సంగీత దర్శకుడు ఆర్పీ పట్నాయక్ ఇటీవల ఒక ప్రత్యేక ఓ ఇంటర్వ్యూలో తన వృత్తిపరమైన ప్రయాణం, కీలక ఘట్టాలను పంచుకున్నారు. ఆయన మొదటి చిత్రం నీ కోసం గురించి మాట్లాడుతూ, అది దాదాపు జీరో బడ్జెట్ తో, ఎటువంటి డబ్బులు లేకుండా తెరకెక్కిందని వివరించారు. ఆ చిత్రంలో పనిచేసిన స్టార్లకు, దర్శకుడికి, హీరోకి లేదా సినిమాటోగ్రాఫర్కు వాహనాలు పెట్టే స్తోమత కూడా లేదని తెలిపారు. నీ కోసం చిత్రానికి తనకు రెమ్యూనరేషన్ అందలేదని, అయితే అది మొదటి సినిమా కాబట్టి వచ్చిందిగా చాలు అనే భావనతో తాను ఉన్నానని ఆర్పీ పట్నాయక్ పేర్కొన్నారు.
వాస్తవానికి, నీ కోసం చిత్రానికి దేవిశ్రీప్రసాద్ సంగీత దర్శకుడిగా ఉండేవారని, ఆయన కొంటె బాపు పాటను మాత్రమే స్వరపరిచారని పట్నాయక్ వెల్లడించారు. దేవి చెన్నైలో ఉండటం, అప్పటి పరిస్థితుల్లో కమ్యూనికేషన్ సవాళ్లు (వాట్సాప్ వంటివి లేకపోవడం) కారణంగా, సినిమా నిర్మాతలు లోకల్గా సంగీత దర్శకుడిని నియమించాలని నిర్ణయించుకున్నారని గుర్తు చేసుకున్నారు. రెండు పాటలు షూట్ అయిన తర్వాత నువ్వు మ్యూజిక్ డైరెక్టర్ అని తనకు ఫోన్ చేసి చెప్పారని, అప్పటి వరకు తాను సంగీత దర్శకుడిని అనే విషయం తనకు తెలియదని ఆర్పీ పట్నాయక్ ఆశ్చర్యకరమైన విషయాన్ని పంచుకున్నారు. ఆ తర్వాత నిర్మాత శ్రీను వైట్ల (గంట శ్రీనివాస్) చెప్పగా, నీ కోసం అనే టైటిల్కు తన మనసులో మెదిలిన టైటిల్ సాంగ్ను స్వరపరిచి, వినిపించగా అందరికీ నచ్చిందని వివరించారు.
నీకోసం సాంగ్ అప్పట్లో ట్రెండ్ సెట్టర్. ముఖ్యంగా అబ్బాయిలు తెగ పాడుకుంటూ ఎంజాయ్ చేసేవాళ్లు. తన స్వరం గురించి మాట్లాడుతూ, తన గొంతులో ఎలాంటి డిస్టర్బెన్స్ లేకుండా చాలా స్పష్టంగా ఉంటుందని, దీనికి తల్లిదండ్రులు ఇచ్చిన జీన్స్ కారణమని ఆర్పీ పట్నాయక్ పేర్కొన్నారు. తాను ఎప్పుడూ ఎలాంటి కేర్ తీసుకోనని, రోజుకి ఇన్ని గంటలు ప్రాక్టీస్ చేయాలని ఉండదని, కంపోజ్ చేసి రికార్డ్ అయిపోయిన తర్వాత పాటలను విననని తెలిపారు. షోలు ఉన్నప్పుడు కూడా ముందుగా సాధన చేయకుండానే నేరుగా స్టేజిపై పాడతానని, ఇందుకు తాను అందరికీ ఒక “రాంగ్ ఎగ్జాంపుల్” అవుతానని నవ్వుతూ చెప్పారు. ఐస్ క్రీమ్ తిని కూడా మైక్ ముందుకు వెళ్లి పాడగలనని, తన ఈ ప్రత్యేకత దేవుడు ఇచ్చిన అదృష్టమని అన్నారు.
దర్శకుడు తేజతో తన అనుబంధం చిత్రం సినిమాకు ముందే మొదలైందని ఆర్పీ పట్నాయక్ తెలిపారు. తేజ ఒక సినిమాకు కెమెరామెన్ గా పనిచేస్తున్నప్పుడు, ఆ సినిమా (జగదీశ్వర్ రెడ్డి దర్శకత్వం) లోని ఒక సిట్యుయేషన్ కోసం తాను థీమ్ మ్యూజిక్ కంపోజ్ చేశానని, అయితే అది సినిమాలో ఉపయోగించలేదని చెప్పారు. తేజ దర్శకుడిగా మారడానికి గల కారణాన్ని కూడా ఆయన ప్రస్తావించారు: కెమెరామెన్గా తక్కువ రెమ్యూనరేషన్ రావడంతో, కొత్త దర్శకులు కోట్లలో సంపాదిస్తున్నారని చూసి, తానూ దర్శకుడిని కావాలని నిర్ణయించుకున్నారని తేజ అనేక ఇంటర్వ్యూలలో చెప్పారని గుర్తు చేశారు.
తేజ తన తొలి సినిమాకు బడ్జెట్ పరిమితుల మధ్య ఆర్పీ పట్నాయక్ కోసం అన్వేషించారని, రామోజీరావు వద్దకు వెళ్లి తక్కువ బడ్జెట్లో సినిమా చేస్తానని చెప్పి, కథ కూడా చెప్పకుండానే సినిమా చేసిపెట్టమని కోరారని ఆర్పీ పట్నాయక్ వివరించారు. ఈ సంభాషణలు ఆయన వృత్తి జీవితంలో కీలక మలుపులుగా నిలిచాయి. నీకోసం చిత్రం డిసెంబర్ 3, 1999న విడుదలైంది. ఇందులో రవితేజ, మహేశ్వరి ప్రధాన పాత్రల్లో నటించారు. బ్రహ్మాజీ, శివాజీ రాజా, ఉత్తేజ్ ఇతర కీలక పాత్రలు పోషించారు. ఇది ప్రముఖ దర్శకుడు శ్రీను వైట్లకు మొదటి సినిమా.
