Orange, Purple Cap Race : ఐపీఎల్ 2026 సీజన్ రసవత్తరంగా సాగుతోంది. జట్ల మధ్య ప్లేఆఫ్స్ యుద్ధం ఒకవైపు నడుస్తుంటే, ఆటగాళ్ల మధ్య వ్యక్తిగత రికార్డుల వేట మరోవైపు హీటెక్కిస్తోంది. ముఖ్యంగా అత్యధిక పరుగులు చేసిన వారికి ఇచ్చే ఆరెంజ్ క్యాప్, అత్యధిక వికెట్లు తీసిన వారికి దక్కే పర్పుల్ క్యాప్ రేసు ఇప్పుడు క్లైమాక్స్ దశకు చేరుకుంది. ప్రస్తుతం ఈ క్యాప్లు ఒకరి దగ్గర ఉన్నా, తర్వాతి మ్యాచ్తోనే అవి చేతులు మారేలా కనిపిస్తున్నాయి. ప్రస్తుతం ఆరెంజ్ క్యాప్ ఢిల్లీ క్యాపిటల్స్ ఓపెనర్ కేఎల్ రాహుల్ దగ్గర ఉంది. అతను ఆడిన 9 మ్యాచ్ల్లో 433 పరుగులతో టాప్లో కొనసాగుతున్నాడు. అయితే, అతని తర్వాత సన్రైజర్స్ హైదరాబాద్ ధనాధన్ బ్యాటర్లు అభిషేక్ శర్మ, హెన్రిచ్ క్లాసెన్ పొంచి ఉన్నారు. అభిషేక్ శర్మ 425 పరుగులతో రెండో స్థానంలో ఉండగా, రాహుల్ను దాటడానికి అతనికి కేవలం 9 పరుగులు మాత్రమే కావాలి. అలాగే క్లాసెన్ 414 పరుగులతో మూడో స్థానంలో ఉన్నాడు. ఈరోజే కేకేఆర్ తో సన్రైజర్స్ మ్యాచ్ ఉండటంతో, ఈ ఇద్దరిలో ఒకరు కేఎల్ రాహుల్ను అధిగమించి ఆరెంజ్ క్యాప్ సొంతం చేసుకోవడం దాదాపు ఖాయంగా కనిపిస్తోంది.
పర్పుల్ క్యాప్ కోసం బిగ్ ఫైట్
వికెట్ల వేటలో పర్పుల్ క్యాప్ కోసం కూడా తీవ్రమైన పోటీ నెలకొంది. ప్రస్తుతం ఈ క్యాప్ రాయల్ ఛాలెంజర్స్ బెంగళూరు బౌలర్ భువనేశ్వర్ కుమార్ దగ్గర ఉంది. అతను 9 మ్యాచ్ల్లో 17 వికెట్లు పడగొట్టాడు. అయితే, చెన్నై సూపర్ కింగ్స్ యువ పేసర్ అన్షుల్ కాంబోజ్ కూడా 17 వికెట్లతో భువీకి సమానంగా నిలిచాడు. కానీ, భువనేశ్వర్ కుమార్ ఎకానమీ (7.54), యావరేజ్ (15.52) మెరుగ్గా ఉండటంతో పర్పుల్ క్యాప్ ప్రస్తుతానికి అతని దగ్గరే ఉంది. అన్షుల్ ఎకానమీ 8.49గా ఉంది. భువీ ఏమాత్రం తడబడినా అన్షుల్ ఆ క్యాప్ను ఎగరేసుకుపోవడం ఖాయం.
సన్రైజర్స్ వర్సెస్ కేకేఆర్ మ్యాచ్ కీలకం
మే 3న హైదరాబాద్లో జరగనున్న కేకేఆర్ మ్యాచ్ పైన అందరి కళ్లు ఉన్నాయి. ఈ మ్యాచ్లోనే ఆరెంజ్ క్యాప్ విజేత మారే అవకాశం ఉంది. అభిషేక్ శర్మ ఈ సీజన్లో భీకరమైన ఫామ్లో ఉన్నాడు, కేవలం 9 పరుగులు అంటే అతను ఒక్క ఓవర్లోనే కొట్టేయగలడు. అలాగే క్లాసెన్ కూడా మెరుపు ఇన్నింగ్స్ ఆడితే రాహుల్ను వెనక్కి నెట్టడం పెద్ద కష్టమేమీ కాదు. ఈ ముగ్గురు బ్యాటర్ల మధ్య పరుగుల యుద్ధం ఐపీఎల్ ప్రేక్షకులకు కావాల్సినంత వినోదాన్ని పంచుతోంది.
యువ బౌలర్ల ప్రతాపం
పర్పుల్ క్యాప్ రేసులో వెటరన్ బౌలర్ భువనేశ్వర్ కుమార్కు యువ బౌలర్ అన్షుల్ కాంబోజ్ పోటీ ఇవ్వడం విశేషం. చెన్నై తరపున అన్షుల్ వికెట్ల పంట పండిస్తున్నాడు. ఒకప్పుడు పర్పుల్ క్యాప్ అంటే స్టార్ బౌలర్లకే పరిమితమయ్యేది, కానీ ఈసారి యువ ఆటగాళ్లు తమ ప్రతాపం చూపిస్తున్నారు. రానున్న మ్యాచ్ల్లో డెత్ ఓవర్లలో ఎవరు పొదుపుగా బౌలింగ్ చేసి వికెట్లు తీస్తారో వారికే ఈ ప్రతిష్టాత్మకమైన క్యాప్ దక్కనుంది.
మరిన్ని క్రీడా వార్తల కోసం ఇక్కడ క్లిక్ చేయండి..
