బియ్యానికి పురుగులు పట్టకుండా ఉండాలంటే ఏం చేయాలి? వేపాకు పని చేస్తుందా..?

ఇంట్లో వంటకు సిద్ధమయ్యే ముందు బియ్యాన్ని చెరగడం చాలా సందర్భాల్లో చూస్తూ ఉంటాం. బియ్యానికి పురుగు పట్టినా లేదా అందులో మట్టి వంటి వ్యర్థాలు ఉన్నా వాటిని వేరు చేయడానికి చెరుగుతూ ఉంటారు. చాలామంది బియ్యాన్ని దీర్ఘకాలం నిల్వ చేసుకుంటారు. ఇలా నిల్వ చేసుకునే బియ్యానికి పురుగులు పట్టడం సాధారణంగా చూస్తుంటాం. ఆంధ్రప్రదేశ్ వ్యవసాయ శాఖ వెలువరించే పాడి పంటలు పత్రిక ప్రకారం, నిల్వ చేసిన ధాన్యాలకు సాధారణంగా నుసి పురుగులు, ముక్కు పురుగులు, లద్దె పురుగులు పడుతూ ఉంటాయి. ఈ పురుగులు ధాన్యం గింజలను గుల్ల చేసి, వాటికి రంధ్రం చేసి పొడి చేస్తాయి. ఇలా పొడిగా అయిన బియ్యాన్ని శుభ్రం చేయడం కొంత కష్టం.

ఆరోగ్యంపై ప్రభావం:

పురుగులు పట్టిన బియ్యాన్ని శుభ్రం చేసుకుని తినడం వల్ల జీర్ణ సంబంధిత వ్యాధులు వస్తాయని కొందరు వైద్యులు చెబుతున్నారు. అయితే, బియ్యానికి పురుగులు పట్టడం అనేది పెద్దగా ఆందోళన చెందాల్సిన విషయం కాదని నిపుణులు అంటున్నారు. అందరూ బియ్యాన్ని శుభ్రంగా కడిగి, ఆపై నీటిలో ఉడకబెట్టి తింటారు కాబట్టి, ఆ వేడికి బియ్యంలో ఏవైనా కీటకాలు, మలినాలు లేదా బ్యాక్టీరియా ఉన్నా చనిపోతుంది. కాబట్టి ఆరోగ్యంపై పెద్దగా ప్రభావం చూపదని, అజీర్ణ సమస్యల తీవ్రత కూడా తక్కువగానే ఉంటుందని భరోసా ఇస్తున్నారు. నాచురోపతిక్ మెడిసిన్ నిపుణులు సైతం బియ్యంలో పురుగులు, కీటకాలు చేరిన కారణంగా జబ్బుపడిన కేసులు భారతదేశంలో చాలా అరుదని చెప్పారు.

పురుగులు పట్టడానికి కారణాలు:

సిరిధాన్యాలతో పోలిస్తే వరి, గోధుమలకు పీచుపదార్థం ఉన్న కవచం తక్కువగా ఉంటుంది. దీని కారణంగానే వరి, గోధుమలు నిల్వ చేసినప్పుడు పురుగులు ఎక్కువగా పడతాయి. సిరిధాన్యాల పొట్టులో పీచుపదార్థం కవచంలా పనిచేస్తున్న కారణంగా 30 ఏళ్లయినా కూడా వాటికి పురుగులు రావు, కానీ వరిబియ్యం, గోధుమలకు ఈ పీచు కవచం చాలా తక్కువగా ఉంటుందని, అందువల్లనే వీటికి సులభంగా పురుగులు పడతాయని నిపుణులు చెబుతున్నారు. ఎలాంటి బియ్యంలోనైనా ఫైబర్ మోతాదు చాలా తక్కువగానే ఉంటుందట. దంపుడు బియ్యం, నల్ల బియ్యం అనేవి ఒరిజినల్ బియ్యం వెరైటీలని, కాబట్టి పాలిష్డ్ బియ్యం కన్నా పది రెట్లు మేలని, అంతే కానీ మొత్తంగా బియ్యానికి జబ్బులను నయం చేసే శక్తి లేదని ఎక్స్‌పర్ట్స్ వెర్షన్.

పురుగుల నివారణ చిట్కాలు:

పురుగుల సమస్యను ఎదుర్కోవడానికి నిపుణులు కొన్ని చిట్కాలను సూచిస్తున్నారు:

1. తేమ నియంత్రణ: ముందుగా బియ్యం నిల్వ ఉంచిన డబ్బాలో కానీ, దాని చుట్టూ కానీ తేమ లేకుండా చూసుకోవాలి.

2. ఘాటైన వాసన గల పదార్థాలు: బియ్యం డబ్బాలో ఘాటైన వాసన ఉండే పదార్థాలు వేయడం వల్ల పురుగులు చేరకుండా ఉంటాయని కొందరు నిపుణులు చెబుతున్నారు. వీటిలో వేపాకు, బిర్యానీ ఆకు, లవంగాలు, ఇంగువ, కర్పూరం, వెల్లుల్లి రెబ్బలు, ఎండుమిర్చి, రాతి ఉప్పు వంటివి ఉన్నాయి. వీటి సాయంతో బియ్యంలో పురుగులు రాకుండా చేయొచ్చు.

3.పొడులు: వేపాకు, లవంగాలు, కర్పూరాన్ని పొడిగా చేసి ఒక గుడ్డలో కట్టి బియ్యం డబ్బాలో వేసినా, వాటి వాసనకు పురుగులు పట్టకుండా ఉంటాయని నిపుణులు వెల్లడించారు. వేపాకు, లవంగాలకు క్రిమి కీటకాలతో పోరాడే శక్తి ఉంటుంది. కొందరు బోరిక్ పౌడర్‌ను కూడా గుడ్డలో కట్టి బియ్యం నిల్వ చేసే డబ్బాల్లో వేస్తారు.

4. ఇతర పద్ధతులు: ఈ మధ్య ఆముదం నూనె వంటి వాటిని కూడా బియ్యం డబ్బాల్లో ఉంచుతున్నారని ఆసావరీ పట్వర్ధన్ చెప్పారు. బియ్యానికి పురుగులు పట్టకుండా ఉండేలా మార్కెట్లో కొన్ని కెమికల్స్ కూడా అందుబాటులో ఉన్నాయి. పాతకాలంలో గ్రామీణ ప్రాంతాల్లోని ఉమ్మడి కుటుంబాలు ఎక్కువ మొత్తంలో బియ్యాన్ని దీర్ఘకాలం నిల్వ చేసుకునేవి. కానీ ప్రస్తుతం ఉన్న చిన్న కుటుంబాలు తక్కువ మోతాదులోనే బియ్యాన్ని నిల్వ చేసుకుంటున్నాయి. బియ్యానికి పురుగులు, కీటకాలు పట్టిన కారణంగా జబ్బు బారిన పడ్డ వాళ్లు అత్యంత అరుదని నిపుణులు చెబుతున్నారు.