హైదరాబాద్ ఆర్టీసీ క్రాస్ రోడ్స్ లోని సుదర్శన్ థియేటర్లో బీఆర్ఎస్ వర్కింగ్ ప్రెసిడెంట్, మాజీ మంత్రి కేటీఆర్ ద పారడైజ్ సినిమాను వీక్షించారు. పార్టీ నేతలతో కలిసి ఈ సినిమాను చూసేందుకు వెళ్లిన కేటీఆర్, పలు సంవత్సరాల తర్వాత థియేటర్లో సినిమా చూడబోతున్నానని మధ్యాహ్నమే ఎక్స్ (గతంలో ట్విట్టర్) లో పోస్ట్ చేశారు. దీంతో థియేటర్ వద్ద అభిమానులు, పార్టీ శ్రేణులు భారీగా తరలివచ్చారు. సినిమా చూసిన అనంతరం కేటీఆర్ మీడియాతో మాట్లాడుతూ ద పారడైజ్ చాలా బాగుందని ప్రశంసించారు. దర్శకుడు శ్రీకాంత్ ఓదెల సినిమాను అద్భుతంగా తెరకెక్కించారని, నాని నటన బాగా ఆకట్టుకుందని పేర్కొన్నారు. “శంకరన్న” పాత్రపై తాను ప్రత్యేకంగా చెప్పాల్సిన అవసరం లేదని, ఆ పాత్ర స్ఫూర్తి ఎవరో అందరికీ తెలుసని కేటీఆర్ వ్యాఖ్యానించారు. తెలంగాణ నేలలో, తెలంగాణ యాసలో, తెలంగాణ భాషలో తీసిన ఈ సినిమా విజయవంతం కావాలని ఆకాంక్షించారు.