ఉద్యోగం మారినప్పుడు పాత కంపెనీ నుంచి కొత్త సంస్థకు చేరే ప్రక్రియలో అనేక రకాల డాక్యుమెంట్లు, వివరాలు కీలకంగా మారతాయి. ముఖ్యంగా ఉద్యోగి EPFO రికార్డుల్లో నమోదైన ఉద్యోగం మానేసిన తేదీ (Date of Exit) చాలా ముఖ్యమైనది. ఈ తేదీ నమోదు కాకపోయినా, తప్పుగా ఉన్నా పాత PF ఖాతాను కొత్త ఉద్యోగానికి బదిలీ చేయడంలో సమస్యలు ఎదురయ్యే అవకాశం ఉంది. అంతేకాకుండా కొత్త కంపెనీలో జరిగే బ్యాక్గ్రౌండ్ వెరిఫికేషన్ (BGV) సమయంలోనూ ఉద్యోగ రికార్డులపై ప్రశ్నలు తలెత్తవచ్చు.
మాజీ యజమానిపై ఆధారపడాల్సిన అవసరం లేదు
సాధారణంగా ఉద్యోగి కంపెనీని వీడిన తర్వాత యజమాని EPFO పోర్టల్లో ఉద్యోగ విరమణ తేదీని నమోదు చేస్తారు. అయితే కొన్ని సందర్భాల్లో అది నమోదు కాకపోవచ్చు లేదా తప్పుగా నమోదయ్యే అవకాశం ఉంటుంది. ఇలాంటి పరిస్థితుల్లో అర్హత ఉన్న EPFO సభ్యులు మాజీ యజమానిని సంప్రదించకుండానే తమ UAN-లింక్డ్ ఖాతా ద్వారా నిష్క్రమణ తేదీని ఆన్లైన్లో అప్డేట్ చేసుకునే సదుపాయం ఉంది.
ఈ షరతులు తప్పనిసరి
EPFOలో Date of Exit మార్చడానికి కొన్ని నిబంధనలు ఉన్నాయి. ఉద్యోగం విడిచిన తేదీ నుంచి కనీసం రెండు నెలలు పూర్తయిన తర్వాతే ఈ వివరాలను అప్డేట్ చేసుకునే అవకాశం ఉంటుంది. అలాగే నమోదు చేయబోయే నిష్క్రమణ తేదీ, గత యజమాని చెల్లించిన చివరి PF కాంట్రిబ్యూషన్కు సంబంధించిన నెల పరిధిలో ఉండాలి. దీనితో పాటు సభ్యుడి UAN యాక్టివేట్ అయి ఉండాలి. అది ఆధార్తో లింక్ అయి ఉండటంతో పాటు, ఆధార్లో నమోదైన మొబైల్ నంబర్కు OTP అందుకునే అవకాశం ఉండాలి.
ఇలా Date of Exit అప్డేట్ చేయండి
ముందుగా అధికారిక EPFO Member Portalలో UAN, పాస్వర్డ్తో లాగిన్ కావాలి. అనంతరం ‘Manage’ ట్యాబ్లోకి వెళ్లి ‘Mark Exit’ ఆప్షన్ను ఎంచుకోవాలి. తర్వాత Service Historyలోకి వెళ్లి సంబంధిత పాత ఉద్యోగానికి సంబంధించిన నిష్క్రమణ తేదీ ఇప్పటికే నమోదైందో లేదో పరిశీలించాలి. తేదీ తప్పుగా ఉన్నట్లయితే, జీతం స్లిప్లు, రిలీవింగ్ లెటర్ లేదా ఇతర ఉద్యోగ రికార్డులను పరిశీలించి సరైన తేదీని నమోదు చేయాలి. ఉద్యోగం విడిచిన కారణాన్ని ఎంచుకుని, చివరి PF కాంట్రిబ్యూషన్కు సంబంధించిన నెల వివరాలను కూడా నమోదు చేయాలి. అనంతరం ఆధార్ ఆధారిత OTP ధృవీకరణను పూర్తి చేసి అభ్యర్థనను సమర్పించవచ్చు.
PF బదిలీకి కూడా కీలకమే
ఉద్యోగాలు మారే సమయంలో పాత PF ఖాతా నుంచి కొత్త ఖాతాకు నిధులను బదిలీ చేయడానికి సరైన Date of Exit అవసరం. భవిష్యత్తులో PF ఉపసంహరణ వంటి ప్రక్రియల్లోనూ ఈ వివరాలు ఉపయోగపడతాయి. ఉద్యోగ రికార్డుల్లో తేదీలు సరిపోకపోతే కొత్త సంస్థలో BGV సమయంలో అనవసరమైన సందేహాలు లేదా ఆలస్యాలు తలెత్తే అవకాశం ఉంటుంది. అందువల్ల ఉద్యోగులు తమ EPFO Service Historyలోని వివరాలను ఎప్పటికప్పుడు పరిశీలించుకోవడం మంచిది. ముఖ్యంగా UAN, ఆధార్, PAN, బ్యాంక్ వివరాలు లేదా పాస్వర్డ్లను ఫోన్లో ఎవరితోనూ పంచుకోకూడదు. EPFOకు సంబంధించిన పనుల కోసం అధికారిక Member Portalనే ఉపయోగించాలని సూచిస్తున్నారు.