కావలసిన పదార్థాలు: పప్పుల మిశ్రమం: 1/3 కప్పు మినప్పప్పు, 1/3 కప్పు కందిపప్పు, 1/3 కప్పు పచ్చిశనగపప్పు – ఏ కొలతతో తీసుకున్నా ఈ మూడు పప్పులు సమాన నిష్పత్తిలో ఉండాలి.
మసాలా దినుసులు: 1 టీస్పూన్ సోంపు, 1 టీస్పూన్ జీలకర్ర, 3 నుండి 4 పచ్చిమిర్చి, 1 అంగుళం అల్లం ముక్క, 5 నుండి 6 వెల్లుల్లి రెబ్బలు, 2 ఎండుమిర్చి, 2 రెమ్మలు కరివేపాకు.
మిక్సింగ్ కోసం: 1 కప్పు సన్నగా తరిగిన ఉల్లిపాయ, పావు కప్పు తరిగిన కొత్తిమీర, పావు కప్పు తరిగిన పుదీనా, రుచికి సరిపడా ఉప్పు, మరియు డీప్ ఫ్రైకి సరిపడా నూనె.
తయారీ విధానం: ఒక గిన్నెలో మినప్పప్పు, కందిపప్పు, పచ్చిశనగపప్పు వేసి నీటిలో శుభ్రంగా కడగాలి. ఆ తర్వాత మంచి నీళ్లు పోసి సరిగ్గా 3 నుండి 4 గంటల పాటు నానబెట్టాలి. అంతకంటే ఎక్కువ సేపు నానబెట్టకూడదు. నానిన తర్వాత పప్పును జల్లెడలో వేసి నీరంతా పూర్తిగా పోయే వరకు రెండు నిమిషాలు ఉంచాలి. అందులోంచి ఒక పిడికెడు నానిన పప్పులను విడిగా పక్కన ఉంచుకోవాలి.
చాపర్ లేదా మిక్సీ జార్లో సోంపు, జీలకర్ర, పచ్చిమిర్చి, అల్లం, వెల్లుల్లి, ఎండుమిర్చి, కరివేపాకు మరియు నీరు వడకట్టిన పప్పులను వేయాలి. ఒక్క చుక్క కూడా నీరు వేయకుండా, గోధుమ రవ్వ మాదిరిగా బరకగా గ్రైండ్ చేసుకోవాలి. పేస్ట్లా మెత్తగా కాకుండా రవ్వగా ఉంటేనే వడ క్రిస్పీగా వస్తుంది.
గ్రైండ్ చేసిన మిశ్రమాన్ని బౌల్లోకి తీసుకుని అందులో ఉప్పు, సన్నటి ఉల్లిపాయ తరుగు, కొత్తిమీర, పుదీనా వేయాలి. ఉల్లిపాయలను చేత్తో గట్టిగా పిండుతూ కలపాలి. ఉల్లిపాయలోంచి వచ్చే తేమే పిండికి సరిపోతుంది. వడ సరిగ్గా ఫామ్ అవ్వకపోతే మాత్రమే ఒక చెంచా బియ్యప్పిండి వేయవచ్చు. చివరగా పక్కన ఉంచిన పిడికెడు పప్పులను కూడా వేసి కలపాలి. ఇవి వేగిన తర్వాత నమిలేటప్పుడు సూపర్ క్రంచీగా తగులుతాయి.
చేతులను తడి చేసుకుని నిమ్మకాయ సైజు పిండిని తీసుకుని అరచేతిలో వడలా పలుచగా తట్టాలి. మరిగే వేడి నూనెలో వడలను వేసి వెంటనే కదపకుండా 2-3 నిమిషాలు మీడియం మంటపై వేగనివ్వాలి. ఆ తర్వాత నెమ్మదిగా రెండో వైపుకు తిప్పుతూ, దాదాపు 12 నుండి 15 నిమిషాల పాటు నిదానంగా బంగారు ఎరుపు రంగు వచ్చేవరకు వేయించి నూనె వాడ్చి తీయాలి. అంతే, లోపల గుల్లగా, పైన కరకరలాడుతూ చల్లారినా మెత్తబడని సూపర్ టేస్టీ మూడు పప్పుల మసాలా వడ సిద్ధం!