Headlines

Aqwan Cyclone: ఏపీకి ‘అక్వాన్’ ముప్పు తప్పినట్లేనా? దిశ మార్చుకున్న తుపాను.. ఆ జిల్లాల్లో భారీ వర్షాలు


అమరావతి, నవంబర్‌ 19: ఆంధ్రప్రదేశ్‌కు అక్వాన్ తుపాను ముప్పు కొంతవరకు తప్పినట్లుగా కనిపిస్తోంది. తొలుత మచిలీపట్నం–చెన్నై మధ్య, ఆ తర్వాత కాకినాడ–విశాఖపట్నం మధ్య తీరం దాటుతుందని అంచనా వేసిన ఈ తుపాను తాజాగా దిశ మార్చుకుంది. దక్షిణ ఒడిశా వైపు పయనిస్తున్నట్లు వాతావరణ నిపుణులు వెల్లడించారు. అయితే తుపాను గమనం పూర్తిగా స్పష్టమయ్యే వరకు ఉత్తరాంధ్ర ప్రజలు అప్రమత్తంగా ఉండాలని వాతావరణ శాఖ హెచ్చరించింది. అక్వాన్ తుపాను మొదటి నుంచి నెమ్మదిగా కదులుతోంది. గంటకు 3 నుంచి 9 కిలోమీటర్ల వేగంతో ప్రయాణిస్తూ సముద్రంలోనే కొంత బలహీనపడింది. బంగాళాఖాతంలో ఏర్పడిన ఉప ఉష్ణమండల అధిక పీడన ప్రభావంతో దిశ మార్చుకున్నట్లు ఆంధ్రా యూనివర్సిటీ వాతావరణ విభాగాధిపతి ఆచార్య సీవీ నాయుడు తెలిపారు. ప్రస్తుతం దక్షిణ ఒడిశా వైపు పయనిస్తున్నప్పటికీ.. కోల్‌కతా, బంగ్లాదేశ్ తీర ప్రాంతాల వైపు వెళ్లే అవకాశాలు కూడా ఉన్నాయని ఆయన పేర్కొన్నారు. గతంలోనూ కొన్ని తుపాన్లు ఇదే తరహాలో గమనాన్ని మార్చుకున్నాయని వివరించారు.

తీవ్ర తుపానుగా కొనసాగుతున్న అక్వాన్

దక్షిణ, పశ్చిమ మధ్య బంగాళాఖాతంలో అక్వాన్ తీవ్ర తుపానుగా కొనసాగుతోందని వాతావరణ శాఖ వెల్లడించింది. బుధవారం రాత్రి నాటికి గంటకు 9 కిలోమీటర్ల వేగంతో కదులుతూ పలు ప్రాంతాలకు సమీపంలో కేంద్రీకృతమైంది.

  • నరసాపురానికి 500 కిలోమీటర్ల దూరంలో
  • కళింగపట్నానికి 540 కిలోమీటర్ల దూరంలో
  • గోపాల్‌పూర్‌కు 630 కిలోమీటర్ల దూరంలో
  • పూరీకి 690 కిలోమీటర్ల దూరంలో

గురువారం అర్ధరాత్రి వరకు తీవ్ర తుపానుగానే కొనసాగుతుందని, శుక్రవారం మధ్యాహ్నానికి తుపానుగా బలహీనపడే అవకాశం ఉందని వాతావరణ శాఖ అంచనా వేసింది. నరసాపురం–పూరీ మధ్య తీరం దాటే అవకాశాలను కూడా అధికారులు పరిశీలిస్తున్నారు. తుపాను తీరం దాటే సమయంలో గంటకు 90 నుంచి 100 కిలోమీటర్ల వేగంతో బలమైన గాలులు వీచే అవకాశం ఉందని వాతావరణ శాఖ హెచ్చరించింది. ప్రస్తుత గమనం ప్రకారం దక్షిణ ఒడిశా వైపు వెళ్లే అవకాశాలు ఎక్కువగా కనిపిస్తున్నాయని తెలిపింది. ఒకవేళ గమనం మారితే శ్రీకాకుళం–పూరీ మధ్య తీరం దాటే అవకాశం ఉందని పేర్కొంది. అక్వాన్ తుపాను ప్రభావంతో ఉత్తరాంధ్ర జిల్లాల్లో భారీ నుంచి అత్యంత భారీ వర్షాలు కురిసే అవకాశం ఉంది. గురువారం ఈ జిల్లాలకు వాతావరణ శాఖ హెచ్చరికలు జారీ చేసింది.

ఇవి కూడా చదవండి



  • శ్రీకాకుళం
  • విజయనగరం
  • విశాఖపట్నం
  • అనకాపల్లి
  • అల్లూరి సీతారామరాజు
  • కాకినాడ

ఈ జిల్లాల్లో అత్యంత భారీ వర్షాలు కురిసే అవకాశం ఉంది. తూర్పుగోదావరి, డాక్టర్ బీఆర్ అంబేడ్కర్ కోనసీమ, పశ్చిమగోదావరి జిల్లాల్లో భారీ నుంచి అతి భారీ వర్షాలు పడే సూచనలు ఉన్నాయని అధికారులు తెలిపారు. నవంబర్ 20న శ్రీకాకుళం, పార్వతీపురం మన్యం, విజయనగరం, విశాఖపట్నం, అనకాపల్లి, కాకినాడ జిల్లాల్లో అత్యంత భారీ వర్షాలు కురిసే అవకాశం ఉందని వాతావరణ శాఖ వెల్లడించింది. అల్లూరి సీతారామరాజు, డాక్టర్ బీఆర్ అంబేడ్కర్ కోనసీమ జిల్లాల్లో భారీ వర్షాలు పడే సూచనలు ఉన్నాయని తెలిపింది. తుపాను దిశ మారడంతో రాష్ట్రానికి ప్రత్యక్ష ముప్పు తగ్గినట్లు కనిపిస్తున్నప్పటికీ.. ఉత్తరాంధ్ర జిల్లాలపై వర్షాల ప్రభావం ఉండే అవకాశం ఉంది. ప్రజలు వాతావరణ శాఖ సూచనలు పాటించాలని, మత్స్యకారులు సముద్రంలోకి వెళ్లే విషయంలో అధికారుల హెచ్చరికలను తప్పనిసరిగా పాటించాలని సూచించారు.



Source link

Leave a Reply

Your email address will not be published. Required fields are marked *