4 సంవత్సరాల కంటే తక్కువ వయస్సు ఉన్న చిన్నపిల్లలకు దగ్గు సిరప్లు ఇవ్వకుండా నిరోధించేందుకు భారత డ్రగ్స్ రెగ్యులేటర్ (CDSCO) కీలక ప్రతిపాదన తెచ్చింది. ప్రతి దగ్గు సిరప్ సీసాపై 4 సంవత్సరాల కంటే తక్కువ వయస్సు ఉన్న పిల్లలకు దగ్గు సిరప్ ఉపయోగించకూడదు అని స్పష్టమైన హెచ్చరిక ముద్రించనున్నారు. గతంలో హెచ్చరికలు జారీ చేసినప్పటికీ చిన్నపిల్లలకు సిరప్లు ఇస్తున్నారనే ఫిర్యాదుల నేపథ్యంలో డ్రగ్స్ రూల్స్, 1945కి సవరణలు చేసేందుకు చర్యలు వేగవంతం చేశారు. ఆ వివరాల్లేంటో ఇప్పుడు చూద్దాం..
కొత్త ప్రతిపాదనలోని ప్రధానాంశాలు:
ప్రతి దగ్గు సిరప్ బాటిల్పై ప్రజలకు స్పష్టంగా కనిపించేలా ఎరుపు రంగులో హెచ్చరిక. 4 సంవత్సరాల కంటే తక్కువ వయస్సు ఉన్న పిల్లలలో దగ్గు సిరప్ను ఉపయోగించకూడదు అని స్పష్టంగా ముద్రించాలి.
ఈ మందులు కేవలం బడికి వెళ్లే వయస్సు ఉన్న పిల్లలకు మాత్రమే ఉద్దేశించినవని సూచించడానికి, లేబుల్పై పాఠశాల పిల్లల బొమ్మలను ముద్రించనున్నారు. దీనివల్ల చదువు రానివారు లేదా గ్రామీణ ప్రాంత ప్రజలు సైతం ఇవి పసిపిల్లలకు కాదని సులభంగా అర్థం చేసుకోగలరు.
నిర్ణయానికి గల కారణాలు:
అక్టోబర్ 2025లోనే డైరెక్టరేట్ జనరల్ ఆఫ్ హెల్త్ సర్వీసెస్ (DGHS) రెండేళ్లలోపు పిల్లలకు దగ్గు మందులు ఇవ్వకూడదని మార్గదర్శకాలు ఇచ్చింది. అయినప్పటికీ, ఇప్పటికీ చిన్నపిల్లలకు దగ్గు సిరప్లను ప్రిస్క్రైబ్ చేస్తున్నారని, విచ్చలవిడిగా విక్రయిస్తున్నారని ఫిర్యాదులు అందాయి. ఈ నేపథ్యంలో డ్రగ్స్ కన్సల్టేటివ్ కమిటీ (DCC) ముందు డ్రగ్స్ రూల్స్, 1945లోని రూల్ 96ను సవరించే ప్రతిపాదనను ఉంచారు.
ఇవి కూడా చదవండి
చిన్నపిల్లలకు దగ్గు సిరప్లు ఎందుకు ప్రమాదకరం?
చిన్నపిల్లలలో శ్వాసకోశ వ్యవస్థ సున్నితంగా ఉంటుంది. దగ్గు సిరప్లలో ఉండే కొన్ని రసాయనాలు పసిపిల్లలలో మత్తు, శ్వాస తీసుకోవడంలో ఇబ్బంది, ఇతర తీవ్రమైన దుష్ప్రభావాలకు కారణమవుతాయని నిపుణులు హెచ్చరిస్తున్నారు.
భారత ప్రభుత్వం తీసుకోబోయే ఈ కఠిన నిర్ణయం వల్ల పసిపిల్లల ప్రాణాలకు రక్షణ కలగడమే కాకుండా, విచక్షణారహితంగా మందులు వాడే సంస్కృతికి అడ్డుకట్ట పడుతుంది.
మరిన్ని లైఫ్ స్టైల్ న్యూస్ కోసం క్లిక్ చేయండి..