Headlines

Video: లక్షలాదిగా కదులుతున్న పీతలు.. రోడ్లపై రాకపోకలు బంద్.. ఈ వింత దృశ్యం ఎక్కడంటే!


Red Crab Migration:  ఆస్ట్రేలియాకు చెందిన క్రిస్మస్ ఐలాండ్‌లో (Christmas Island) ప్రస్తుతం కనిపిస్తున్న దృశ్యాలు అందరినీ ఆశ్చర్యపరుస్తున్నాయి. హిందూ మహాసముద్రంలో ఉన్న ఈ చిన్న దీవి లక్షలాది ఎర్రటి పీతలకు నివాసం. సాధారణంగా అడవుల్లో నివసించే ఈ పీతలు ఏడాదికోసారి భారీ సంఖ్యలో బయటకు వస్తాయి. వర్షాకాలం ప్రారంభం కాగానే లక్షలాది పీతలు తమ ప్రయాణాన్ని మొదలుపెడతాయి. అడవుల నుంచి రోడ్ల మీదుగా సముద్ర తీరం వైపు కదులుతాయి. దారిలో ఎదురయ్యే చెట్లు, రాళ్లు, వాహన మార్గాలు దాటుకుంటూ ముందుకు సాగుతాయి. ఎక్కడ చూసినా ఎర్రటి పీతలే కనిపించడంతో రోడ్లపై ఎర్రటి తివాచీ పరిచినట్లుగా ఉంటుంది. ఇది ఒక్కరోజులో జరిగే వలస కాదు. పీతలు గుంపులు గుంపులుగా కదులుతూ తమ గమ్యస్థానమైన సముద్ర తీరానికి చేరుకుంటాయి.

వర్షం పడితేనే ఈ ప్రయాణం ఎందుకు?

ఈ భారీ వలసకు ప్రధాన సంకేతం వర్షం. క్రిస్మస్ ఐలాండ్‌లో వర్షాకాలం మొదలవగానే పీతలు అడవుల నుంచి బయటకు వస్తాయి. ఎందుకంటే ఇవి భూమిపై నివసించే జీవులే అయినప్పటికీ శ్వాస తీసుకోవడానికి వాటి మొప్పలు తేమగా ఉండాలి. వాతావరణం పొడిగా ఉంటే వాటి శరీరం త్వరగా ఎండిపోతుంది. దీంతో ఎక్కువ దూరం ప్రయాణించడం కష్టమవుతుంది. వర్షాలు పడినప్పుడు వాతావరణంలో తేమ పెరుగుతుంది. అప్పుడు ప్రయాణానికి అనుకూల పరిస్థితులు ఏర్పడతాయి. అందుకే వర్షాకాలం ప్రారంభం కాగానే లక్షలాది పీతలు ఒకేసారి కదలడం మొదలుపెడతాయి.

ఈ వలసలో మరో ఆసక్తికరమైన అంశం ఉంది. పీతలు కేవలం వర్షాలను చూసి మాత్రమే ప్రయాణించవు. చంద్రుడి దశలు, సముద్రపు ఆటుపోట్లను కూడా అనుసరిస్తాయి. సముద్ర తీరానికి చేరుకున్న తర్వాత మగ, ఆడ పీతలు జతకడతాయి. ఆ తర్వాత ఆడ పీతలు ఫలదీకరణ చెందిన గుడ్లను తమ శరీరం కింద మోస్తాయి. సరైన సమయం వచ్చినప్పుడు సముద్రంలోకి వెళ్లి ఆ గుడ్లను నీటిలో విడుదల చేస్తాయి. సముద్రపు ఆటుపోట్లకు అనుగుణంగా గుడ్లను విడుదల చేస్తాయి. ఆ గుడ్ల నుంచి లార్వాలు బయటకు వచ్చి సముద్రంలో పెరుగుతాయి. కొంతకాలం తర్వాత చిన్న పీతలుగా మారి మళ్లీ భూమిపైకి చేరుకుంటాయి. లక్షలాది పీతల ఈ ప్రయాణం వెనుక అసలు ఉద్దేశం తమ సంతానాన్ని పెంచుకోవడం!

Millions of red crabs begin their annual journey

పీతల కోసం వంతెనలు.. ట్రాఫిక్ ఆంక్షలు!

లక్షలాది పీతలు ఒకేసారి రోడ్లపైకి రావడంతో వాహనదారులకు తీవ్ర ఇబ్బందులు ఎదురవుతాయి. పీతలు వాహనాల కింద పడి చనిపోకుండా ఉండేందుకు ఆస్ట్రేలియా అధికారులు ప్రత్యేక ఏర్పాట్లు చేస్తున్నారు. పీతలు దాటే రోడ్లను సురక్షితంగా దాటేందుకు ప్రత్యేక వంతెనలు ఏర్పాటు చేస్తున్నారు. భూగర్భ మార్గాలను కూడా సిద్ధం చేస్తున్నారు. రోడ్ల పక్కన అడ్డంకులు ఏర్పాటు చేసి వాటిని సురక్షిత మార్గాల్లోకి మళ్లిస్తున్నారు. పీతలు భారీ సంఖ్యలో రోడ్లపైకి వచ్చినప్పుడు కొన్ని రహదారులను తాత్కాలికంగా మూసివేస్తున్నారు. వాటి ప్రయాణం పూర్తయ్యే వరకు ట్రాఫిక్‌ను నియంత్రిస్తున్నారు.

పర్యావరణానికి పీతలు చేసే మేలు ఎంతో

ఈ పీతల వలస కేవలం చూడటానికి అందమైన దృశ్యం మాత్రమే కాదు. దీవిలోని పర్యావరణ సమతుల్యతను కాపాడటంలోనూ ఇవి కీలక పాత్ర పోషిస్తాయి. అడవుల్లో రాలిపోయిన ఆకులు, మొక్కల అవశేషాలను తింటూ వాటిని విచ్ఛిన్నం చేస్తాయి. తద్వారా నేలలో పోషకాలు తిరిగి చేరేందుకు సహాయపడతాయి. అడవుల సహజ వ్యవస్థ సక్రమంగా కొనసాగడంలో తమ వంతు పాత్ర పోషిస్తాయి. ప్రకృతిలోని ఎన్నో మార్పులను అనుసరిస్తూ లక్షలాది పీతలు ఒకేసారి ప్రయాణించడం నిజంగా అద్భుతమే. అందుకే ఆస్ట్రేలియాలోని క్రిస్మస్ ఐలాండ్‌లో జరిగే ఈ ఎర్రటి పీతల వలస ప్రపంచవ్యాప్తంగా ప్రకృతి ప్రేమికులను ఆకర్షిస్తోంది.



Source link

Leave a Reply

Your email address will not be published. Required fields are marked *