ముందుగా ఒక కిలో చికెన్ను శుభ్రంగా కడిగి పెట్టుకోవాలి. ఇందులో ఉప్పు, కారం, పసుపుతో పాటు వేయించిన జీలకర్ర పొడి, ధనియాల పొడి, గరం మసాలా, మరియు కొద్దిగా మిరియాల పొడి వేయాలి. దీనికి అల్లం వెల్లుల్లి పేస్ట్, సన్నగా తరిగిన ఉల్లిపాయ ముక్కలు, పచ్చిమిర్చి, కరివేపాకు, కొత్తిమీర, పుదీనా మరియు అరచెక్క నిమ్మరసం కలపాలి.
ముఖ్యంగా ఒక స్పూన్ కసూరి మేతిని వేయించి పొడి చేసి వేస్తే ఆ సువాసన అద్భుతంగా ఉంటుంది. చివరగా అర కప్పు పెరుగు వేసి ముక్కలన్నింటికీ మసాలా పట్టించి అరగంట పాటు నానబెట్టాలి. ఒక కడాయిలో నూనె వేడి చేసి, మ్యారినేట్ చేసిన చికెన్ను వేసి హై ఫ్లేమ్లో ఐదు నిమిషాలు వేయించాలి.
ఆ తర్వాత మూత పెట్టి చిన్న మంటపై పది నిమిషాలు ఉడికిస్తే చికెన్ నుండి నీరు ఊరి గ్రేవీ తయారవుతుంది. ఇప్పుడు ఇందులో మనం ముందుగా సిద్ధం చేసుకున్న ఫ్రైడ్ ఆనియన్ పేస్ట్ (వేయించిన ఉల్లిపాయల ముద్ద) వేసి మరో ఐదు నిమిషాలు ఉడికించాలి. నూనె పైకి తేలే వరకు ఉడికిస్తే ఎంతో రుచికరమైన జ్యూసీ గ్రేవీ చికెన్ ఫ్రై రెడీ!
స్పెషల్ రైస్ తయారీ విధానం: ఈ రైస్ కోసం ముందుగా నాలుగు టమాటాలను ఉడికించి, వాటిని చల్లార్చి మిక్సీలో వేయాలి. అందులోనే కొన్ని ఫ్రైడ్ ఆనియన్స్, కొత్తిమీర, పుదీనా వేసి మెత్తగా గ్రైండ్ చేసుకోవాలి. ఇప్పుడు ఒక గిన్నెలో నూనె, నెయ్యి వేసి పచ్చిమిర్చి, అల్లం వెల్లుల్లి పేస్ట్ వేయించాలి. మనం గ్రైండ్ చేసుకున్న టమాటా పేస్ట్ను ఇందులో వేసి పచ్చి వాసన పోయే వరకు వేయించి, తగినంత ఉప్పు, కారం, బిర్యానీ మసాలా కలపాలి.
మూడు కప్పుల బాస్మతి బియ్యానికి నాలుగున్నర కప్పుల నీళ్లు పోసి ఎసరు మరగనివ్వాలి. అరగంట నానబెట్టిన బియ్యాన్ని ఇందులో వేసి ఉడికించాలి. అన్నం దగ్గర పడ్డాక, పైన కొద్దిగా ఉల్లిపాయలు వేయించిన నూనెను చల్లి, మూత పెట్టి చిన్న మంటపై దమ్ ఇవ్వాలి. ఒక పది నిమిషాల తర్వాత చూస్తే పొడిపొడిలాడుతూ, టమాటా మరియు మసాలాల ఫ్లేవర్తో రైస్ సిద్ధంగా ఉంటుంది.
