ప్రముఖ దర్శకుడు రవిబాబు తన సినీ ప్రస్థానం, కమర్షియల్ విజయం, తన చిత్రాలపై ఉన్న అంచనాలు, వాస్తవాల గురించి ఇటీవల ఒక ఇంటర్వ్యూలో ఆసక్తికర వ్యాఖ్యలు చేశారు. 2002లో విడుదలైన తన తొలి చిత్రం “అల్లరి”తో తాను ఒక కొత్త ట్రెండ్ సృష్టించినా, ఆ తర్వాత కెరీర్లో తదుపరి స్థాయికి చేరుకోలేదన్న ప్రశ్నకు రవిబాబు వివరణ ఇచ్చారు. “అల్లరి” సినిమాకు సంబంధించిన ప్రచారాన్ని ప్రత్యేకంగా రూపొందించామని రవిబాబు గుర్తుచేసుకున్నారు. అప్పట్లో తాను, నరేశ్ కొత్తవారమైనందున, తమ తండ్రులైన చలపతిరావు, ఈవీవీ సత్యనారాయణల పేర్లను ప్రచారంలో ఉపయోగించకుండా, సినిమాను సినిమాగానే చూడమని ప్రేక్షకులను కోరామన్నారు. “అల్లరి” ఎంత బడ్జెట్తో నిర్మించారు, ఎంత వసూలు చేసిందనే విషయాలు బయటి ప్రపంచానికి తెలియవని, కానీ చాలామంది దానిని కమర్షియల్ హిట్గా పరిగణించారని ఆయన వెల్లడించారు.
“అల్లరి” తర్వాత తాను అనేక విభిన్నమైన చిత్రాలను రూపొందించానని రవిబాబు వివరించారు. “అమ్మాయిలు అబ్బాయిలు” ఒక కల్ట్ కామెడీ సినిమా అని, “సోగ్గాడు” తొలి వారంలోనే బడ్జెట్ను వసూలు చేసిందని చెప్పారు. “పార్టీ” సినిమా అప్పట్లో పెద్దగా ఆదరణ పొందకపోయినా, ప్రస్తుతం సాఫ్ట్వేర్ కార్యాలయాల్లో కల్ట్ చిత్రంగా చూస్తున్నారని పేర్కొన్నారు. “అనసూయ” కూడా ఒక కల్ట్ థ్రిల్లర్గా నిలిచిందని, ఆ సినిమా తర్వాత ఇప్పటికీ తనను “గులాబ్ పువ్వు గోవింద్” అని పిలుస్తుంటారని రవిబాబు తెలిపారు. థ్రిల్లర్ తర్వాత గేర్ మార్చి “నచ్చావులే” లాంటి టీనేజ్ లవ్ స్టోరీని తీసి 175 రోజులు ఆడేలా భారీ విజయాన్ని సాధించానని అన్నారు. తారకరత్న ఉత్తమ విలన్ నంది అవార్డు గెలుచుకున్న “అమరావతి” కూడా ఒక కల్ట్ చిత్రమని రవిబాబు గుర్తుచేసుకున్నారు. “నేను చేసినన్ని డిఫరెంట్ సినిమాలు పరిశ్రమలో ఎవరూ చేయలేదని” ఆయన గట్టిగా చెప్పారు.
తాను రాజమౌళి లాంటి దర్శకులతో పోటీపడటం లేదని, తన పని తనకు సృజనాత్మకంగా, ఆర్థికంగా సంతృప్తినిస్తుందా లేదా అనేదే ముఖ్యమని స్పష్టం చేశారు. సినిమా నిర్మాణం ఒక వ్యాపారమని, డబ్బు సంపాదించడమే దాని ప్రాథమిక లక్ష్యమని ఆయన వివరించారు. బయట ఇన్స్టాగ్రామ్, యూట్యూబ్లలో ప్రచారంలో ఉన్న వందల కోట్ల కలెక్షన్లు చాలావరకు “ఫేక్” అని చాలాసార్లు నిరూపితమైందని రవిబాబు పేర్కొన్నారు. తాను తన సినిమా బడ్జెట్, కలెక్షన్లను ఎప్పుడూ ప్రచురించలేదని, తాను తీసిన సినిమాలన్నీ తానే నిర్మించి, తానే విడుదల చేస్తానని ఆయన అన్నారు. తన గురించి బయటి ప్రచారాలు, వదంతుల ఆధారంగా కాకుండా, నేరుగా అడిగి వాస్తవాలు తెలుసుకోవాలని రవిబాబు విలేకరికి సూచించారు.
సావిత్రి చేసిన పనికి కోపంతోనే ఆమె చివరి చూపుకు కూడా వెళ్లలేదు…
