రాగితో రోజూ తాగే జావ మాత్రమే కాకుండా, రుచికరమైన వెజిటెబుల్ సూప్ తయారుచేసుకుంటే సాయంత్రం వేళల్లో కడుపు నిండటమే కాకుండా బరువు కూడా సులభంగా తగ్గొచ్చు. ఈ హెల్దీ రాగి సూప్ తయారీ విధానం చాలా సులభం. ముందుగా అర కప్పు రాగి పిండిలో ఒక కప్పు నీళ్లు పోసి ఉండలు లేకుండా మెత్తగా కలుపుకొని పక్కన పెట్టుకోవాలి.
ఆ తర్వాత ఒక బాణలిలో రెండు చెంచాల నూనె వేసి వేడి చేయాలి. అందులో దాల్చినచెక్క ముక్క, తరిగిన వెల్లుల్లి రెబ్బలు, అల్లం, పచ్చిమిర్చి ముక్కలు వేసి కొద్దిగా వేయించాలి. వెల్లుల్లి మరియు అల్లం ఫ్లేవర్ సూప్కు ప్రత్యేకమైన రుచిని మరియు సువాసనను అందిస్తుంది.
ఆ తర్వాత సన్నగా తరిగిన ఉల్లిపాయలు, క్యారెట్, బీన్స్, పచ్చి బఠానీలు, స్వీట్ కార్న్, మరియు క్యాబేజీ ముక్కలు వేసి సన్నటి మంటపై టాస్ చేయాలి. కూరగాయలను మరీ ఎక్కువ సేపు ఉడికించకుండా క్రిస్పీగా ఉండేలా చూసుకోవాలి. ఇప్పుడు ఇందులో నాలుగు కప్పుల నీళ్లు పోసి, రుచికి సరిపడా ఉప్పు, అర చెంచా మిరియాల పొడి వేసి బాగా కలపాలి.
ఈ మిశ్రమాన్ని మూడు నిమిషాల పాటు బాగా మరిగించాలి. నీళ్లు బాగా మరిగిన తర్వాత ముందుగా సిద్ధం చేసుకున్న రాగి పిండి మిశ్రమాన్ని అందులో కలపాలి. రాగి మిశ్రమం వేసిన తర్వాత నిరంతరం కలుపుతూ మరో మూడు నిమిషాల పాటు ఉడికించాలి. రాగి పిండి చిక్కబడి సూప్ రూపంలోకి వస్తుంది.
సూప్ పర్ఫెక్ట్ కన్సిస్టెన్సీకి వచ్చిన తర్వాత స్టవ్ ఆపేసి, రెండు చెంచాల నిమ్మరసం, సన్నగా తరిగిన ఉల్లికాడలు చల్లి బాగా కలుపుకోవాలి. అంతే ఎంతో రుచికరమైన, వేడివేడి వెజిటెబుల్ రాగి సూప్ సిద్ధమవుతుంది. ప్రతిరోజూ రాత్రి భోజనానికి బదులుగా ఈ సూప్ను తీసుకుంటే వేగంగా బరువు తగ్గడమే కాకుండా రోగనిరోధక శక్తి కూడా పెరుగుతుంది.
