టమాటా వాడకుండా, కేవలం గసాలు, కొబ్బరి, కొన్ని ప్రాథమిక మసాలా దినుసులతో ఈ రుచికరమైన కూరను సులువుగా సిద్ధం చేసుకోవచ్చు. ముందుగా మసాలాను సిద్ధం చేసుకోవాలి. ఒక ఎండుకొబ్బరి చిప్పను స్టవ్ మీద కాల్చి, చల్లారిన తర్వాత చిన్న ముక్కలుగా కట్ చేసుకోవాలి. రెండు టేబుల్ స్పూన్ల గసగసాలను కొన్ని నీటిలో అరగంట పాటు నానబెట్టాలి. కాల్చిన కొబ్బరి ముక్కలను కూడా నానబెట్టడం వల్ల చక్కగా గ్రైండ్ అవుతాయి. తర్వాత, ఒక పాన్లో మూడు స్పూన్ల ధనియాలు, ఒక స్పూన్ జీలకర్ర, ఒక స్పూన్ మిరియాలు, కొద్దిగా దాల్చినచెక్క, ఐదారు లవంగాలు, పది యాలకులు వేసి, తక్కువ మంటపై రెండు మూడు నిమిషాలు వేయించుకోవాలి. ఇవి పూర్తిగా చల్లారిన తర్వాత మెత్తని పొడిలా మిక్సీలో గ్రైండ్ చేసి, గాలి పోకుండా మూత పెట్టి పక్కన పెట్టుకోవాలి. నానబెట్టిన కొబ్బరి, గసగసాలను అవసరమైతే కొద్దిగా నీరు చేర్చి, మెత్తని పేస్ట్లా గ్రైండ్ చేసుకోవాలి. గసగసాలు పలుకుల్లా లేకుండా మెత్తగా రుబ్బుకోవడం ముఖ్యం. కోడికూర కోసం కిలో పావు నాటుకోడిని శుభ్రంగా కడిగి, నీళ్లన్నీ వడకట్టి పక్కన పెట్టుకోవాలి. బ్రాయిలర్ చికెన్ కూడా వాడుకోవచ్చు.
అడుగు మందంగా ఉండే కడాయిలో అరకప్పు కంటే కాస్త ఎక్కువ పల్లి నూనె వేసుకోవాలి. నూనె వేడయ్యాక, మూడు మీడియం సైజు ఉల్లిపాయ ముక్కలు, పది పచ్చిమిర్చి ముక్కలు, కొద్దిగా కరివేపాకు వేసి మీడియం మంటపై ఒక నిమిషం పాటు వేయించాలి. ఉల్లిపాయలు త్వరగా మగ్గడం కోసం రుచికి సరిపడా ఉప్పు వేసి కలిపి వేయించుకోవాలి. ఉల్లిపాయలు వేగిన తర్వాత, అర స్పూన్ పసుపు, రెండు టేబుల్ స్పూన్ల అల్లం వెల్లుల్లి పేస్ట్ వేసి, పచ్చిదనం పోయే వరకు వేయించాలి. తర్వాత, శుభ్రం చేసుకున్న చికెన్ను కడాయిలో వేసి, మంటను హై ఫ్లేమ్లో పెట్టి, ఐదారు నిమిషాల పాటు నూనెలో బాగా వేయించాలి. ఇలా చేయడం వల్ల చికెన్ బాగా ఉడకడమే కాకుండా, నీచు వాసన పోయి మంచి ఫ్లేవర్ వస్తుంది. ఇప్పుడు మూత పెట్టి, మంటను లో ఫ్లేమ్లోకి మార్చి, చికెన్ను నెమ్మదిగా ఉడకనివ్వాలి. చికెన్ నుండి నీరు ఊరిన తర్వాత, ఆ నీరంతా ఆవిరైపోయే వరకు మూత పెట్టి మగ్గించాలి. అడుగంటకుండా మధ్యమధ్యలో మూత తీసి కలుపుతూ ఉండాలి. చికెన్ నూనెలో చక్కగా మగ్గి, నీరంతా ఆవిరైపోయి, నూనె పైకి తేలినప్పుడు, తినే కారానికి తగ్గట్టు మూడు స్పూన్ల కారం వేసుకోవాలి. మంచి రంగు కోసం నాణ్యమైన కారం వాడటం మంచిది. తర్వాత, గ్రైండ్ చేసి పెట్టుకున్న కొబ్బరి-గసగసాల పేస్ట్ వేసి, పచ్చిదనం పోయే వరకు మీడియం మంటపై కలుపుతూ వేయించాలి. పేస్ట్లోని తేమ పోయి చక్కగా వేగిన తర్వాత, కూర ఉడకడం కోసం సరిపడినన్ని వేడి వేడి నీళ్లు పోసుకోవాలి. చల్లటి నీళ్లు పోస్తే కూర సరిగ్గా ఉడకదు. నాటుకోడి కాబట్టి నీళ్లు కాస్త ఎక్కువే పడతాయి. ముక్కలు మునిగే వరకు నీళ్లు పోసి, ఒకసారి బాగా కలిపి, ఉప్పు, కారాలు సరిచూసుకోవాలి. ఇప్పుడు మూత పెట్టి, మంటను లో ఫ్లేమ్లో ఉంచి, దాదాపు 20 నిమిషాల పాటు ఉడికించాలి.
20 నిమిషాల తర్వాత మూత తీసి ఒకసారి కలిపి, మనం గ్రైండ్ చేసి పెట్టుకున్న మసాలా పొడిని వేసుకోవాలి. కూర అంతా బాగా కలిపిన తర్వాత, మరింత గ్రేవీ కావాలంటే కొన్ని వేడి నీళ్లు కలుపుకోవచ్చు. మసాలా పొడి వేసిన తర్వాత మళ్లీ మూత పెట్టి, లో ఫ్లేమ్లో ఐదారు నిమిషాలు ఉడికించి, ముక్క ఉడికిందో లేదో చూసుకుని, స్టవ్ ఆఫ్ చేసుకోవాలి. నూనె, ఉప్పు, కారం సరిపడినంత వేసుకుని, ఈ చిట్కాలన్నీ పాటిస్తే, ఈ కోడికూర ఎంతో రుచిగా, మంచి ఫ్లేవర్తో, చక్కటి గ్రేవీతో వస్తుంది. అన్నం, పులావ్, రోటి, జొన్నరొట్టెలు, రాగి సంగటి వంటి వాటితో ఈ కూర చాలా చాలా బాగుంటుంది.
