పబ్లిక్ ప్రావిడెంట్ ఫండ్ (PPF)లో పెట్టుబడి పెట్టేటప్పుడు కేవలం డబ్బు జమ చేయడం సరిపోదని, సరైన తేదీని పాటించడం కూడా అంతే ముఖ్యమని ఆర్థిక నిపుణులు చెబుతున్నారు. ముఖ్యంగా ప్రతి నెల 5వ తేదీలోపు డబ్బు జమ చేస్తే గరిష్ట వడ్డీ లాభం పొందవచ్చని సూచిస్తున్నారు. ఎందుకంటే PPF ఖాతాల్లో వడ్డీ లెక్కింపు నెలలో 5వ తేదీ నుంచి ఆ నెల చివరి రోజు వరకు ఉన్న కనీస నిల్వ ఆధారంగా జరుగుతుంది. అందువల్ల 6వ తేదీ తర్వాత డిపాజిట్ చేస్తే ఆ నెల వడ్డీ కోల్పోయే అవకాశం ఉంటుంది.
ప్రస్తుతం PPFపై సంవత్సరానికి 7.1 శాతం వడ్డీ లభిస్తోంది. ఈ పథకం 15 సంవత్సరాల లాక్-ఇన్ కాలంతో వస్తుంది. అయితే పెట్టుబడిదారులు దీన్ని ఐదేళ్ల చొప్పున పొడిగించుకోవచ్చు. దీర్ఘకాలిక పెట్టుబడులకు ఇది ఒక సురక్షితమైన మరియు స్థిరమైన ఎంపికగా భావిస్తున్నారు. ప్రతి సంవత్సరం కనీసం రూ.500 నుంచి గరిష్టంగా రూ.1.5 లక్షల వరకు పెట్టుబడి పెట్టవచ్చు. చక్రవడ్డీ విధానం కారణంగా కాలక్రమేణా పెట్టుబడి విలువ గణనీయంగా పెరుగుతుంది.
ఉదాహరణకు ఒకరు ప్రతి నెల రూ.5,000 చొప్పున పెట్టుబడి పెడితే, సంవత్సరానికి రూ.60,000 అవుతుంది. 15 సంవత్సరాల తర్వాత ఈ మొత్తం సుమారు రూ.16 లక్షలకు పైగా పెరిగే అవకాశం ఉంది. అదే పెట్టుబడిని 20 సంవత్సరాలకు కొనసాగిస్తే రూ.26 లక్షలకు పైగా, 25 సంవత్సరాలకు పెంచితే రూ.40 లక్షలకు మించి పెరగవచ్చు. అంటే దీర్ఘకాలం పాటు కొనసాగిస్తే లాభాలు గణనీయంగా పెరుగుతాయి.
ఈ పథకంలో గరిష్ట వడ్డీ పొందాలంటే ఆర్థిక సంవత్సరం ప్రారంభంలోనే ఒకేసారి పెద్ద మొత్తంలో పెట్టుబడి పెట్టడం మంచిదని నిపుణులు సూచిస్తున్నారు. దీంతో ఏడాది మొత్తం వడ్డీ లభిస్తుంది. అదనంగా ఇంటర్నెట్ బ్యాంకింగ్ ద్వారా ప్రతి నెల సకాలంలో డిపాజిట్ చేస్తే ఆలస్యాలు తప్పించి పూర్తి లాభం పొందవచ్చు.
పీపీఎఫ్కు పన్ను ప్రయోజనాలు కూడా ప్రధాన ఆకర్షణ. ఇది ట్రిపుల్-ఈ (EEE) కేటగిరీలోకి వస్తుంది. అంటే పెట్టుబడిపై సెక్షన్ 80C కింద మినహాయింపు, వడ్డీపై పన్ను లేదు, మెచ్యూరిటీ మొత్తంపైనా పన్ను ఉండదు. ఈ కారణాల వల్లే పీపీఎఫ్ దీర్ఘకాలిక ఆర్థిక లక్ష్యాలకు ఉత్తమ ఎంపికగా నిలుస్తోంది.
