RBI: మనలో చాలామంది ఉద్యోగాలు మారినప్పుడు, వేరే ప్రాంతాలకు వెళ్లినప్పుడు లేదా కొత్త ఖాతాలు తెరిచినప్పుడు పాత బ్యాంక్ ఖాతాలను వాడటం మానేస్తుంటారు. అయితే, కొన్ని సంవత్సరాల పాటు ఎలాంటి లావాదేవీలు నిర్వహించకపోతే ఆ ఖాతా “క్రియారహితం” (Inoperative / Dormant Account) గా మారుతుందని రిజర్వ్ బ్యాంక్ ఆఫ్ ఇండియా (RBI) హెచ్చరిస్తోంది. ఆర్బీఐ RBI Kehta Hai అనే పేరుతో అవగాహన ప్రచారంలో భాగంగా ఈ అంశంపై బ్యాంకు ఖాతాదారులు తెలుసుకోండి.
1. ఖాతా డీయాక్టివేట్గా మారుతుందా?
- 2 సంవత్సరాల పరిమితి: మీ బ్యాంక్ ఖాతాలో (సేవింగ్స్ లేదా కరెంట్) వరుసగా రెండు సంవత్సరాల (24 నెలలు) పాటు ఎలాంటి డిపాజిట్, విత్డ్రా లేదా డిజిటల్ లావాదేవీలు జరగకపోతే బ్యాంక్ ఆ ఖాతాను “Inoperative Account”గా గుర్తిస్తుంది. అంటే ఎలాంటి లావాదేవీలు జరగని ఖాతాగా గుర్తిస్తుంది.
- సిస్టమ్ లావాదేవీలు మినహాయింపు: బ్యాంక్ ఖాతాలో వడ్డీ జమ కావడం లేదా బ్యాంక్ ఛార్జీలు కట్ కావడం వంటి వాటిని ఖాతాదారుడు చేసిన లావాదేవీలుగా పరిగణించరు. ఖాతాదారుడి స్వయంప్రమేయంతో జరిగే డిపాజిట్/విత్డ్రాల్ మాత్రమే పరిగణనలోకి వస్తాయి.
2. ఖాతా ఇన్-ఆపరేటివ్ అయితే ఏమవుతుంది?
- సేవలు నిలిపివేత: ATM కార్డ్, నెట్ బ్యాంకింగ్, UPI, చెక్బుక్ వంటి సేవల ద్వారా లావాదేవీలు నిర్వహించడం సాధ్యం కాదు.
- డబ్బు భద్రం: ఖాతా క్రియారహితంగా మారినా మీ డబ్బు పూర్తి సురక్షితంగా ఉంటుంది.
- వడ్డీ జమ అవుతుంది: సేవింగ్స్ ఖాతాలో ఉన్న సొమ్ముపై వచ్చే వడ్డీని బ్యాంకులు నిబంధనల ప్రకారం ఖాతాలో జమ చేస్తూనే ఉంటాయి.
3. 10 ఏళ్లు దాటితే ‘అన్క్లెయిమ్డ్ డిపాజిట్’ (Unclaimed Deposit)
- DEA ఫండ్కు బదిలీ: 10 సంవత్సరాల పాటు ఎలాంటి లావాదేవీలు లేని ఖాతాల్లోని నిధులను బ్యాంకులు ఆర్బీఐ “డిపాజిటర్ ఎడ్యుకేషన్ అండ్ అవేర్నెస్” (DEA) ఫండ్కు బదిలీ చేస్తాయి.
- UDGAM పోర్టల్: మీ కుటుంబ సభ్యుల లేదా మీ పాత అన్క్లెయిమ్డ్ డిపాజిట్లను వెతకడానికి ఆర్బీఐ UDGAM (Unclaimed Deposits – Gateway to Access inforMation) అనే ప్రత్యేక ఆన్లైన్ పోర్టల్ను అందుబాటులోకి తెచ్చింది.
4. అకౌంట్ను రీయాక్టివేట్ చేయడం ఎలా?
అకౌంట్ను డీయాక్టివేట్గా మారితే ఖాతాను తిరిగి పొందడం చాలా సులభం. దీని కోసం కింది ప్రక్రియను అనుసరించవచ్చు:
- బ్యాంక్ను సంప్రదించడం: మీ బ్యాంక్ శాఖకు (Home Branch లేదా సమీపంలోని ఏ శాఖకైనా) నేరుగా వెళ్లాలి.
- Re-KYC వివరాలను సమర్పించడం: మీ గుర్తింపు, చిరునామా వివరాలను అప్డేట్ చేయడానికి కింది పత్రాలను సమర్పించాల్సి ఉంటుంది.
- గుర్తింపు, చిరునామా ఆధారం: ఆధార్ కార్డ్, పాన్ కార్డ్, ఓటర్ ఐడీ లేదా పాస్పోర్ట్, పాస్పోర్ట్ సైజ్ ఫోటోలు.
- వీడియో KYC (Video KYC): అనేక బ్యాంకులు ప్రస్తుతం ఆన్లైన్/మొబైల్ యాప్ ద్వారా ఇంటి నుంచే వీడియో KYC పూర్తి చేసే వెసులుబాటును కల్పిస్తున్నాయి.
- చిన్న లావాదేవీ నిర్వహించడం: KYC ప్రక్రియ పూర్తయిన తర్వాత, ఖాతాను పూర్తిస్థాయిలో యాక్టివేట్ చేయడానికి చిన్న మొత్తంలో డిపాజిట్ లేదా విత్డ్రా లావాదేవీ చేయాల్సి ఉంటుంది.
- ముఖ్యమైన గమనిక: RBI నిబంధనల ప్రకారం, క్రియారహితంగా ఉన్న బ్యాంక్ ఖాతాను తిరిగి సక్రియం (Reactivate) చేయడానికి బ్యాంకులు ఎలాంటి రుసుము (Charges) వసూలు చేయకూడదు. ఇది పూర్తిగా ఉచితం.
5. మీ ఖాతాను ఎల్లప్పుడూ యాక్టివేట్ ఉంచుకోవడానికి చిట్కాలు
- క్రమం తప్పకుండా వాడటం: మీ వద్ద ఉన్న అన్ని ఖాతాల నుంచి కనీసం సంవత్సరానికి ఒకట్రెండు సార్లు అయినా చిన్నపాటి డిజిటల్ లావాదేవీలు లేదా ATM విత్డ్రాలు చేయండి.
- అవసరం లేని ఖాతాలను మూసివేయడం: మీరు ఉపయోగించని ఖాతాలు ఉంటే, వాటిని ఉంచడం కంటే బ్యాంక్కు వెళ్లి క్లోజ్ చేయడం మంచిది.
- వివరాలు అప్డేట్ చేయడం: మీ మొబైల్ నంబర్, ఇమెయిల్ ఐడీ, లేదా నివాస చిరునామా మారినప్పుడు వెంటనే బ్యాంక్లో అప్డేట్ చేయండి. తద్వారా ఖాతా ఇన్-ఆపరేటివ్గా మారే ముందు బ్యాంక్ పంపే అలర్టులు మీకు అందుతాయి.
ఇది కూడా చదవండి: House Construction: సొంతింటి కల నెరవేర్చుకుంటున్నారా? ఇంటి నిర్మాణ లైసెన్స్ పొందడం ఎలాగో తెలుసా?
ఇవి కూడా చదవండి
ఇది కూడా చదవండి: School Holidays: విద్యార్థులకు గుడ్న్యూస్.. ఆగస్ట్లో తెలుగు రాష్ట్రాల్లో భారీగా సెలవులు!
మరిన్ని బిజినెస్ వార్తల కోసం ఇక్కడ క్లిక్ చేయండి
