ఇంటికి కొత్త రంగులు వేయడం అంటే అందాన్ని పెంచడంతో పాటు ఖర్చుతో కూడుకున్న పని. ముఖ్యంగా కూలీల ఖర్చు, పెయింటింగ్కు పట్టే సమయం చాలామందికి భారంగా మారుతోంది. అయితే ప్రస్తుతం మార్కెట్లో అందుబాటులో ఉన్న కొన్ని పోర్టబుల్ ఎలక్ట్రిక్ పెయింట్ స్ప్రేయర్లతో ఇంటి గోడలకు మీరే సులభంగా రంగులు వేసుకోవచ్చు. తక్కువ సమయంలో పెయింటింగ్ పూర్తి చేయడానికి ఇవి ఉపయోగపడతాయి.
పెయింటింగ్ ఖర్చు తగ్గించే యంత్రాలు
ఇంటి బయటి గోడలకు ఒకసారి పెయింట్ వేస్తే సాధారణంగా కొన్ని సంవత్సరాల వరకు మళ్లీ అవసరం ఉండకపోవచ్చు. అయితే ఇంటి లోపలి గోడలకు నిర్వహణ కోసం తరచుగా పెయింటింగ్ చేయాల్సి రావచ్చు. దీంతో ప్రతి సారి కూలీలను పిలిపించడం వల్ల అదనపు ఖర్చు అవుతుంది. ఈ సమస్యకు పెయింట్ స్ప్రేయర్లు ఒక ప్రత్యామ్నాయంగా ఉపయోగపడుతున్నాయి. ఈ యంత్రాల్లో చిన్న ఎలక్ట్రిక్ మోటార్ ఉంటుంది. ఇంటి విద్యుత్ కనెక్షన్కు అనుసంధానించి పనిచేయించవచ్చు. పెయింట్ను స్ప్రే రూపంలో గోడపైకి పంపడం వల్ల బ్రష్ లేదా రోలర్తో పోలిస్తే పెద్ద ప్రాంతాలను వేగంగా కవర్ చేయడానికి వీలవుతుంది.
రూ.1,500 నుంచి పెయింట్ స్ప్రేయర్లు
గృహ అవసరాలు, చిన్న తరహా పెయింటింగ్ పనులకు ఉపయోగించే పోర్టబుల్ పెయింట్ స్ప్రేయర్లు సాధారణంగా రూ.1,500 నుంచి రూ.2,500 వరకు లభిస్తున్నాయి. అయితే సామర్థ్యం, మోటార్ పవర్, టెక్నాలజీ, బ్రాండ్ను బట్టి ధర మారుతుంది. అధిక సామర్థ్యం కలిగిన మోడళ్ల ధర రూ.1 లక్ష లేదా అంతకంటే ఎక్కువగా కూడా ఉండవచ్చు.
ట్రూకేర్ 550W పెయింట్ స్ప్రేయర్
ట్రూకేర్ 550W పెయింట్ స్ప్రేయర్ ధర సుమారు రూ.2,000గా ఉంటుంది. 550 వాట్ల మోటార్తో పనిచేసే ఈ యంత్రాన్ని ఇండోర్, అవుట్డోర్ పెయింటింగ్ పనులకు ఉపయోగించవచ్చు. సుమారు 800 ఎంఎల్ కంటైనర్తో లభించే ఈ స్ప్రేయర్ ద్వారా వాల్ పెయింట్, ప్రైమర్ వంటి వాటిని గోడలపై స్ప్రే చేయవచ్చు.
650W పెయింట్ జూమ్ స్ప్రేయర్
650 వాట్ల పెయింట్ జూమ్ పోర్టబుల్ పెయింట్ స్ప్రేయర్ మరో తక్కువ ధర ఎంపిక. దీని ధర సుమారు రూ.1,650 నుంచి రూ.2,000 మధ్య ఉంటుంది. మోటార్తో పాటు షోల్డర్ బెల్ట్ ఉండటం వల్ల ఎక్కువ సమయం ఉపయోగించినా సులభంగా తీసుకెళ్లవచ్చు. ఇందులో HVLP అంటే హై వాల్యూమ్ లో ప్రెజర్ టెక్నాలజీ ఉండటంతో పెయింట్ వృథాను తగ్గిస్తూ సమానమైన ఫినిషింగ్ ఇవ్వడానికి సహాయపడుతుంది.
ఎలక్ట్రిక్ పెయింట్ స్ప్రే గన్
మూడో ఎంపికగా 450 నుంచి 600 వాట్ల ఎలక్ట్రిక్ పెయింట్ స్ప్రే గన్స్ అందుబాటులో ఉన్నాయి. వీటి ధర సుమారు రూ.1,500 నుంచి రూ.1,800 వరకు ఉంటుంది. ఇవి తేలికగా ఉండటంతో చేతితో పట్టుకుని ఉపయోగించవచ్చు. వివిధ నాజిల్లు, సర్దుబాటు చేసుకునే స్ప్రే ప్యాటర్న్లు ఉండటం వల్ల మూలలు, చదునైన గోడలు వంటి ప్రాంతాల్లో పెయింట్ వేయడం సులభమవుతుంది.
కొనుగోలు ముందు ఇవి గమనించండి
పెయింట్ స్ప్రేయర్ కొనుగోలు చేసే ముందు మోటార్ పవర్, కంటైనర్ సామర్థ్యం, నాజిల్లు, స్ప్రే ప్యాటర్న్లు, పెయింట్కు అనుకూలత, శుభ్రం చేయడం ఎంత సులభమో పరిశీలించాలి. అలాగే తయారీదారు సూచించిన విధంగా పెయింట్ను పలుచగా చేయాల్సి ఉంటే అదే నిష్పత్తిని పాటించాలి. స్ప్రే చేసేటప్పుడు మాస్క్, కళ్ల రక్షణ పరికరాలు ఉపయోగించడం, గదిలో సరైన వెంటిలేషన్ ఉండేలా చూసుకోవడం కూడా ముఖ్యం.