Vaibhav Sooryavanshi : ఇటీవల జింబాబ్వేతో జరిగిన టీ20 సిరీస్ను భారత్ క్లీన్ స్వీప్ చేయగా, అందులో 15 ఏళ్ల యువ సంచలనం వైభవ్ సూర్యవంశీ ప్లేయర్ ఆఫ్ ది సిరీస్గా నిలిచి అందరి దృష్టిని ఆకర్శించాడు. జింబాబ్వే పర్యటనలో అభిషేక్ శర్మతో కలిసి ఓపెనింగ్ చేసిన సూర్యవంశీ తొలి మ్యాచ్లోనే కేవలం 18 బంతుల్లోనే హాఫ్ సెంచరీ కొట్టాడు. ఆ తర్వాత చివరి మ్యాచ్లో 49 బంతుల్లోనే 81 పరుగులు చేసి అదరగొట్టాడు. పరిస్థితికి తగ్గట్టు ఆడుతూ ఎంతో పరిణతి చూపించిన ఈ కుర్రాడిని ఇప్పుడు పొట్టి ఫార్మాట్ నుంచే కాకుండా నేరుగా 2027 వన్డే ప్రపంచకప్ టీమ్లోకి కూడా ఎంపిక చేయాలనే డిమాండ్లు గట్టిగా వినిపిస్తున్నాయి.
గిల్ను 4వ స్థానానికి మార్చాలన్న మాజీ క్రికెటర్
భారత మాజీ వికెట్ కీపర్, దిగ్గజ క్రికెటర్ ఫరూక్ ఇంజనీర్ మాట్లాడుతూ సూర్యవంశీని వన్డే జట్టులోకి కూడా తీసుకోవాలని టీమ్ మేనేజ్మెంట్కు కీలక సూచనలు చేశారు. దీనికోసం టీమిండియా బ్యాటింగ్ ఆర్డర్లో మార్పులు చేయాలని ఆయన అభిప్రాయపడ్డారు. “ప్రస్తుతం జట్టులో శుభ్మన్ గిల్ అత్యుత్తమ బ్యాటర్. గిల్ క్లాస్ ప్లేయర్ అయినప్పటికీ, వన్డేల్లో రోహిత్ శర్మతో కలిసి సూర్యవంశీ ఓపెనింగ్ చేస్తే లెఫ్ట్-రైట్ కాంబినేషన్ కుదురుతుంది. సూర్యవంశీ లాంటి అటాకింగ్ బ్యాటర్ ఓపెనింగ్లో ఉంటే ఖాళీలను బాగా వాడుకోగలడు. కాబట్టి గిల్ను 4వ స్థానానికి మార్చాలి. రోహిత్, సూర్యవంశీ ఓపెనర్లుగా, విరాట్ కోహ్లీ 3వ స్థానంలో, గిల్ 4వ స్థానంలో వస్తే భారత బ్యాటింగ్ లైనప్ అత్యంత బలంగా మారుతుంది” అని ఫరూక్ ఇంజనీర్ పీటీఐకి తెలిపారు.
రోహిత్ శర్మ ప్లాన్స్.. గిల్ vs శ్రేయస్ అయ్యర్ లెక్కలు
అయితే ప్రస్తుతం ఉన్న ప్రణాళికల ప్రకారం వన్డేల్లో రోహిత్ శర్మతో కలిసి శుభ్మన్ గిల్ ఓపెనింగ్ చేస్తుండగా, వైస్ కెప్టెన్ శ్రేయస్ అయ్యర్ 4వ స్థానంలో బ్యాటింగ్ చేస్తున్నాడు. 2027 వన్డే వరల్డ్కప్ వరకు బీసీసీఐ ఇదే వ్యూహాన్ని కొనసాగించే అవకాశముంది. మరోవైపు వన్డేల్లో గిల్, అయ్యర్ గణాంకాలను పరిశీలిస్తే.. గిల్ 67 వన్డేల్లో 60.33 సగటుతో 3379 పరుగులు (9 సెంచరీలు, 20 హాఫ్ సెంచరీలు) చేయగా, అయ్యర్ 82 వన్డేల్లో 45.44 సగటుతో 3136 పరుగులు (5 సెంచరీలు, 24 హాఫ్ సెంచరీలు) సాధించాడు. 2023 వరల్డ్కప్లో అయ్యర్ 4వ స్థానంలో వచ్చి 530 పరుగులు చేసి దుమ్మురేపాడు.
సౌతాఫ్రికా పరిస్థితుల్లో ఎవరికి అడ్వాంటేజ్?
2027 వన్డే ప్రపంచకప్ సౌతాఫ్రికా వేదికగా జరగనుండటంతో అక్కడి పేస్, బౌన్స్ ఉండే పిచ్లపై ఆటగాళ్ల ప్రదర్శన కీలకం కానుంది. శుభ్మన్ గిల్ సరైన టెక్నిక్తో షార్ట్ పిచ్ బంతులను, హారిజంటల్ షాట్లను బాగా ఆడగలడు కాబట్టి సౌతాఫ్రికా మైదానాల్లో అతనికి మంచి రికార్డు ఉండే అవకాశం ఉంది. అదే సమయంలో శ్రేయస్ అయ్యర్ షార్ట్ బాల్స్ ఆడటంలో కొంత ఇబ్బంది పడుతుంటాడు. ఇటీవల తన బలహీనతను అధిగమించేందుకు శ్రమిస్తున్నప్పటికీ, వరల్డ్కప్ నాటికి 4వ స్థానంలో తన స్థానాన్ని నిలబెట్టుకోవాలంటే అయ్యర్ మరిన్ని నిలకడైన ప్రదర్శనలు చేయాల్సి ఉంటుంది.
మరిన్ని క్రీడా వార్తల కోసం ఇక్కడ క్లిక్ చేయండి..
