఒక చోట అడవులు లేకపోయినా, సముద్రాల ద్వారా జీవకోటికి ప్రాణవాయువును అందిస్తూ భూమిని కాపాడుతోంది. అయితే ఉన్న అడవులను కాపాడుకోవడం మనందరి బాధ్యత.
