భారతీయుల దైనందిన ఆహారంలో బియ్యం ఒక ప్రధానమైనది. అయితే, బియ్యాన్ని వండే ముందు కడగాలా? లేదా నేరుగా వండవచ్చా? ఈ ప్రశ్న నేటికీ చాలా మందిలో ఉంది. బియ్యం కడగడం వల్ల క్రిములు, విషపదార్థాలు తొలగిపోతాయని కొందరు అంటారు. మరికొందరు దీనిని సమయం వృధాగా భావిస్తారు. అయితే, అన్నం వండే ముందు బియ్యాన్ని నీళ్లతో శుభ్రంగా కడగడం మన ఆచారం మాత్రమే కాదు, దాని వెనుక బలమైన శాస్త్రీయ కారణాలు ఉన్నాయని నిపుణులు చెబుతున్నారు. అవేంటో ఇప్పుడు చూద్దాం..
1. అధిక స్టార్చ్ను తొలగించడం
బియ్యం ధాన్యాల పైన పిండి పదార్థం ఉంటుంది. బియ్యాన్ని కడగకుండా నేరుగా వండితే, ఈ స్టార్చ్ వల్ల అన్నం ఉడికేటప్పుడు జిగటగా మారి ముద్దలా అవుతుంది. నీళ్లతో కడగడం వల్ల ఈ అదనపు స్టార్చ్ తొలిగిపోయి, అన్నం పొడిపొడిగా, ముత్యాల్లా విడివిడిగా వస్తుంది.
2. రసాయనాలు, పురుగుమందుల ప్రక్షాళన
పంట పొలాల్లో తెగుళ్లు పట్టకుండా రైతులు వివిధ రకాల పురుగుమందులు, రసాయనాలను ఉపయోగిస్తారు. బియ్యాన్ని శుభ్రంగా కడగడం వల్ల బియ్యంపై ఉండే ఈ రసాయనాల అవశేషాలు చాలా వరకు కొట్టుకుపోతాయి, ఇది ఆరోగ్యానికి ఎంతో సురక్షితం.
3. ఆర్సెనిక్ మరియు మైక్రోప్లాస్టిక్స్ నివారణ
ఆధునిక పరిశోధనల ప్రకారం, నేలలో ఉండే ఆర్సెనిక్ అనే విషపూరిత మూలకం బియ్యంలోకి చేరుతుంటుంది. బియ్యాన్ని బాగా కడగడం లేదా నానబెట్టడం వల్ల ఆర్సెనిక్ శాతాన్ని దాదాపు 30% వరకు తగ్గించవచ్చని సైన్స్ చెబుతోంది. అంతేకాక, ప్యాకేజింగ్ ప్రాసెస్ ద్వారా బియ్యంలోకి చేరే ప్లాస్టిక్ సూక్ష్మకణాలు కూడా కడగడం ద్వారా తొలిగిపోతాయి.
4. క్రిములు, ధూళి తొలగింపు
మిల్లులలో ప్రాసెస్ చేసేటప్పుడు, నిల్వ ఉంచే సమయంలో బియ్యంలోకి చిన్న చిన్న రాళ్లు, దుమ్ము, క్రిములు చేరే అవకాశం ఉంది. కడగడం వల్ల ఇవన్నీ తొలగిపోయి ఆహారం పరిశుభ్రంగా మారుతుంది.
ఎంతసేపు కడగాలి?
బియ్యాన్ని కడగడం మంచిదే అయినప్పటికీ, మరీ ఎక్కువసార్లు లేదా గట్టిగా పిసికి కడగకూడదు. అలా చేస్తే బియ్యంలో ఉండే విటమిన్ బి, ఐరన్ వంటి ముఖ్యమైన నీటిలో కరిగే పోషకాలు నశిస్తాయి. కాబట్టి నీళ్లు కాస్త స్పష్టంగా కనిపించే వరకు 2 నుండి 3 సార్లు తేలికగా కడిగితే సరిపోతుంది.
మరిన్ని లైఫ్ స్టైల్ న్యూస్ కోసం క్లిక్ చేయండి..