పాలలోని పోషకాలు శరీరానికి అందాలంటే పెరుగు సరైన పద్ధతిలో తోడుకోవాలి. వేసవి వేడికి పెరుగు త్వరగా పులిసిపోవడం వల్ల దాని రుచి, గుణం మారిపోతుంటాయి. అందుకే పాలు తోడుపెట్టేటప్పుడు పాటించాల్సిన చిన్నపాటి చిట్కాలు, నిల్వ చేసే విధానంపై అవగాహన ఉంటే, ఎండకాలంలో కూడా వెన్నలాంటి గట్టి పెరుగును, తియ్యటి రుచిని ప్రతిరోజూ ఆస్వాదించవచ్చు. రుచికరమైన, గట్టి పెరుగు పొందడానికి పాటించాల్సిన ఆసక్తికరమైన చిట్కాలేంటో చూద్దాం..
సరైన పద్ధతి..
పెరుగు రుచిగా రావాలంటే ముందుగా వాడే పాలు తాజావి, నాణ్యమైనవి అయి ఉండాలి. పాలను బాగా మరిగించిన తర్వాత అవి గోరువెచ్చగా మారినప్పుడే తోడు (స్టార్టర్) వేయాలి. పాలు మరీ వేడిగా ఉన్నా లేదా చల్లగా ఉన్నా పెరుగు సరిగ్గా తోడుకోదు. అలాగే పెరుగు తోడుపెట్టే పాత్రలు పొడిగా, పూర్తిగా శుభ్రంగా ఉండాలి. పాత్రలో కొంచెం మురికి ఉన్నా పెరుగు టెక్స్చర్ చెడిపోతుంది. పెరుగును ఎప్పుడూ నేరుగా ఎండ తగిలే చోట కాకుండా చల్లగా, నీడగా ఉండే ప్రదేశంలో ఉంచాలి. ఇలా చేయడం వల్ల బ్యాక్టీరియా వేగంగా పెరగకుండా ఉండి, పెరుగు పుల్లబడకుండా ఉంటుంది.
చక్కెర చిట్కా..
పెరుగు త్వరగా పుల్లగా మారకుండా ఉండటానికి ఒక చిన్న ట్రిక్ ఉంది. తోడు పెట్టే ముందు పాలలో ఒక స్పూన్ చక్కెర కలిపితే బ్యాక్టీరియా సమతుల్యంగా పెరుగుతుంది. ఇది పెరుగు ఎక్కువ సేపు తియ్యగా ఉండేలా చేస్తుంది. పెరుగు సిద్ధమైన వెంటనే దానిని బయట వదిలేయకుండా వెంటనే ఫ్రిజ్లో పెట్టాలి. తక్కువ ఉష్ణోగ్రత వద్ద బ్యాక్టీరియా పనితీరు మందగించి పెరుగు రుచి మారకుండా ఉంటుంది.
పెరుగును ఎప్పుడూ ఎయిర్టైట్ డబ్బాలో నిల్వ చేయడం వల్ల ఇతర వాసనలు రాకుండా తాజాగా ఉంటుంది. ఈ చిన్న జాగ్రత్తలు పాటిస్తే ప్రతిరోజూ మీరు గట్టిగా, రుచికరమైన పెరుగును ఆస్వాదించవచ్చు. పెరుగు పుల్లగా కాకుండా ఉంచడం పెద్ద కష్టమేమీ కాదు. మంచి పాలు, శుభ్రత, సరైన ఉష్ణోగ్రత, ఫ్రిజ్లో నిల్వ వంటి చిన్న జాగ్రత్తలు తీసుకుంటే ప్రతిసారి రుచికరమైన, గట్టిగా ఉండే పెరుగు ఆస్వాదించవచ్చు.
