Kitchen Tips: చాలామందికి చపాతీలు చేసిన కొద్దిసేపటికే గట్టిపడిపోవడం లేదా పూరీలాగా కాలకపోవడం పెద్ద సమస్యగా ఉంటుంది. చపాతీలు రోజంతా మెత్తగా, దూదిలా ఉండాలంటే పిండి కలపడం దగ్గర నుంచి కాల్చే వరకు కొన్ని చిన్న చిన్న మెళకువలు పాటించాలి. వంటింట్లో ఉపయోగపడే ఆ అద్భుతమైన టిప్స్ ఏంటో ఇప్పుడు చూద్దాం!
- గోరువెచ్చని నీళ్లు లేదా పాలు ఉపయోగించండి: పిండి కలిపేటప్పుడు చల్లటి నీళ్లకు బదులుగా గోరువెచ్చని నీటిని లేదా కాచి చల్లార్చిన పాలను ఉపయోగించండి. గోరువెచ్చని నీరు పిండిలోని గ్లూటెన్ను వేగంగా ఉత్తేజపరిచి, పిండిని చాలా మృదువుగా మారుస్తుంది.
- కొద్దిగా నూనె లేదా నెయ్యి కలపండి: పిండి కలుపుతున్నప్పుడే ఒక టీస్పూన్ నూనె లేదా నెయ్యి వేసి కలపాలి. ఇది చపాతీలు పొడిబారకుండా చూస్తుంది. పిండి కలిపిన తర్వాత కూడా పైన కాస్త నూనె రాసి మూత పెట్టాలి.
- పిండిని నానబెట్టడం మర్చిపోవద్దు: పిండి కలిపిన వెంటనే చపాతీలు ఒత్తకూడదు. పిండి బాగా కలిపిన తర్వాత కనీసం 15 నుండి 20 నిమిషాల పాటు తడి గుడ్డ లేదా మూత పెట్టి పక్కన ఉంచాలి. దీనివల్ల పిండి సాగే గుణాన్ని పొంది, చపాతీలు చాలా మెత్తగా వస్తాయి.
- ఒత్తేటప్పుడు పలచగా కాకుండా..: చపాతీలు ఒత్తేటప్పుడు మరీ పలచగా లేదా మరీ మందంగా కాకుండా సమానంగా ఒత్తుకోవాలి. అలాగే ఒత్తడానికి పొడి పిండిని వీలైనంత తక్కువగా ఉపయోగించాలి. ఎక్కువ పొడి పిండి వాడితే కాల్చేటప్పుడు చపాతీ గట్టిగా మారుతుంది.
- పెనం వేడి సరిగ్గా ఉండాలి: చపాతీలు కాలడానికి పెనం వేడి చాలా ముఖ్యం. పెనం తక్కువ వేడిగా ఉంటే చపాతీ గట్టిపడుతుంది. ఎక్కువ వేడిగా ఉంటే లోపల ఉడకకుండా పైన మాడిపోతుంది. అందుకే పెనాన్ని మధ్యస్థం నుండి కాస్త ఎక్కువ మంటపై వేడి చేసి చపాతీలు కాల్చాలి.
- సరిగ్గా కాల్చే విధానం: చపాతీని పెనంపై వేసిన తర్వాత చిన్న చిన్న బుడగలు రాగానే తిప్పేయాలి. రెండు వైపులా సరిగ్గా కాలిన తర్వాతే నూనె లేదా నెయ్యి రాయాలి. మొదట్లోనే నూనె రాస్తే చపాతీ సరిగ్గా పొంగదు. చపాతీలు కాలిన తర్వాత వాటిని ఒక కాటన్ గుడ్డలో (Roti Cloth) చుట్టి కాసరోల్లో ఉంచితే.. అవి కొన్ని గంటల పాటు వేడిగా, దూది లాగా మెత్తగా ఉంటాయి.
ఇవి కూడా చదవండి
మరిన్ని లైఫ్ స్టైల్ వార్తల కోసం ఇక్కడ క్లిక్ చేయండి
